ಬೆಂಗಳೂರು: ಹೀಗೂ ಸಿನಿಮಾ ಮಾಡಬಹುದು, ಇಂಥ ವಿಷಯವನ್ನೂ ಜನರಿಗೆ ತೋರಿಸಬಹುದು, ಮಡಿವಂತಿಕೆ ಬದಿಗೆ ಸರಿಸಿ, ಅದರಾಚೆಗೂ ಹೊಸ ಶೈಲಿಯ ಸಿನಿಮಾ ಮಾಡಬಹುದು ಎಂದು ಹೇಳಿಕೊಟ್ಟವರು ನಟ, ನಿರ್ದೇಶಕ, ನಿರ್ಮಾಪಕ, ಬರಹಗಾರ ಕಾಶಿನಾಥ್. ಆದರೆ, ಇದೀಗ ಕಾಶಿನಾಥ್ ಇಲ್ಲದೆ ಎರಡು ವರ್ಷವಾಯ್ತು. ಒಂದು ವೇಳೆ ಬದುಕಿದ್ದಿದ್ದರೆ ಇಂದು ಅವರಿಗೆ ಇಂದು 68 ವರ್ಷ ತುಂಬುತ್ತಿತ್ತು. ಇಂಥ ಸಂದರ್ಭದಲ್ಲಿ ಕನ್ನಡ ಸಿನಿಲೋಕದ ಕಲಾವಿದನನ್ನು ಸ್ಯಾಂಡಲ್ವುಡ್ ಮತ್ತೆ ನೆನಪು ಮಾಡಿಕೊಂಡಿದೆ. ಅವರ 68ನೇ ಜನ್ಮ ದಿನಕ್ಕೆ ಶುಭಕೋರಿದೆ. ಆ ಪೈಕಿ ನಟ ಉಪೇಂದ್ರ ಎರಡೇ ಸಾಲು ಬರೆದುಕೊಂಡರೂ, ಅದರೊಳಗೆ ಬೆಟ್ಟದಷ್ಟು ಭಾವನೆಗಳನ್ನು ತುಂಬಿದ್ದಾರೆ. ಅರಿವು ಮೂಡಿಸಿದ ಗುರುವಿಗೆ ಜನ್ಮ ದಿನದ ಶುಭಾಶಯಗಳು ಎಂದಿದ್ದಾರೆ. ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲಿ ಕಾಶಿನಾಥ್ ಭಾಗವಹಿಸಿದ ಫೋಟೋವೊಂದನ್ನು ಶೇರ್ ಮಾಡಿಕೊಂಡು ಹ್ಯಾಪಿ ಬರ್ತಡೇ ಎಂದಿದ್ದಾರೆ.
