ಶಂಕರನ್​ ನಾಯರ್​ ಕುರಿತು ಕರಣ್​ ಜೋಹರ್​ ಬಯೋಪಿಕ್​ ನಿರ್ಮಾಣ

ಮುಂಬೈ: ನಿರ್ಮಾಪಕ-ನಿರ್ದೇಶಕ ಕರಣ್​ ಜೋಹರ್​ ಇದುವರೆಗೂ ಅದೆಷ್ಟೇ ಚಿತ್ರಗಳನ್ನು ಮಾಡಿದರೂ, ಬಯೋಪಿಕ್​ಗಳತ್ತ ಹೆಚ್ಚು ಗಮನಹರಿಸಿರಲಿಲ್ಲ. ಇದೀಗ ಅವರು, ಶಂಕರನ್​ ನಾಯರ್​ ಕುರಿತು ಒಂದು ಬಯೋಪಿಕ್​ ನಿರ್ಮಿಸುವುದಕ್ಕೆ ಮುಂದಾಗಿದ್ದಾರೆ. ಈ ಚಿತ್ರವನ್ನು ಕರಣ್​ ಜೋಹರ್​ ಅವರ ಧರ್ಮ ಪ್ರೊಡಕ್ಷನ್ಸ್​ ಮತ್ತು ಸ್ಟಿಲ್​ & ಸ್ಟಿಲ್​ ಮೀಡಿಯಾ ಜತೆಯಾಗಿ ನಿರ್ಮಿಸುತ್ತಿವೆ.

ಇದನ್ನೂ ಓದಿ: ಕನಸಿನ ಮನೆ ಕಟ್ಟಿಸುವುದಕ್ಕೆ ಧನುಷ್​ ಖರ್ಚು ಮಾಡುತ್ತಿರುವುದೆಷ್ಟು ಹೇಳಿ ನೋಡೋಣ?

ಎಲ್ಲ ಸರಿ, ಈ ಶಂಕರನ್​ ನಾಯರ್​ ಯಾರು ಎಂಬುದು ಬಹಳಷ್ಟು ಜನರಿಗೆ ಗೊತ್ತಿರಲಿಕ್ಕಿಲ್ಲ. ಜಲಯನ್​ವಾಲಾ ಬಾಗ್​ ಹತ್ಯಾಕಾಂಡ ವಿರುದ್ಧ ಸಮರ ಸಾರಿದ ವಕೀಲ ಅವರು. ಜಲಯನ್​ವಾಲಾ ಬಾಗ್​ನಲ್ಲಿ ಅಂದು ಏನೇನಾಯಿತು ಎಂದು ಎಳೆಎಳೆಯಾಗಿ ಬಿಡಿಸಿಟ್ಟು, ಬ್ರಿಟಿಷ್​ ಸಾಮ್ರಾಜ್ಯದ ವಿರುದ್ಧ ನ್ಯಾಯಾಲಯದಲ್ಲಿ ಹೋರಾಡಿ, ಸತ್ಯಾಂಶವನ್ನು ಬಿಚ್ಚಿಟ್ಟವರು ಅವರು. ನಾಯರ್​ ಅವರ ಸಾಹಸವು, ಸ್ವಾತಂತ್ರ್ಯ ಸಂಗ್ರಾಮಕ್ಕೆ ನಾಂದಿಯಾಯಿತು ಎಂದರೆ ತಪ್ಪಿಲ್ಲ.

ಈ ಚಿತ್ರವು ಇತಿಹಾಸದಲ್ಲಿನ ನೈಜ ಘಟನೆಗಳನ್ನಾಧರಿಸಿದ್ದು, 'ದಿ ಕೇಸ್​ ದಟ್​ ಶುಕ್​ ದಿ ಎಂಪೈರ್​' ಎಂಬ ಕೃತಿಯನ್ನಾಧರಿಸಿದೆ. ಶಂಕರನ್​ ನಾಯರ್​ ಅವರ ಮೊಮ್ಮಗ ರಘು ಮತ್ತು ಅವರ ಪತ್ನಿ ಪುಷ್ಪಾ ಪಾಲಟ್​ ಜತೆಯಾಗಿ ರಚಿಸಿರುವ ಈ ಪುಸ್ತಕದಿಂದ ಹಲವು ಘಟನೆಗಳನ್ನು ಆಧರಿಸಿ ಈ ಚಿತ್ರ ಮಾಡಲಾಗುತ್ತಿದೆ.

ಇದನ್ನೂ ಓದಿ: ಸಂಭ್ರಮಕ್ಕಿದು ಸಮಯವಲ್ಲ … ಹುಟ್ಟುಹಬ್ಬ ಆಚರಣೆ ಬೇಡವೆಂದ ಗಣೇಶ್​

ಈ ಕುರಿತು ಸೋಷಿಯಲ್​ ಮೀಡಿಯಾದಲ್ಲಿ ಪೋಸ್ಟ್​ ಹಾಕಿರುವ ಕರಣ್ ಜೋಹರ್​, 'ಶಂಕರನ್​​ ನಾಯರ್​ ಎಂಬ ಐತಿಹಾಸಿಕ ಪುರುಷನ ಕುರಿತಾದ ಕಥೆಯನ್ನು ತೆರೆಯ ಮೇಲೆ ತರುವುದಕ್ಕೆ ಹೆಮ್ಮೆ ಎಂದನಿಸುತ್ತಿದೆ. ಈ ಐತಿಹಾಸಿಕ ಚಿತ್ರವನ್ನು ಕರಣ್​ ತ್ಯಾಗಿ ನಿರ್ದೇಶಿಸಲಿದ್ದು, ಸಿದ್ಧತೆಗಳು ಪ್ರಾರಂಭವಾಗಿವೆ. ಈ ಕುರಿತು ಸದ್ಯದಲ್ಲೇ ಇನ್ನಷ್ಟು ಮಾಹಿತಿಗಳನ್ನು ಹಂಚಿಕೊಳ್ಳುತ್ತೇನೆ' ಎಂದು ಕರಣ್​ ಪೋಸ್ಟ್​ ಹಾಕಿದ್ದಾರೆ.

https://www.vijayavani.net/tapsee-says-heroes-were-scared-to-do-intimate-scenes-with-her/