ಜ್ಯೂ ಎನ್​ಟಿಆರ್​ ಅಭಿನಯದಲ್ಲಿ ರಿಷಭ್​ ಚಿತ್ರ? ವೈರಲ್​ ಆಗುತ್ತಿದೆ ಹೀಗೊಂದು ಸುದ್ದಿ ...

ಬೆಂಗಳೂರು: 'ಕಾಂತರ' ಚಿತ್ರ ಯಶಸ್ವಿಯಾಗುತ್ತಿದ್ದಂತೆಯೇ, ರಿಷಭ್​ ಶೆಟ್ಟಿಗೆ ಬೇಡಿಕೆ ಜಾಸ್ತಿ ಆಗಿದೆ. ಅವರಿಂದ ಚಿತ್ರ ಮಾಡಿಸಬೇಕು ಎಂದು ಬಯಸುವವರು ಸಂಖ್ಯೆ ಹೆಚ್ಚಾಗುತ್ತಿದೆ. ಕೆಲವು ದಿನಗಳ ಹಿಂದೆಯೇ ತೆಲುಗಿನ ಖ್ಯಾತ ನಿರ್ಮಾಪಕ ಅಲ್ಲು ಅರವಿಂದ್​, ತಮ್ಮ ಸಂಸ್ಥೆಗೆ ಒಂದು ಚಿತ್ರ ಮಾಡಿಕೊಡಿ ಎಂದು ರಿಷಭ್​ಗೆ ಕೇಳಿದ್ದು ಸುದ್ದಿಯಾಗಿತ್ತು. ಈಗ ಜ್ಯೂನಿಯರ್​ ಎನ್​.ಟಿ.ಆರ್​ಗೆ ರಿಷಭ್​ ಚಿತ್ರ ನಿರ್ದೇಶಿಸುತ್ತಾರಾ ಎಂಬ ಸುದ್ದಿಯೊಂದು ಇದೀಗ ಕೇಳಿಬರುತ್ತಿದೆ.

ಇದನ್ನೂ ಓದಿ: ನಖರಾ ಮಾಡಿದ ನಾಯಕನಿಗೆ ಚಿತ್ರದಿಂದ ಗೇಟ್​ಪಾಸ್ ಕೊಟ್ಟ ಅರ್ಜುನ್​ ಸರ್ಜಾ!

'ಕಾಂತಾರ' ಚಿತ್ರವು ತೆಲುಗು ಬಾಕ್ಸ್​-ಆಫೀಸ್​ನ್ನು ಚಿಂದಿ ಉಡಾಯಿಸುತ್ತಿದೆ. ಚಿತ್ರವನ್ನು ನೋಡಿ ಸ್ಟಾರ್​ನಟರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದೆ. ಅಮೆರಿಕಾದಲ್ಲಿ ಇದುವರೆಗೂ ಚಿತ್ರ ಎರಡು ಮಿಲಿಯನ್​ ಡಾಲರ್​ ಗಳಿಸಿರಬಹುದು ಎಂಬ ಅಂದಾಜಿದ್ದು, ಇದರಲ್ಲಿ ತೆಲುಗು ಅವತರಣಿಕೆಯೊಂದೇ ಒಂದು ಮಿಲಿಯನ್​ ಡಾಲರ್​ ಸಂಪಾದಿಸಿದೆ ಎಂಬ ಸುದ್ದಿಯೊಂದು ಕೇಳಿಬರುತ್ತಿದೆ.

ಹೀಗಿರುವಾಗಲೇ, ಚಿತ್ರವನ್ನು ವೀಕ್ಷಿಸಿರುವ ತೆಲುಗಿನ ಜನಪ್ರಿಯ ನಟ ಜ್ಯೂನಿಯರ್​ ಎನ್​ಟಿಆರ್​, ರಿಷಭ್​ಗೆ ಕರೆ ಮಾಡಿ ಮೆಚ್ಚುಗೆ ಸೂಚಿಸಿದ್ದಾರಂತೆ. ಜ್ಯೂನಿಯರ್​ ಎನ್​ಟಿಆರ್​ ಅಭಿನಯದಲ್ಲಿ ಚಿತ್ರವೊಂದನ್ನು ನಿರ್ದೇಶಿಸುವ ಯೋಚನೆ ಏನಾದರೂ ಇದೆಯಾ ಎಂಬ ಪ್ರಶ್ನೆಯನ್ನು ರಿಷಭ್​ ಎದುರು ಇಡಲಾಗಿದೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ರಿಷಭ್​, ತಾವು ಈ ಬಗ್ಗೆ ಇನ್ನೂ ಯೋಚಿಸಿಲ್ಲ ಎಂದು ಹೇಳಿದ್ದಾರೆ. 'ಮೊದಲಿನಿಂದಲೂ ಅಷ್ಟೇ. ಮೊದಲು ಕಥೆ ಮಾಡಿ, ಅದಕ್ಕೆ ತಕ್ಕ ಪಾತ್ರಧಾರಿಗಳನ್ನು ಹುಡುಕುವ ಪ್ರಯತ್ನ ಮಾಡುತ್ತೀನಿ. ತಾರಾಗಣ ಆಯ್ಕೆ ಮಾಡಿ, ಅದಕ್ಕೆ ಸೂಕ್ತವಾದ ಕಥೆಯನ್ನು ಇದುವರೆಗೂ ಮಾಡಿಲ್ಲ. ಹಾಗಾಗಿ, ಯಾವುದಾದರೂ ಕಥೆಗೆ ಜ್ಯೂನಿಯರ್ ಎನ್​.ಟಿ.ಆರ್​ ಸೂಕ್ತ ಎಂದು ಮುಂದೆ ಯಾವಾಗಲಾದರೂ ಅನಿಸಿದರೆ ಗೊತ್ತಿಲ್ಲ, ಸದ್ಯಕ್ಕಂತೂ ಅಂತಹ ಯಾವುದೇ ಯೋಚನೆ ಇಲ್ಲ' ಎನ್ನುತ್ತಾರೆ ರಿಷಭ್​.

ಇದನ್ನೂ ಓದಿ: ‘ಲಾಲ್​ ಸಲಾಂ’ ಎಂದ ರಜನಿಕಾಂತ್​; ಮಗಳ ಚಿತ್ರದಲ್ಲಿ ಅತಿಥಿ ಪಾತ್ರ

'ಕಾಂತಾರ' ಚಿತ್ರವು ಸೆ.30ರಂದು ಬಿಡುಗಡೆಯಾಗಿದ್ದು, ಎಲ್ಲೆಡೆ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಚಿತ್ರದಲ್ಲಿ ರಿಷಭ್​ ಶೆಟ್ಟಿ, ಸಪ್ತಮಿ ಗೌಡ, ಕಿಶೋರ್​, ಅಚ್ಯುತ್​ ಕುಮಾರ್​ ಮುಂತಾದವರು ಅಭಿನಯಿಸಿದ್ದು, ಚಿತ್ರವನ್ನು ಹೊಂಬಾಳೆ ಫಿಲಂಸ್​ನಡಿ ವಿಜಯ್​ಕುಮಾರ್​ ಕಿರಗಂದೂರು ನಿರ್ಮಾಣ ಮಾಡಿದ್ದಾರೆ.

https://www.vijayavani.net/janhvi-kapoor-talks-about-her-rumoured-boyfriend-orry/