ಅಶ್ಲೀಲ ವಿಡಿಯೋ ಶೂಟ್​ ಮಾಡಿ ಕಾಲೇಜಿನಿಂದ ಬ್ಯಾನ್​ ಆದವಳು ನಟಿ ರೇವತಿ! ಆಕೆಯ ಆರೋಪ ಸುಳ್ಳು

ತಿರುವನಂತಪುರಂ: ಕೇರಳದಲ್ಲಿ ಹೇಮಾ ಸಮಿತಿಯ ವರದಿ ಬಿಡುಗಡೆಯಾದ ಬೆನ್ನಲ್ಲೇ ಮಲಯಾಳಂ ಚಿತ್ರರಂಗದ ಕರಾಳ ಮುಖ ಒಂದೊಂದಾಗಿ ಕಳಚಿಕೊಳ್ಳತ್ತಿದೆ. ಅನೇಕ ನಟಿಯರು ತಾವು ಎದುರಿಸಿದ ಕಹಿ ಘಟನೆಗಳನ್ನು ಮಾಧ್ಯಮಗಳ ಮುಂದೆ ಬಹಿರಂಗಪಡಿಸುತ್ತಿದ್ದು, ಆರೋಪ-ಪ್ರತ್ಯಾರೋಪಗಳ ಸರಣಿ ಮುಂದುವರಿದಿದೆ. ಇತ್ತೀಚೆಗಷ್ಟೇ ನಟಿ ರೇವತಿ ಸಂಪತ್, ನಟ ಸಿದ್ದಿಖ್​ ವಿರುದ್ಧ ಗಂಭೀರ ಆರೋಪ ಮಾಡಿದ್ದರು. ಇದೀಗ ರೇವತಿ ಆರೋಪಕ್ಕೆ ಮಲಯಾಳಂ ಬಿಗ್​ಬಾಸ್​ ವಿಜೇತ ಅಖಿಲ್​ ಮರಾರ್​ ತಿರುಗೇಟು ನೀಡಿದ್ದಾರೆ.

ಫೇಸ್​ಬುಕ್​​ ಲೈವ್​ನಲ್ಲಿ ಮಾತನಾಡಿರುವ ಅಖಿಲ್​, ಇಂತಹ ಆರೋಪಗಳಿಗೆ ಗುರಿಯಾಗುವ ಪುರುಷನಿಗೂ ಒಂದು ಕುಟುಂಬ ಮತ್ತು ಜೀವನವಿದೆ ಎಂಬುದನ್ನು ಕೆಲವರು ಅರ್ಥಮಾಡಿಕೊಳ್ಳಬೇಕು. ರೇವತಿ ಸಂಪತ್, ನಟ ಸಿದ್ದಿಕ್ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ ಮಾಡಿದ್ದಾರೆ. ಈ ಬಗ್ಗೆ ಹೆಚ್ಚಿನ ವಿವರ ತಿಳಿಯಲು ನಾನು ನಟ ಶಿಜು ಅವರಿಗೆ ಕರೆ ಮಾಡಿದೆ. ನಾನು ಅವರನ್ನು ಏಕೆ ಸಂಪರ್ಕಿಸಿದೆ ಎಂದು ನಿಮಗೆ ತಿಳಿದಿದೆ. 2021ರಲ್ಲೇ ಇದೇ ರೇವತಿ ಸಂಪತ್, ಶಿಜು ವಿರುದ್ಧ ಆರೋಪಗಳನ್ನು ಮಾಡಿದ್ದರು. ಈ ಎಲ್ಲದರ ಹಿಂದಿನ ಸತ್ಯವನ್ನು ನಾನು ತಿಳಿದುಕೊಳ್ಳಲು ಬಯಸುತ್ತೇನೆ.

