300 ಕೋಟಿ ದುಡಿಯಬೇಕೆಂಬ ಟಾರ್ಗೆಟ್​ ಮುಟ್ಟುತ್ತಾರಾ ಪವನ್​ ಕಲ್ಯಾಣ್​?

ಟಾಲಿವುಡ್​ ನಟ ಪವನ್​ ಕಲ್ಯಾಣ್​ ರಾಜಕೀಯದ ಜತೆಜತೆಗೆ ರಾಜಕೀಯದಲ್ಲೂ ಸಕ್ರಿಯವಾಗಿರುವುದು ಗೊತ್ತೇ ಇದೆ. ಜನಸೇನಾ ಪಕ್ಷವನ್ನು ಸ್ಥಾಪಿಸಿರುವ ಅವರು 2018ರ ಅಸೆಂಬ್ಲಿ ಚುನಾವಣೆಗಳಲ್ಲಿ ನಿಂತು ಹೀನಾಯವಾಗಿ ಸೋತಿದ್ದರು. ಆ ನಂತರ ಚಿತ್ರರಂಗಕ್ಕೆ ವಾಪಸ್ಸಾಗಿರುವ ಅವರು 2023ರ ಅಸೆಂಬ್ಲಿ ಚುನಾವಣೆಯಲ್ಲಿ ನಿಂತು, ಈ ಬಾರಿ ಶತಾಯ ಗತಾಯ ಗೆಲ್ಲಲೇಬೇಕೆಂದು ಪಣ ತೊಟ್ಟಿದ್ದಾರೆ.

ಅದಕ್ಕಿಂತ ಹೆಚ್ಚಾಗಿ, ರಾಜಕೀಯದಲ್ಲಿ ಕಳೆದುಕೊಂಡಿರುವ ಹಣವನ್ನು ಮರಳಿ ಪಡೆಯಬೇಕೆಂದು ಯೋಚಿಸಿರುವ ಪವನ್​, ಅದಕ್ಕೆ ಸಿನಿಮಾ ಮೊರೆ ಹೋಗಿದ್ದಾರೆ. ಹೇಗೂ ಮುಂದಿನ ಚುನಾವಣೆಗಳು ಬರುವುದಕ್ಕೆ ಇನ್ನೂ ಮೂರು ವರ್ಷಗಳಿವೆ. ಅಷ್ಟರಲ್ಲಿ ಒಂದಿಷ್ಟು ಚಿತ್ರಗಳಲ್ಲಿ ನಟಿಸಿ, ಆಗಿರುವ ನಷ್ಟವನ್ನು ಸರಿದೂಗಿಸಿಕೊಳ್ಳಬೇಕು ಎನ್ನುವುದು ಅವರ ಐಡಿಯಾ ಆಗಿತ್ತಂತೆ.

ಇದನ್ನೂ ಓದಿ: ಯಶ್​ ಪುತ್ರನ ಹೆಸರೇನಿರಬಹುದು?; ರಾಧಿಕಾ ನೀಡಿದ್ದಾರೊಂದು ಸುಳಿವು…

ಅವರ ಪ್ರಕಾರ, ಚುನಾವಣೆಗಳಿರುವುದೇನಿದ್ದರೂ 2023ರ ಕೊನೆಯಲ್ಲಿ. ಅಷ್ಟರಲ್ಲಿ ಕನಿಷ್ಠ 300 ಕೋಟಿ ದುಡಿಯಬೇಕು ಎಂದು ಪವನ್​ ಅಂದುಕೊಂಡಿದ್ದರಂತೆ. ಹೇಗೂ ಅವರಿಗೆ ಸಂಭಾವನೆಯಾಗಿ ಚಿತ್ರವೊಂದಕ್ಕೆ 50 ಕೋಟಿ ಸಿಗುತ್ತದೆ. ಇನ್ನು ಆರು ಚಿತ್ರಗಳಲ್ಲಿ ನಟಿಸಿದರೆ, ಅವರೊಂದುಕೊಂಡ ಟಾರ್ಗೆಟ್​ ಮುಟ್ಟಿದಂತಾಗುತ್ತದೆ.

