ಜಿಮ್​ನಲ್ಲಿ ಪರಿಚಯವಾದ ವ್ಯಕ್ತಿ ನಂಬಿ 4.4 ಕೋಟಿ ರೂ. ಕಳಕೊಂಡ ಖ್ಯಾತ ನಟಿ!

ತಂತ್ರಜ್ಞಾನ ಹೇಗ್ಹೇಗೆ ಮುಂದುವರೆಯುತ್ತಿದೆಯೋ, ಹಾಗೆಯೇ ಆ ತಂತ್ರಜ್ಞಾನವನ್ನು ಬಳಸಿ ಮೋಸ ಮಾಡುವವರ ಸಂಖ್ಯೆಯೂ ಸಿಕ್ಕಾಪಟ್ಟೆ ಹೆಚ್ಚಾಗುತ್ತಿದೆ. ಜನ ಸಾಮಾನ್ಯರು ಎಷ್ಟೇ ಎಚ್ಚರಿಕೆಯಿಂದ ಇದ್ದರೂ ಆನ್​ಲೈನ್ ಹಾಗೂ ಆಫ್​ಲೈನ್ ಮೋಸಗಳು ಆಗುತ್ತಲೇ ಇದ್ದಾವೆ. ಇದೀಗ, ಖ್ಯಾತ ನಟಿಯೊಬ್ಬರೂ ಈ ರೀತಿ ಮೋಸ ಹೋಗಿದ್ದಾರೆ ಎಂದರೇ ನೀವು ನಂಬಲೇ ಬೇಕು. ಹೌದು, ಶೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತೀರಿ ಎಂದಾದರೆ ಅದಕ್ಕೆ ಸಾಕಷ್ಟು ಅಧ್ಯಯನ ಬೇಕು. ಆದರೆ, ಅನೇಕರು ಒಂದೇ ಬಾರಿಗೆ ಹೆಚ್ಚು ಲಾಭ ಬರುತ್ತದೆ ಎಂಬ ಆಸೆಯಿಂದ ಹಲವು ಬಾರಿ ಮೋಸ ಹೋಗುತ್ತಾರೆ.

ಈಗ, ಇದೇ ರೀತಿಯ ಆಸೆಗೆ ಬಿದ್ದ ಬಾಲಿವುಡ್ ಹಾಗೂ ಖ್ಯಾತ ನಟಿ ರಿಮಿ ಸೇನ್ ಬರೋಬ್ಬರಿ 4 ಕೋಟಿ 40 ಲಕ್ಷ ರೂಪಾಯಿಯನ್ನು ಕಳೆದುಕೊಂಡಿದ್ದಾರಂತೆ. ಅಂದಹಾಗೆ, ನಟಿಗೆ ರೋಣಕ್​ ಜಟಿನ್ ವ್ಯಾಸ್ ಎಂಬ ​ಗುರಗಾಂವ್ ಮೂಲದ ವ್ಯಕ್ತಿ ಪರಿಚಯ ಆಗಿದ್ದ. ಆತನೇ ಮೋಸ ಮಾಡಿ ಹೋಗಿದ್ದಾನೆ ಎನ್ನಲಾಗಿದೆ. ಆತ ಎಲ್​ಇಡಿ ಬಲ್ಬ್​ಗಳ ವ್ಯವಹಾರ ಮಾಡುವುದಾಗಿ ನಟಿಗೆ ಹೇಳಿಕೊಂಡಿದ್ದನಂತೆ. ಅಲ್ಲದೆ, ಆ ಉದ್ಯಮದ ಮೇಲೆ ದೊಡ್ಡ ಮೊತ್ತದ ಹೂಡಿಕೆ ಮಾಡಿದರೆ ಶೇ.40 ಲಾಭ ತೆಗೆದುಕೊಡುವುದಾಗಿ ನಟಿಗೆ ನಂಬಿಸಿದ್ದಾನೆ.

ಶೇ.40 ಲಾಭ ಎಂದ ತಕ್ಷಣ ಆಸೆಗೆ ಬಿದ್ದ ನಟಿ ರಿಮಿ ಅವರು ಕಣ್ಮುಚ್ಚಿಕೊಂಡು 4.4 ಕೋಟಿ ರೂಪಾಯಿ ವ್ಯವಹಾರದಲ್ಲಿ ಹೂಡಿಕೆ ಮಾಡಿದ್ದಾರೆ. ಆ ಬಳಿಕ ಆತ ನಾಪತ್ತೆ ಆಗಿದ್ದಾನೆ. ''2019 ರಲ್ಲಿ ಜಿಮ್​ನಲ್ಲಿ ರೋಣಕ್ ನನಗೆ ಪರಿಚಯ ಆಗಿದ್ದ. ನಂತರ ನಾವಿಬ್ಬರೂ ಗೆಳೆಯರಾದೆವು. 4.4 ಕೋಟಿ ರೂಪಾಯಿ ಹಣವನ್ನು ನನ್ನಿಂದ ತೆಗೆದುಕೊಂಡ. ಲಾಭದ ಜತೆಗೆ ಹಣ ಹಿಂದಿರುಗಿಸಲು ಒಂದು ಗಡುವು ನೀಡಿದ್ದ. ಆದರೆ, ಈಗ ಹಣವೂ ಇಲ್ಲ, ಆತ ನನ್ನ ಕರೆಯನ್ನೂ ಸ್ವೀಕರಿಸುತ್ತಿಲ್ಲ'', ಎಂದು ನಟಿ ರಿಮಿ ಹೇಳಿದ್ದಾರೆ.‘

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬುಧವಾರದಂದು ಮುಂಬೈ ಪೊಲೀಸರು ದೂರು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ತನಿಖೆಯಲ್ಲಿ ರೋಣಕ್ ಯಾವುದೇ ಉದ್ಯಮ ಹೊಂದಿರಲಿಲ್ಲ. ನಟಿಯಿಂದ ಹಣ ಕೀಳುವುದೊಂದೇ ಆತನ ಉದ್ದೇಶ ಆಗಿತ್ತು ಎಂದು ತಿಳಿದುಬಂದಿದೆ. ‘ಧೂಮ್’, ‘ಧೂಮ್ 2’ ಹಿಂದಿ ಚಿತ್ರಗಳಲ್ಲಿ ಸ್ವೀಟಿ ದೀಕ್ಷಿತ್ ಪಾತ್ರದಲ್ಲಿ ಬಹಳಷ್ಟು ಖ್ಯಾತಿ ಗಳಿಸಿದ ನಟಿ, ಹಲವು ತೆಲುಗು ಮತ್ತು ತಮಿಳು ಚಿತ್ರಗಳಲ್ಲಿ ಕೂಡಾ ತೆರೆ ಮೇಲೆ ಮಿಂಚಿದ್ದಾರೆ. ನಂತರ, ಹಿಂದಿ ಬಿಗ್​ ಬಾಸ್ 9 ರ ಸ್ಪರ್ಧಿಯಾಗಿ ಅಭಿಮಾನಿಗಳಿಗೆ ಕಾಣಿಸಿಕೊಂಡ ನಟಿ ಮತ್ತೆ ಎಲ್ಲೂ ಕಂಡುಬಂದಿಲ್ಲ. 

https://www.vijayavani.net/samantha-looks-super-hot-in-a-colourful-bralette/

https://www.vijayavani.net/kgf-chapter-2-team-pictures-from-delhi-goes-viral-on-social-media/

https://www.vijayavani.net/salman-khan-to-release-hindi-vikrant-rona-teaser-of-kichcha-sudeep-on-ugadi/