ಮಾಧ್ಯಮಗಳು ಇಂತಹ ಸುದ್ದಿಗಳನ್ನು ಹೊರ ತಂದಾಗ ಕೇರಳದ 99% ಜನರು ಮಹಿಳೆಯ ಮೇಲೆ ಪುರುಷನಿಂದಲೇ ಲೈಂಗಿಕ ದೌರ್ಜನ್ಯ ಆಗಿದೆ ಎಂದು ನಂಬುತ್ತಾರೆ. ಇಂತಹ ಕೆಟ್ಟ ಹೆಡ್​ಲೈನ್​ಗಳನ್ನು ಹಾಕಿ, ಜೀವನವನ್ನು ಹಾಳುಮಾಡುವ ಬದಲು ವಾಸ್ತವವನ್ನು ಅರಿತು ವರದಿ ಮಾಡಬೇಕೆಂದು ಮಾಧ್ಯಮಗಳಲ್ಲಿ ನಾನು ವಿನಂತಿಸಿಕೊಳ್ಳುತ್ತೇನೆ. 2021ರಲ್ಲಿ ರೇವತಿ ತನ್ನ ಮೇಲೆ ದೌರ್ಜನ್ಯ ನಡೆಸಿದ್ದಾರೆ ಎಂದು ಆರೋಪಿಸಿ 14 ಜನರ ಹೆಸರನ್ನು ಪಟ್ಟಿ ಮಾಡಿದ್ದಳು. ಇದಾದ ಬಳಿಕ ಮೂರು ದಿನಗಳವರೆಗೆ ಆಕೆ ಯಾರ ಬಗ್ಗೆಯೂ ಈ ವಿಷಯದ ಬಗ್ಗೆ ಮಾತನಾಡಲಿಲ್ಲ. ಸುಮ್ಮನೇ ಆರೋಪ ಮಾಡಿ ಸುಮ್ಮನಾದಳು. ಆದರೆ, ಆ ಮೂರು ದಿನಗಳಲ್ಲಿ ಅನೇಕ ಘಟನೆಗಳು ಸಂಭವಿಸಿದವು. 14 ಮಂದಿಯಲ್ಲಿ ಒಬ್ಬರ ಪತ್ನಿ ಆತ್ಮಹತ್ಯೆಗೆ ಯತ್ನಿಸಿದರು. ಶಿಜು ಕೂಡ ತನ್ನ ಕುಟುಂಬದೊಳಗೆ ಹಿಂಸೆಯ ದಿನಗಳನ್ನು ಅನುಭವಿಸಬೇಕಾಯಿತು. ಮೂರು ದಿನಗಳ ನಂತರ ಆಕೆ ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ನಡೆದಿಲ್ಲ ಎಂದು ಸ್ಪಷ್ಟನೆ ನೀಡಿದಳು. ಆದರೆ, ಅಷ್ಟರಲ್ಲಾಗಲೇ ಕೆಲವರಿಗೆ ಹಾನಿಯಾಗಿತ್ತು.

ಭುವನೇಶ್ವರದಲ್ಲಿ ಸಣ್ಣ ಸಿನಿಮಾವೊಂದರ ಚಿತ್ರೀಕರಣ ನಡೆಯುತ್ತಿತ್ತು. ಈ ಚಿತ್ರದ ನಿರ್ದೇಶಕ ರಾಜೇಶ್ ಟಚ್ರಿವರ್, ಹಿಂದಿ ನಟ ಕುಲಕರ್ಣಿ ಅವರಿಗೆ ಮಾತ್ರ ತಂಗಲು ಹೋಟೆಲ್ ಒಂದನ್ನು ಮಾಡಿಕೊಟ್ಟಿದ್ದರು. ಇದೇ ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ ನಟಿಸಲು ಬಂದಿದ್ದ ರೇವತಿ, ತನಗೂ ವಾಸ್ತವ್ಯಕ್ಕೆ ತ್ರಿಸ್ಟಾರ್ ಹೋಟೆಲ್ ಬೇಕು ಎಂದು ಪಟ್ಟು ಹಿಡಿದಿದ್ದಳು. ಶಿಜು ಅವರು ಹಿರಿಯ ನಟರಾಗಿದ್ದರಿಂದ ಈ ವಿಷಯ ಗೊತ್ತಾಗಿ ರೇವತಿ ವಿರುದ್ಧ ಮಾತನಾಡಿದ್ದರು. ಆದರೆ, ರೇವತಿ ಕೂಡ ಸಾರ್ವಜನಿಕವಾಗಿ ಶಿಜು ಅವರ ವಿರುದ್ಧ ಹರಿಹಾಯ್ದಳು. ಹೀಗೆ ಇಬ್ಬರ ನಡುವೆ ವಾಗ್ವಾದ ನಡೆದಿತ್ತು. ಈ ವೇಳೆ ಶಿಜು, ರೇವತಿಗೆ 'ಗೆಟ್ ಔಟ್' ಎಂದು ಕೂಗಿದರು. ಈ ಒಂದು ಘಟನೆಯೇ ‘ಲೈಂಗಿಕ ದೌರ್ಜನ್ಯ’ ಆರೋಪಕ್ಕೆ ಕಾರಣವಾಗಿತ್ತು ಎಂದು ಅಖಿಲ್​ ಹೇಳಿದ್ದಾರೆ.

