ದಿಶಾ, ಕನ್ನಡಿಗರಿಗೆ ಮೊದಲು ಪರಿಚಯವಾಗಿದ್ದು, ‘ಡ್ಯಾನ್ಸಿಂಗ್ ಸ್ಟಾರ್’ನ ಸೀಸನ್ ಒಂದರಲ್ಲಿ. ಸುನಾಮಿ ಕಿಟ್ಟಿ ಜತೆಗೆ ಹೆಜ್ಜೆ ಹಾಕಿದ್ದ ದಿಶಾ ಸಾಕಷ್ಟು ಜನಪ್ರಿಯರಾದರು. ಅದೇ ಜನಪ್ರಿಯತೆ, ಅವರಿಗೆ ‘ಕುಲವಧು’ ಧಾರಾವಾಹಿಯಲ್ಲಿ ನಟಿಸುವ ಅವಕಾಶ ತಂದುಕೊಟ್ಟಿತು. ಒಂದೂವರೆ ವರ್ಷ ಧಾರಾವಾಹಿಯಲ್ಲಿ ನಟಿಸಿದ ನಂತರ ಅವರು ಬ್ರೇಕ್ ತೆಗೆದುಕೊಂಡರು. ಈ ಮಧ್ಯೆ, ಶಿವರಾಜಕುಮಾರ್ ನಿರ್ವಣದ ‘ಹೇಟ್ ಯೂ ರೋಮಿಯೋ’ ಎಂಬ ವೆಬ್ ಸೀರೀಸ್ನಲ್ಲಿ ನಟಿಸಿದರು. ಮುಂದೇನು ಎನ್ನುವಾಗಲೇ, ಚಿತ್ರದಲ್ಲಿ ನಟಿಸುವುದಕ್ಕೆ ಪನ್ನಗ ಅವರಿಂದ ಫೋನ್ ಬಂತಂತೆ. ‘ಈ ಚಿತ್ರದಲ್ಲಿ ನಟಿಸುವಾಗ ಗರ್ಭಿಣಿಯಾಗಿದ್ದೆ. ಡ್ಯಾನ್ಸು, ಸ್ಟಂಟ್ ಅಂತ ರಿಸ್ಕಿ ಸನ್ನಿವೇಶಗಳಲ್ಲೂ ಕಾಣಿಸಿಕೊಂಡಿದ್ದೇನೆ. ನಾವು ಹಾಕಿರುವ ಶ್ರಮಕ್ಕೆ ಒಳ್ಳೆಯ ಪ್ರತಿಫಲ ಸಿಗುತ್ತದೆ ಎಂಬ ಭರವಸೆ ಇದೆ’ ಎಂದು ಮಾತು ಮುಗಿಸುತ್ತಾರೆ ದಿಶಾ.
