ಮುಂಬೈ: ಸೆಲೆಬ್ರಿಟಿಗಳ ಸಣ್ಣಪುಟ್ಟ ಮಾತುಗಳು ಕೂಡ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ವಿವಾದವಾಗಿ ಬದಲಾಗುತ್ತವೆ ಎಂಬುದಕ್ಕೆ ಮತ್ತೊಂದು ಉದಾಹರಣೆ ಇಲ್ಲಿದೆ. ಜನಪ್ರಿಯ ಚಾಟ್ ಶೋ ಒಂದರಲ್ಲಿ ಮಲಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಅವರ ಅಧಿಕೃತ ಬಿರುದಿನ ಬಗ್ಗೆ ಸ್ಟಾರ್ ತಾರಾ ದಂಪತಿ ವಿಜಯ್ ದೇವರಕೊಂಡ ಹಾಗೂ ರಶ್ಮಿಕಾ ಮಂದಣ್ಣ ನೀಡಿದ ಪ್ರತಿಕ್ರಿಯೆ ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದ್ದು, ಮೋಹನ್‌ಲಾಲ್ ಅಭಿಮಾನಿಗಳು ( Mohanlal Fans ) ಇಬ್ಬರ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ಹೊರಹಾಕುತ್ತಿದ್ದಾರೆ.
ಇತ್ತೀಚೆಗೆ ನಡೆದ ಕರಣ್ ಜೋಹರ್ ನಿರೂಪಣೆಯ ಜನಪ್ರಿಯ ಟಾಕ್ ಶೋ 'ಕಾಫಿ ವಿತ್ ಕರಣ್' (Koffee with Karan) ಕಾರ್ಯಕ್ರಮದಲ್ಲಿ ವಿಜಯ್ ಮತ್ತು ರಶ್ಮಿಕಾ ಭಾಗವಹಿಸಿದ್ದರು. ಈ ವೇಳೆ ದಕ್ಷಿಣ ಭಾರತದ ನಟರ ಬಿರುದುಗಳ ಕುರಿತು ಕ್ವಿಜ್ ಏರ್ಪಡಿಸಲಾಗಿತ್ತು. ಅಲ್ಲು ಅರ್ಜುನ್ ಅವರ ಬಿರುದು 'ಐಕಾನ್ ಸ್ಟಾರ್' ಹಾಗೂ ಯಶ್ ಅವರ ಬಿರುದು 'ರಾಕಿಂಗ್ ಸ್ಟಾರ್' ಎಂದು ರಶ್ಮಿಕಾ ಮಂದಣ್ಣ ತಕ್ಷಣವೇ ಸರಿಯಾಗಿ ಉತ್ತರಿಸಿದರು. ಆದರೆ, ಕಾರ್ಯಕ್ರಮದ ಮುಂದುವರಿದ ಭಾಗವಾಗಿ ಕರಣ್ ಜೋಹರ್, ಭಾರತೀಯ ಚಿತ್ರರಂಗದ ದಿಗ್ಗಜ ನಟ ಮೋಹನ್ ಲಾಲ್ ಅವರ ಪ್ರಸಿದ್ಧ ಬಿರುದಾದ 'ದಿ ಕಂಪ್ಲೀಟ್ ಆಕ್ಟರ್' ಯಾರದ್ದು ಎಂದು ಪ್ರಶ್ನಿಸಿದರು.
