'ನನ್ನ ಪತಿ ಚಿರಂಜೀವಿ ಸರ್ಜಾ ನಮ್ಮನ್ನೆಲ್ಲ ಇದ್ದಕ್ಕಿದ್ದಂತೆ ಅಗಲಿ ಇನ್ನೂ ಮೂರು ತಿಂಗಳುಗಳೂ ಕಳೆದಿಲ್ಲ. ಇಡೀ ನಮ್ಮ ಸಂಸಾರ ಆ ದುಃಖದಿಂದ ಹೊರಬರುವ ಮೊದಲೇ ಆಧಾರರಹಿತವಾದ ಆರೋಪಗಳನ್ನು ನನ್ನ ದಿವಂಗತ ಪತಿಯ ಮೇಲೆ ಇಂದ್ರಜಿತ್ ಲಂಕೇಶ್ ಅವರು ಹೊರಿಸುತ್ತಿದ್ದಾರೆ. ನನ್ನ ದಿವಂಗತ ಪತಿಯ ಬಗ್ಗೆ, ಅವರ ಪ್ರಚೋದಿತ ಅಕಾಲಿಕ ಮರಣದ ಬಗೆಗಿನ ಅವಹೇಳನಕಾರಿ ಆಪಾದನೆಗಳಿಂದ ನನಗೆ ಮತ್ತು ನನ್ನ ಇಡೀ ಕುಟುಂಬದವರಿಗೆ ಮಾನಸಿಕವಾಗಿ ಅತೀವವಾದ ವೇದನೆ ಉಂಟಾಗಿದೆ. ಗರ್ಭವತಿಯಾಗಿರುವ ನನ್ನನ್ನು ಈ ರೀತಿ ಮಾನಸಿಕ ತೊಳಲಾಟಕ್ಕೆ ತಳ್ಳುವುದು ಅತೀವವಾದ ಅಮಾನವೀಯ ಕೃತ್ಯ. ವಾರ್ತಾ ದೃಶ್ಯ ಮಾಧ್ಯಮಗಳು ಯಾವುದೇ ರೀತಿಯ ಆಧಾರ ಹೊಂದಿರದೆ ಇದ್ದರೂ ಮಾದಕ ವಸ್ತುಗಳ ಸುದ್ದಿಗಳ ಜತೆಜತೆಗೆ ಚಿರಂಜೀವಿ ಸರ್ಜಾರ ಫೋಟೋಗಳನ್ನು ಬಳಸುತ್ತಿದ್ದಾರೆ. ಈ ರೀತಿಯಾದ ನಿರಾಧಾರವಾದ ಅವಹೇಳನಕಾರಿ ಸುದ್ದಿಗಳಿಂದ ನಮ್ಮನ್ನಗಲಿದ ಆತ್ಮವೊಂದರ ನೆನಪಿಗೂ ಮಸಿ ಬಳಿಯಲಾಗುತ್ತಿದೆ. ಇವೆಲ್ಲವರೂ ಇಂದ್ರಜಿತ್ ಲಂಕೇಶ್ ಅವರ ಬೇಜವಾಬ್ದಾರಿತನದಿಂದ ನಡೆದಿರುವುದು. ನನಗೆ ಮಾಧ್ಯಮಗಳ ಬಗ್ಗೆ ಅಪಾರ ಗೌರವ ಇದೆ. ಆದರೆ ಈ ಪ್ರಕರಣವನ್ನು ಅವರು ಪರಿಗಣಿಸಿದ ರೀತಿ ಮತ್ತು ನನ್ನ ದಿವಂಗತ ಪತಿ ಹೆಸರು, ಫೋಟೋವನ್ನು ಬಳಸಿಕೊಂಡ ರೀತಿ, ಒಂದಂಶದ ಆಧಾರ, ಮಾಹಿತಿಯನ್ನು ಹೊಂದದೆ ವರದಿ ಮಾಡುತ್ತಿರುವುದರಿಂದ ನಿರಾಶೆಯಾಗಿದೆ. ಇದನ್ನೂ ಓದಿ: ಡ್ರಗ್ ಮಾಫಿಯಾ ಮಟ್ಟ ಹಾಕಿ ; ತುಮಕೂರು ಜಿಲ್ಲಾಧಿಕಾರಿ ಕಚೇರಿ ಮುಂಭಾಗ ಎಬಿವಿಪಿ ಕಾರ್ಯಕರ್ತರ ಪ್ರತಿಭಟನೆ
