ಎಸ್​ಬಿಐ ಗ್ರಾಹಕರಿಗೊಂದು ಸಿಹಿ ಸುದ್ದಿ: ಸಾಲದ ದರ 15 ಮೂಲಾಂಶ ಕಡಿತ

ನವದೆಹಲಿ: ದೇಶದ ಅತಿದೊಡ್ಡ ಬ್ಯಾಂಕ್ ಸ್ಟೇಟ್​ ಬ್ಯಾಂಕ್ ಆಫ್ ಇಂಡಿಯಾ (ಎಸ್​ಬಿಐ) ಗುರುವಾರ ಸಾಲದ ದರದಲ್ಲಿ 15 ಮೂಲಾಂಶ ಕಡಿತಗೊಳಿಸಿರುವುದಾಗಿ ಘೋಷಿಸಿದೆ. ಇದರಂತೆ, ಬ್ಯಾಂಕಿನ ಎಲ್ಲ ರೀತಿ ಸಾಲದ ಮೇಲಿನ ಎಂಸಿಎಲ್​ಆರ್ ದರ 15 ಬಿಪಿಎಸ್​ ಕಡಿಮೆಯಾಗಿದೆ. ಇದು ಮೇ 10 ರಿಂದ ಚಾಲ್ತಿಗೆ ಬರಲಿದೆ ಎಂದು ಬ್ಯಾಂಕ್ ತಿಳಿಸಿದೆ.

ಇದನ್ನೂ ಓದಿ: VIDEO: ವಿದ್ಯಾರ್ಥಿಗಳೇ ಚಿಂತೆ ಬಿಟ್ಟು ಓದಿನೆಡೆಗೆ ಗಮನಹರಿಸಿ: ವಿಜಯವಾಣಿ ಫೋನ್​ ಇನ್​ ಕಾರ್ಯಕ್ರಮದಲ್ಲಿ ಪ್ರೊ.ಸಿದ್ದು ಅಲಗೂರು

ಇದರಂತೆ ಒಂದು ವರ್ಷದ ಎಂಸಿಎಲ್​ಆರ್​ ದರ ಶೇಕಡ 7.4ರಿಂದ ಶೇಕಡ 7.25ಕ್ಕೆ ಇಳಿಕೆಯಾಗಿದೆ. ಇದಕ್ಕೆ ಪೂರಕವಾಗಿ ಗೃಹ ಸಾಲದ ಇಎಂಐಗೆ ಸಂಬಂಧಿಸಿದ ಎಂಸಿಎಲ್​ಆರ್ ಇಳಿಕೆಯಾಗಲಿದೆ. ಉದಾಹರಣೆಗೆ 25 ಲಕ್ಷ ರೂಪಾಯಿಯ ಸಾಲ ಇದ್ದು 30 ವರ್ಷದ ಅವಧಿಯ ಇಎಂಐ ಇದ್ದರೆ ಆಗ ಸಾಲದ ಇಎಂಐ 255 ರೂಪಾಯಿ ಕಡಿಮೆ ಆಗಲಿದೆ.

ಇದನ್ನೂ ಓದಿ: ನಿರೀಕ್ಷಿಸಿ.. ಇನ್ನೊಂದು ಹಣಕಾಸಿನ ಪ್ಯಾಕೇಜ್​!

ಇದೇ ರೀತಿ, ಠೇವಣಿಗಳ ಮೇಲಿನ ಬಡ್ಡಿದರದಲ್ಲೂ ವ್ಯತ್ಯಾಸವಾಗಲಿದ್ದು ಮೂರು ವರ್ಷ ತನಕದ ಬಡ್ಡಿದರ 20 ಬಿಪಿಎಸ್ ಕಡಿಮೆ ಆಗಲಿದೆ. ಇದು ಮೇ 12ರಿಂದ ಚಾಲ್ತಿಗೆ ಬರಲಿದೆ. ಹಿರಿಯ ನಾಗರಿಕರಿಗೆ ಇದರಿಂದ ತೊಂದರೆ ಆಗಬಾರದು ಎಂದು ಹೊಸದಾಗಿ ಎಸ್​ಬಿಐ ವಿಕೇರ್​ ಡೆಪಾಸಿಟ್​ ಅನ್ನು ಪರಿಚಯಿಸಲಾಗುತ್ತಿದೆ. ಇದು ಚಿಲ್ಲರೆ ಅವಧಿ ಠೇವಣಿ ವಿಭಾಗದಲ್ಲಿ ಹೊಸ ಉತ್ಪನ್ನವಾಗಿದೆ. 5 ವರ್ಷ ಮತ್ತು ಮೇಲ್ಪಟ್ಟ ಅವಧಿಯ ಠೇವಣಿಗೆ ಈ ಉತ್ಪನ್ನದಲ್ಲಿ ಹಿರಿಯ ನಾಗರಿಕರಿಗೆ ಹೆಚ್ಚುವರಿಯಾಗಿ 30 ಬಿಪಿಎಸ್​ ಬಡ್ಡಿದರ ಸಿಗಲಿದೆ. ಇದು 2020ರ ಸೆಪ್ಟೆಂಬರ್ 30ರ ತನಕ ಚಾಲ್ತಿಯಲ್ಲಿ ಇರಲಿದೆ. ಉಳಿದಂತೆ ಯಾವುದೇ ವ್ಯತ್ಯಾಸ ಇಲ್ಲ ಎಂದು ಬ್ಯಾಂಕ್ ತಿಳಿಸಿದೆ.

https://www.vijayavani.net/tax-evasion-should-be-avoided-cm-bsy-directs-officials/