ಕಂಗನಾ ರಣಾವತ್​ ಈ ಕೆಲಸಕ್ಕೂ ಇಳಿದೇ ಬಿಟ್ಟರು!

ಬಾಲಿವುಡ್​ನಲ್ಲಿ ಗಾಡ್​ಫಾದರ್​ ನೆರಳಿಲ್ಲದೆ ಬೆಳೆದು, ಸ್ಟಾರ್ ನಟಿಯಾಗಿ ಮೆರೆಯುತ್ತಿರುವ ಕಂಗನಾ ರಣಾವತ್​, ನಾಯಕಿ ಪ್ರಧಾನ ಸಿನಿಮಾಗಳ ಮೂಲಕವೇ ಗುರುತಿಸಿಕೊಂಡಿದ್ದಾರೆ. ನಿರ್ಮಾಣ, ಸಹ ನಿರ್ದೇಶನ ಸೇರಿ ಹಲವು ವಿಭಾಗಗಳಲ್ಲಿಯೂ ಕೆಲಸ ಮಾಡಿದ್ದಾರೆ. ಈಗಲೂ ಅದನ್ನು ಮುಂದುವರಿಸಿದ್ದಾರೆ. ಹೀಗಿರುವಾಗಲೇ ಈಗ ಇಲ್ಲಿಯವರೆಗೂ ಮಾಡದ ಸಾಹಸಕ್ಕೆ ಕಂಗನಾ ಕೈ ಹಾಕುತ್ತಿದ್ದಾರೆ. ಅದುವೇ ಸಿನಿಮಾ ನಿರ್ದೇಶನ!

ಇದನ್ನೂ ಓದಿ: ಈ ಮರ ಈಗಲೂ ಇರ್ಫಾನ್​ ಖಾನ್​ ನೆನಪಿನಲ್ಲಿಯೇ ಕಾಲ ಕಳೆಯುತ್ತಿದೆ!

‘ಮಣಿಕರ್ಣಿಕಾ; ದಿ ಕ್ವೀನ್​ ಆಫ್​ ಝಾನ್ಸಿ’ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸುವುದರ ಜತೆಗೆ ಸಹಾಯಕ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದರು. ಇದೀಗ ಇಡೀ ಚಿತ್ರದ ನಿರ್ದೇಶನದ ಜವಾಬ್ದಾರಿ ಹೊರಲು ತಯಾರಿ ನಡೆಸಿದ್ದಾರೆ. ಹಾಗಾದರೆ, ಯಾವುದಾ ಸಿನಿಮಾ? ‘ಅಪರಾಜಿತ ಅಯೋಧ್ಯೆ’. ಈ ಚಿತ್ರಕ್ಕೆ ನಿರ್ದೇಶನ ಮಾಡುವ ಇಂಗಿತ ವ್ಯಕ್ತಪಡಿಸಿದ್ದಾರೆ ಕಂಗನಾ.
‘ಬಾಹುಬಲಿ’ ಸಿನಿಮಾ ಖ್ಯಾತಿಯ ಕಥೆಗಾರ ಕೆವಿ ವಿಜಯೇಂದ್ರ ಪ್ರಸಾದ್​, ‘ಅಪರಾಜಿತ ಅಯೋಧ್ಯೆ’ ಚಿತ್ರಕ್ಕೂ ಕಥೆ ಒದಗಿಸಿದ್ದಾರೆ. ಅಯೋಧ್ಯೆ ರಾಮಮಂದಿರ ನಿರ್ಮಾಣದ ಹಿನ್ನೆಲೆ ಮತ್ತು ಅದರ ಬಗ್ಗೆ ಸೃಷ್ಟಿಯಾಗಿದ್ದ ವಿವಾದಗಳನ್ನಿಟ್ಟುಕೊಂಡು ಈ ಸಿನಿಮಾ ತಯಾರಾಗಲಿದ್ದು, ಈ ಚಿತ್ರದ ಮುಖ್ಯಭೂಮಿಕೆಯಲ್ಲಿ ಕಂಗನಾ ಕಾಣಿಸಿಕೊಳ್ಳಲಿದ್ದಾರೆ.

‘ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಈ ಸಿನಿಮಾ ನಿರ್ಮಾಣದ ಜವಾಬ್ದಾರಿಯನ್ನು ನಾನು ಹೊತ್ತು, ಬೇರೆಯವರಿಗೆ ನಿರ್ದೇಶನ ಮಾಡುವಂತೆ ನೀಡುವ ಪ್ಲ್ಯಾನ್​ ಇತ್ತು. ಆದರೆ, ಸ್ಕ್ರಿಪ್ಟ್​ ಆರಂಭದಿಂದಲೂ ನಾನು ತೊಡಗಿಸಿಕೊಂಡಿದ್ದರಿಂದ ನಾನೇ ಯಾಕೆ ನಿರ್ದೇಶನ ಮಾಡಬಾರದು ಅನಿಸಿತು. ಹಾಗಾಗಿ ನಿರ್ದೇಶನದ ಉಸ್ತುವಾರಿ ವಹಿಸಿಕೊಳ್ಳುವ ಆಲೋಚನೆಯಲ್ಲಿದ್ದೇನೆ’ ಎನ್ನುತ್ತಾರೆ ಕಂಗನಾ. ಸದ್ಯ ಲಾಕ್​ಡೌನ್​ ಹಿನ್ನೆಲೆಯಲ್ಲಿ ಶೂಟಿಂಗ್​ ಅನುಮತಿ ಇಲ್ಲದ ಕಾರಣ, ಪ್ರೀ ಪ್ರೊಡಕ್ಷನ್​ ಕೆಲಸಗಳಲ್ಲಿ ತಂಡ ನಿರತವಾಗಿದೆ. ಅನುಮತಿ ಸಿಗುತ್ತಿದ್ದಂತೆ, ಚಿತ್ರೀಕರಣ ಸಂಬಂಧಿ ಕೆಲಸಗಳು ಶುರುವಾಗಲಿವೆ. (ಏಜೆನ್ಸೀಸ್​)

https://www.vijayavani.net/bollywwod-actress-kgf-fame-mouni-roy-beach-photos/