ಹಿಜಾಬ್ ವಿವಾದ ಕುರಿತು ದಂಗಲ್ ಹುಡುಗಿ ಜೈರಾ ವಾಸಿಮ್ ಹೇಳಿದ್ದು ಹೀಗೆ...

Published on:

20 Feb 2022, 4:15 am

ನವದೆಹಲಿ: ಕರ್ನಾಟಕದಲ್ಲಿ ಮುಂದುವರಿದಿರುವ ಹಿಜಾಬ್ ವಿವಾದ ಕುರಿತು ರಾಜಕೀಯ ನಾಯಕರು ಸೇರಿದಂತೆ ಅನೇಕ ಸೆಲೆಬ್ರಿಟಿಗಳು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಇದೀಗ ಆ ಸಾಲಿಗೆ ಆಮೀರ್ ಖಾನ್ ನಟನೆಯ ಸೂಪರ್ ಹಿಟ್ "ದಂಗಲ್" ಸಿನಿಮಾದಲ್ಲಿ ನಟಿಸಿದ್ದ ರಾಷ್ಟ್ರೀಯ ಪ್ರಶಸ್ತಿ ವಿಜೇತ ನಟಿ ಜೈರಾ ವಾಸಿಮ್ ಕೂಡ ಸೇರಿದ್ದಾರೆ.

ಇನ್ಸ್ಟಾಗ್ರಾಂನಲ್ಲಿ ಸುದೀರ್ಘ ಪೋಸ್ಟ್ ಮಾಡಿರುವ ಜೈರಾ, ಕರ್ನಾಟಕದ ಶಾಲೆ ಮತ್ತು ಕಾಲೇಜುಗಳಲ್ಲಿ ಹಿಜಾಬ್ ಬ್ಯಾನ್ ಮಾಡಿರುವುದನ್ನು ಖಂಡಿಸಿದ್ದಾರೆ. ಹಿಜಾಬ್ ಆಯ್ಕೆಯಲ್ಲ, ಅದು ಇಸ್ಲಾಂನ ಒಂದು ಬಾಧ್ಯತೆ ಎಂದು ಹೇಳಿದ್ದಾರೆ. ನಾನು ಕೃತಜ್ಞತೆ ಮತ್ತು ನಮ್ರತೆಯಿಂದ ಹಿಜಾಬ್ ಧರಿಸಿರುವ ಓರ್ವ ಮಹಿಳೆಯಾಗಿ, ಕೇವಲ ಧಾರ್ಮಿಕ ಬದ್ಧತೆಯನ್ನು ನಿರ್ವಹಿಸುವ ಮಹಿಳೆಯರನ್ನು ಬೀದಿಯಲ್ಲಿ ನಿಲ್ಲಿಸಿ ಕಿರುಕುಳ ನೀಡುತ್ತಿರುವ ಈ ಸಂಪೂರ್ಣ ವ್ಯವಸ್ಥೆಯನ್ನು ವಿರೋಧಿಸುತ್ತೇನೆ ಎಂದಿದ್ದಾರೆ.

ಹಿಜಾಬ್ ಒಂದು ಆಯ್ಕೆಯಷ್ಟೇ ಎಂಬ ಕಲ್ಪನೆಯೇ ಅಪ್ರಬುದ್ಧವಾಗಿದೆ. ಹಿಜಾಬ್ ಒಂದು ಆಯ್ಕೆಯಲ್ಲ ಬದಲಾಗಿ ಇಸ್ಲಾಂನ ಒಂದು ಕರ್ತವ್ಯ. ಓರ್ವ ಮಹಿಳೆ ಹಿಜಾಬ್ ಧರಿಸಿದ್ದಾಳೆ ಅಂದರೆ ಆಕೆ ಪ್ರೀತಿಸುವ ಮತ್ತು ತನ್ನನ್ನು ಅರ್ಪಿಸಿಕೊಂಡ ದೇವರ ಕರ್ತವ್ಯವನ್ನು ಖುಷಿಯಿಂದಲೇ ನೆರವೇರಿಸುತ್ತಿರುತ್ತಾಳೆ ಎಂದರ್ಥ. ಆದರೆ, ಹಿಜಾಬ್ ಹೆಸರಿನಲ್ಲಿ ಹೆಣ್ಣು ಮಕ್ಕಳಿಗೆ ಈ ರೀತಿ ಕಿರುಕುಳ ನೀಡುತ್ತಿರುವುದನ್ನು ಓರ್ವ ಹಿಜಾಬ್ ಧರಿಸುವ ಮಹಿಳೆಯಾಗಿ ಖಂಡಿಸುತ್ತೇನೆ ಎಂದಿದ್ದಾರೆ.

ಮುಸ್ಲಿಂ ಮಹಿಳೆಯರನ್ನು ಶಿಕ್ಷಣ ಮತ್ತು ಹಿಜಾಬ್ ಎರಡರಲ್ಲಿ ಒಂದನ್ನು ಆಯ್ಕೆ ಮಾಡಿ ಅಂತಾ ಹೇಳುವುದು ಅನ್ಯಾಯವಾಗಿದೆ. ಇದೊಂದು ಪಕ್ಷಪಾತದ ನಿಲುವಾಗಿದೆ. ಮಹಿಳೆಯ ಸಬಲೀಕರಣದ ಹೆಸರಿನಲ್ಲಿ ಹಿಜಾಬ್ ಕಳಚುವಂತೆ ಮಾಡುತ್ತಿರುವುದು ದುಃಖಕರವಾಗಿದೆ ಎಂದು ಜೈರಾ ಅಸಮಾಧಾನವನ್ನು ಹೊರಹಾಕಿದ್ದಾರೆ. (ಏಜೆನ್ಸೀಸ್)