ಅದೇ ಕಾರಣಕ್ಕೆ, 'ವಕೀಲ್​ ಸಾಬ್​' ನಂತರ ಪವನ್ ಇನ್ನೊಂದಿಷ್ಟು ಚಿತ್ರಗಳಲ್ಲಿ ನಟಿಸುವುದಕ್ಕೆ ಗ್ರೀನ್​ ಸಿಗ್ನಲ್​ ನೀಡಿದ್ದರು. ಆದರೆ, ಕರೊನಾದಿಂದ ಎಲ್ಲವೂ ನಿಧಾನವಾಗುತ್ತಿದೆ. ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ಈ ಐದು ತಿಂಗಳುಗಳಲ್ಲಿ 'ವಕೀಲ್​ ಸಾಬ್​' ಮುಗಿಸಿ ಇನ್ನೂ ಒಂದು ಚಿತ್ರದಲ್ಲಿ ಅವರು ನಟಿಸಬಹುದಾಗಿತ್ತು. ಆದರೆ, ಕರೊನಾದಿಂದ 'ವಕೀಲ್​ ಸಾಬ್​' ಚಿತ್ರೀಕರಣವೇ ಇದುವರೆಗೂ ಮುಗಿದಿಲ್ಲ. ಅದು ಮುಗಿದು, ಇನ್ನೊಂದು ಚಿತ್ರ ಶುರುವಾಗಬೇಕಾದರೆ, ಇನ್ನೂ ಆರು ತಿಂಗಳಾದರೂ ಬೇಕು ಎಂದು ಹೇಳಲಾಗುತ್ತಿದೆ.

ಇದನ್ನೂ ಓದಿ: ಅಜ್ಜಿಯ ಕನಸು ನನಸಾಗಿಸಿದ ಸೋನು ಸೂದ್​; ಶುರುವಾಯ್ತು ನೋಡಿ ಮಾರ್ಷಲ್​ ಆರ್ಟ್ಸ್​ ಶಾಲೆ

ಪವನ್​ ಅಂದುಕೊಂಡಂತೆ ಆರು ಚಿತ್ರಗಳನ್ನು ಮುಗಿಸುವುದಕ್ಕೆ ಸಾಧ್ಯವಾಗುವುದಿಲ್ಲ ಎಂಬುದು ಟಾಲಿವುಡ್​ ಪಂಡಿತರ ಲೆಕ್ಕಾಚಾರ. ಹಾಗಂತ ಸಾಧ್ಯವೇ ಇಲ್ಲ ಎಂದು ಹೇಳುವುದೂ ಸಾಧ್ಯವಿಲ್ಲ. ಸುಮ್ಮನೆ ಕಥೆ-ಚಿತ್ರಕಥೆ ಎಂದು ಸಮಯ ವ್ಯರ್ಥ ಮಾಡುವ ಬದಲು, ಒಂದಿಷ್ಟು ಯಶಸ್ವಿ ಚಿತ್ರಗಳನ್ನು ತಂದು, ತೆಲುಗಿಗೆ ರೀಮೇಕ್​ ಮಾಡಿದರೆ ಹೇಗೆ ಎಂಬ ಯೋಚನೆಯೂ ಪವನ್​ಗಿದೆಯಂತೆ.

ರೀಮೇಕೋ, ಸ್ವಮೇಕೋ ... ಒಟ್ಟಿನಲ್ಲಿ 300 ಕೋಟಿ ದುಡಿಯಬೇಕು ಎಂಬ ಟಾರ್ಗೆಟ್​ ಮುಟ್ಟುತ್ತಾರಾ ಪವನ್​ ಎಂಬುದನ್ನು ಕಾದು ನೋಡಬೇಕಿದೆ.

https://www.vijayavani.net/dad-still-on-life-support-says-sp-charan/