ನಿರ್ದೇಶಕ ರಾಜೇಶ್ ಟಚ್ರಿವರ್ ಕೋಪಗೊಂಡಾಗ ಅಶ್ಲೀಲ ಪದಗಳನ್ನು ಬಳಸುವುದರಲ್ಲಿ ಹೆಸರುವಾಸಿಯಾಗಿದ್ದಾರೆ. ಹಾಗಾಗಿ ರೇವತಿ ಅವರ ಪಟ್ಟಿಗೆ ಅವರು ಬಂದರೂ ಆಶ್ಚರ್ಯವಿಲ್ಲ. ಒಂದು ದಿನ ಶಿಜು ಸೆಟ್‌ನಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ, ರೇವತಿ ಅಳುತ್ತಿರುವುದನ್ನು ಕಂಡರು. ಈ ವೇಳೆ ಅವರು ಪ್ರತಿಕ್ರಿಯಿಸಲಿಲ್ಲ. ಅದು ಕೂಡ ಅವರ ಎರಡನೇ ಅಪರಾಧವಾಗಿತ್ತು. ಹೀಗಾಗಿ ಮಾಧ್ಯಮಗಳು ಆರೋಪಗಳ ಬಗ್ಗೆ ಮೊದಲು ಸತ್ಯಾಸತ್ಯತೆಗಳನ್ನು ಪರಿಶೀಲಿಸಬೇಕು. ಕನಿಷ್ಠಪಕ್ಷ ಎರಡೂ ಕಡೆ ಏನು ನಡೆದಿದೆ ಎಂಬುದನ್ನು ಜನರಿಗೆ ತಿಳಿಸುವ ನೈತಿಕತೆಯನ್ನು ಹೊಂದಿರಬೇಕು. ಈ ರೇವತಿ ಸಂಪತ್​ ಚೀನಾದಲ್ಲಿ ಎಂಬಿಬಿಎಸ್ ಓದುತ್ತಿದ್ದಾಗ ತನ್ನ ಸಹಪಾಠಿಯ ನಗ್ನ ವಿಡಿಯೋ ಚಿತ್ರೀಕರಿಸಿದ್ದಕ್ಕಾಗಿ ಕಾಲೇಜಿನಿಂದ ಹೊರಹಾಕಲಾಯಿತು. ಇಂಥವರು ಮಾಡುವ ಲೈಂಗಿಕ ದೌರ್ಜನ್ಯ ಆರೋಪದಲ್ಲಿ ಯಾವುದೇ ಹುರುಳಿಲ್ಲ ಎಂದು ಅಖಿಲ್​ ತಿಳಿಸಿದ್ದಾರೆ.

ಕಾನೂನು ತನ್ನ ದಾರಿ ಹಿಡಿಯಲಿ. ದೂರನ್ನು ಸ್ವೀಕರಿಸಲು ಸರಕಾರವೂ ಸಿದ್ಧವಾಗಬೇಕು ಮತ್ತು ಮಾಧ್ಯಮಗಳು ತಮ್ಮ ಕರ್ತವ್ಯವನ್ನು ಮರೆಯಬಾರದು. ಪುರುಷರು ಕೂಡ ಮನುಷ್ಯರೇ ಅಲ್ಲವೇ ಎಂದು ಅಖಿಲ್​ ಹೇಳಿದ್ದಾರೆ.

