ಬೆಂಗಳೂರು: ಲೈಟ್ಸ್, ಕ್ಯಾಮೆರಾಗಳು ಆಫ್ ಆಗಿ ಮೂಲೆ ಸೇರಿದ್ದವು. ಚಿತ್ರರಂಗದ ಮಂದಿ, ಆಕ್ಷನ್ ಎಂಬ ಪದ ಕೇಳಿ ಅದೆಷ್ಟು ದಿನಗಳಾಗಿದ್ದವೋ ಗೊತ್ತಿಲ್ಲ. ಹೀಗೆ ಲಾಕ್ಡೌನ್ನಿಂದ ಮನೆಯಲ್ಲೇ ಲಾಕ್ಡೌನ್ ಆಗಿದ್ದ ಸಿನಿಮಾದವರಿಗೆ, ಚಿತ್ರೀಕರಣ ಮಾಡಿ ಎಂದು ಸರ್ಕಾರ ಅನುಮತಿ ನೀಡಿ ಒಂದು ತಿಂಗಳ ಮೇಲಾಗಿದೆ. ಆದರೂ ಕರೊನಾ ಹಾವಳಿಯಿಂದಾಗಿ ಬಹಳಷ್ಟು ಜನ ಚಿತ್ರೀಕರಣ ಮುಂದೆ ಬರುತ್ತಿಲ್ಲ. ಒಂದು ದೊಡ್ಡ ಚಿತ್ರದ ತಂಡದವರು ಧೈರ್ಯದಿಂದ ಮುಂದೆ ಬಂದು, ಕೆಲಸ ಪ್ರಾರಂಭಿಸಿದರೆ ಬೇರೆಯವರು ಸಹ ಶುರು ಮಾಡಬಹುದು ಎಂದು ಚಿತ್ರರಂಗ ಕಾಯುತ್ತಿದ್ದರೂ, ಬೆಕ್ಕಿಗೆ ಗಂಟೆ ಕಟ್ಟುವವರು ಯಾರು ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕಿರಲಿಲ್ಲ. ಇದೀಗ ಸುದೀಪ್, ‘ಫ್ಯಾಂಟಮ್ ಚಿತ್ರದ ಚಿತ್ರೀಕರಣದಲ್ಲಿ ಭಾಗವಹಿಸುವ ಮೂಲಕ ಉತ್ತರ ಕೊಟ್ಟಿದ್ದಾರೆ.
