ಧಾರಾವಾಹಿ ತಂಡದವರ ಜತೆಗೆ ಮನಸ್ತಾಪವೇನಾದರೂ ಇತ್ತ ಎಂಬ ಪ್ರಶ್ನೆಗೆ, ‘ಪ್ರತಿ ಮನೆಯಲ್ಲೂ ಇವೆಲ್ಲಾ ಸಾಮಾನ್ಯ. ಮನಸ್ತಾಪ ಹೇಗೆ ಸಹಜವೋ, ಪ್ರೀತಿ ಸಹ ಅಷ್ಟೇ ಸಹಜ. ಅದನ್ನು ನಾವು ಬೀದಿಗೆ ತರುವುದಿಲ್ಲ. ಏನಾಗಿದೆ ಎಂದು ನನಗೆ ಗೊತ್ತಿಲ್ಲ. ನಕಾರಾತ್ಮಕವಾದ ಮಾತುಗಳು ನಮ್ಮ ನಿರ್ದೇಶಕ ಜಗದೀಶ್ ಅಥವಾ ಚಾನಲ್ ಕಡೆಯಿಂದ ಬಂದರೆ ಅಥವಾ ನನ್ನ ಮೇಲೆ ನೇರವಾಗಿ ಆರೋಪಗಳನ್ನು ಮಾಡಿದರೆ, ಆಗ ನಾನು ಸ್ಪಷ್ಟೀಕರಣ ಕೊಡುತ್ತೇನೆ. ಪತ್ರಿಕಾಗೋಷ್ಠಿ ಕರೆದು ವಿವರವಾಗಿ ಮಾತನಾಡುತ್ತೇನೆ. ಆದರೆ, ಎಲ್ಲೋ ಒಂದು ಕಡೆ ಸುದ್ದಿ ಓದಿ ನಾನು ಪ್ರತಿಕ್ರಿಯಿಸಲಾರೆ. ಏಕೆಂದರೆ, ಅದರಿಂದ ನಾನು ಅವರ ಮೇಲೆ ತಪ್ಪು ಆರೋಪ ಹೊರಿಸಿದಂತೆ ಆಗುತ್ತದೆ. ಅವರು ಹಲವು ವರ್ಷಗಳಿಂದ ನನಗೆ ಗೊತ್ತು. ನನಗೆ ಹೇಳದೆಯೇ ಅವರು ತೀರ್ಮಾನ ತೆಗೆದುಕೊಂಡಿದ್ದಾರೆ ಎಂದು ಹೇಗೆ ಹೇಳಲಿ? ಏನಾದರೂ ಇದ್ದರೆ ಅವರು ಈ ವಿಷಯವಾಗಿ ಮಾತನಾಡುತ್ತಾರೆ. ಮಾತನಾಡಿದರೆ, ಆಗ ಸ್ಪಷ್ಟನೆ ನೀಡಲೇಬೇಕಾದ ಪರಿಸ್ಥಿತಿ ಬರುತ್ತದೆ. ಆಗ ಖಂಡಿತವಾಗಿಯೂ ನಾನು ಸ್ಪಷ್ಟನೆ ನೀಡುತ್ತೇನೆ’ ಎಂಬ ಪ್ರತಿಕ್ರಿಯೆ ಅನಿರುದ್ಧ ಅವರಿಂದ ಬರುತ್ತದೆ. ‘ಜೊತೆಜೊತೆಯಲಿ’ ಧಾರಾವಾಹಿಯಲ್ಲಿ ಅನಿರುದ್ಧ ಅವರು ಆರ್ಯವರ್ಧನ ಎಂಬ ಪಾತ್ರ ಮಾಡುತ್ತಿದ್ದು, ಈ ಧಾರಾವಾಹಿ ಕಳೆದ ಕೆಲವು ವರ್ಷಗಳಿಂದ ಸಾಕಷ್ಟು ಜನಪ್ರಿಯವಾಗಿದೆ.