ಏನಿದು ಹೇಮಾ ಸಮಿತಿ ವರದಿ?

ಮಲಯಾಳಂ ಚಿತ್ರರಂಗದ ಖ್ಯಾತ ನಟಿಯ ಮೇಲೆ 2017ರಲ್ಲಿ ನಡೆದ ಲೈಂಗಿಕ ದೌರ್ಜನ್ಯ ರಾಷ್ಟ್ರವ್ಯಾಪಿ ಭಾರಿ ಆಕ್ರೋಶಕ್ಕೆ ಕಾರಣವಾಯಿತು. ಇಂದಿಗೂ ಈ ಪ್ರಕರಣದ ವಿಚಾರಣೆ ನಡೆಯುತ್ತಲೇ ಇದೆ. ಈ ಪ್ರಕರಣ ಬೆನ್ನಲ್ಲೇ ನ್ಯಾಯಾಮೂರ್ತಿ ಕೆ. ಹೇಮಾ (ನಿವೃತ್ತ) ಅವರ ನೇತೃತ್ವದಲ್ಲಿ ಮಾಜಿ ಅಧಿಕಾರಿ ಕೆಬಿ ವಲ್ಸಲಕುಮಾರಿ ಮತ್ತು ಹಿರಿಯ ನಟಿ ಶಾರದಾ ಅವರನ್ನೊಳಗೊಂಡ ತ್ರಿಸದಸ್ಯ ಸಮಿತಿಯನ್ನು ಕೇರಳ ಸರ್ಕಾರ ರಚನೆ ಮಾಡಿತ್ತು. ಈ ಸಮಿತಿ 2019ರ ಡಿಸೆಂಬರ್​ನಲ್ಲಿ ಸರ್ಕಾರಕ್ಕೆ ವರದಿ ಸಲ್ಲಿಸಿತ್ತು. ನಾಲ್ಕೂವರೆ ವರ್ಷಗಳ ಬಳಿಕ ವರದಿಯನ್ನು ಸಾರ್ವಜನಿಕವಾಗಿ ಬಹಿರಂಗಗೊಳಿಸಿದ್ದು, ಮಲಯಾಳಂ ಚಿತ್ರರಂಗದ ಕರಾಳ ಮುಖ ಅನಾವರಣವಾಗಿದೆ. ಮಲಯಾಳಂ ಸಿನಿರಂಗದ ಒಂದೊಂದೆ ಕರಾಳ ಮುಖವಾಡ ಕಳಚಿ ಬೀಳುತ್ತಿದೆ. ಸಿನಿಮಾದಲ್ಲಿ ಮಾತ್ರವಲ್ಲದೆ ಎಲ್ಲ ಕ್ಷೇತ್ರಗಳಲ್ಲೂ ಲೈಂಗಿಕ ಶೋಷಣೆ ನಡೆಯುತ್ತಿದೆ. ಆದರೆ, ಸಿನಿಮಾರಂಗದಲ್ಲಿ ವ್ಯಾಪಕವಾಗಿದೆ ಎನ್ನುತ್ತಾರೆ ನೊಂದ ಮಹಿಳೆಯರು. ಸಿನಿಮಾದಲ್ಲಿ ಅವಕಾಶ ಬೇಕಾದರೆ ಕಾಮತೃಷೆ ತೀರಿಸಬೇಕು ಎನ್ನುತ್ತಾರೆ ನೊಂದ ಕಲಾವಿದೆಯರು. (ಏಜೆನ್ಸೀಸ್​)

https://www.vijayavani.net/darshan-fans-have-not-helped-raghavendras-wife-who-is-in-jail-with-darshan

https://www.vijayavani.net/telegram-ban-in-india-if-the-allegations-are-true-telegram-will-be-banned-in-india