‘ಅದು 2007. ಆವತ್ತು ರೇಡಿಯೋ ಜಾಕಿ ಆಗಿದ್ದ ನಾನು ಕರಣ್ ಜೋಹರ್ ಅವರನ್ನು ಸಂದರ್ಶನ ಮಾಡಿದ್ದೆ. ಸಂದರ್ಶನ ಮುಗಿದ ಬಳಿಕ, ಸಿನಿಮಾ ಆಸಕ್ತಿ ಇದೆ ಎಂದು ಅವರ ಬಳಿ ಕೇಳಿಕೊಂಡಿದ್ದೆ. ಅದರಂತೆ, ಆಫೀಸ್ ನಂಬರ್ ಕೊಟ್ಟು ಸಂಪರ್ಕಿಸುವಂತೆಯೂ ಹೇಳಿಕೊಂಡಿದ್ದರು. ಅದರಂತೆ ಹಲವು ಬಾರಿ ಕರಣ್ ಆಫೀಸ್ಗೆ ಹೋದರೆ, ಅವರಿಲ್ಲ ಎಂಬುದಷ್ಟೇ ಉತ್ತರ ಸಿಗುತ್ತಿತ್ತು. ಪದೇಪದೆ ಕೇಳಿದರೆ, ಅವರು ಬಿಜಿಯಾಗಿದ್ದಾರೆ ಎಂಬ ಮಾತು. ಅವರು ಹೇಳಿದಾಗಲೆಲ್ಲ ನಾನು ಫೋನ್ ಮಾಡಿ ಕೇಳುತ್ತಿದ್ದೆ... ಒನ್ ಫೈನ್ ಡೇ, ‘‘ನಾವು ಸ್ಟಾರ್ ನಟರೊಂದಿಗೆ ಮಾತ್ರ ಸಿನಿಮಾ ಮಾಡುತ್ತೇವೆ... ನಿಮ್ಮಂಥವರ ಜತೆಗಲ್ಲ. ಸಿನಿಮಾ ಹಿನ್ನೆಲೆ ಇರದ ಮತ್ತು ಹೊಸಬರನ್ನು ನಾವು ಆಡಿಷನ್ ಮಾಡುವುದಿಲ್ಲ’’ ಎಂಬ ಪ್ರತ್ಯುತ್ತರ ಸಿಕ್ಕಿತ್ತು. ಅಂದಿನಿಂದ ನನ್ನ ಕೆಲಸದಲ್ಲಿ ನಾನು ತೊಡಗಿಸಿಕೊಂಡೆ. ಸಿನಿಮಾ ಅವಕಾಶವೂ ಸಿಕ್ಕಿತು’ ಎಂದು ಆ ದಿನಗಳನ್ನು ನೆನಪು ಮಾಡಿಕೊಳ್ಳುತ್ತಾರೆ ಆಯುಷ್ಮಾನ್.
