ವಿಕ್ರಾಂತ್​ ರೋಣನ ಅಖಾಡದಲ್ಲಿ ಜಾಕ್​ಲೀನ್ ಹೆಜ್ಜೆ; ಶೂಟಿಂಗ್ ಮುಗಿಸಿ ಮುಂಬೈಗೆ ಹಾರಿದ ಲಂಕನ್ ಬೆಡಗಿ

ಬೆಂಗಳೂರು: ಬಹಳ ಸುದ್ದಿಯಲ್ಲಿದ್ದ ‘ವಿಕ್ರಾಂತ್ ರೋಣ’ ಚಿತ್ರದ ಹಾಡಿನ ಚಿತ್ರೀಕರಣ ಕೊನೆಗೂ ಮುಗಿದಿದೆ. ಚಿತ್ರೀಕರಣಕ್ಕೆಂದು ಬೆಂಗಳೂರಿಗೆ ಬಂದಿದ್ದ ಜಾಕ್​ಲೀನ್ ಫರ್ನಾಂಡಿಸ್, ತಮ್ಮ ಕೆಲಸ ಮುಗಿಸಿ ವಾಪಸ್ಸು ಮುಂಬೈ ಫ್ಲೈಟ್ ಹತ್ತಿದ್ದಾರೆ. ಅಲ್ಲಿಗೆ ಚಿತ್ರದ ಚಿತ್ರೀಕರಣ ಬಹುತೇಕ ಮುಗಿದಿದ್ದು, ಇನ್ನೊಂದು ದಿನದ ಪ್ಯಾಚ್​ವರ್ಕ್ ಕೆಲಸಗಳು ಮುಗಿದರೆ ಚಿತ್ರ ಸಂಪೂರ್ಣವಾದಂತೆ ಎಂಬ ಸಂದೇಶವೊಂದು ಚಿತ್ರತಂಡದಿಂದ ಬಂದಿದೆ. ಜಾಕ್​ಲೀನ್ ಅಭಿನಯದ ಒಂದು ಹಾಡನ್ನು ಆರು ದಿನಗಳ ಕಾಲ ಮೋಹನ್ ಬಿ ಕೆರೆ ಸ್ಟುಡಿಯೋದಲ್ಲಿ ಚಿತ್ರೀಕರಿಸಲಾಗಿದೆ. 300 ಡ್ಯಾನ್ಸರ್​ಗಳು ಈ ಹಾಡಿನ ಭಾಗವಾಗಿದ್ದರಂತೆ. ಜಾನಿ ಮಾಸ್ಟರ್ ನೃತ್ಯ ನಿರ್ದೇಶನದಲ್ಲಿ ಚಿತ್ರೀಕರಿಸಲಾಗಿರುವ ಈ ಹಾಡಿಗೆ ಐದು ಕೋಟಿ ರೂ ಖರ್ಚಾಗಿದೆ ಎಂದು ಹೇಳಲಾಗುತ್ತಿದೆ.

ಚಿತ್ರದಲ್ಲಿ ಜಾಕ್​ಲೀನ್ ನಟಿಸಿದ್ದಾರೆ ಎನ್ನುವುದೇನೋ ಗೊತ್ತು. ಆದರೆ, ಅವರ ಪಾತ್ರವೇನು? ಈ ವಿಷಯವನ್ನು ಚಿತ್ರತಂಡದವರು ರಹಸ್ಯವಾಗಿಟ್ಟಿದ್ದಾರೆ. ಜಾಕ್​ಲೀನ್ ಸಹ ಈ ವಿಷಯವನ್ನು ಬಹಿರಂಗಪಡಿಸಿಲ್ಲ. ಆದರೆ, ಚಿತ್ರದ ಬಗ್ಗೆ ಬಹಳ ಖುಷಿಯಿಂದ ಮಾತಾಡಿ ಹೋಗಿದ್ದಾರೆ. ತಮ್ಮ ಪಾತ್ರಕ್ಕೆ ತಾವೇ ಡಬ್ ಮಾಡುವುದಾಗಿಯೂ ಅವರು ಹೇಳಿಕೊಂಡಿದ್ದಾರಂತೆ. ಜಾಕ್​ಲೀನ್ ಅವರ ಪಾತ್ರವು ಚಿತ್ರಕ್ಕೆ ಇನ್ನೊಂದು ಹೊಸ ಆಯಾಮ ಕೊಡುತ್ತದಂತೆ. ‘ಸದ್ಯಕ್ಕೆ ಅವರ ಪಾತ್ರವೇನು ಎಂಬುದನ್ನು ಬಿಟ್ಟು ಕೊಡುವುದಕ್ಕೆ ಸಾಧ್ಯವಿಲ್ಲದಿದ್ದರೂ, ಅವರಿಂದ ಚಿತ್ರಕ್ಕೊಂದು ಹೊಸ ಟ್ವಿಸ್ಟ್ ಸಿಗುತ್ತದೆ ಎಂದಷ್ಟೇ ಈ ಕ್ಷಣಕ್ಕೆ ಹೇಳಬಹುದು’ ಎನ್ನುತ್ತಾರೆ ನಿರ್ವಪಕ ಜಾಕ್ ಮಂಜು. ‘ವಿಕ್ರಾಂತ್ ರೋಣ’ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿದ್ದು, ಚಿತ್ರವು 55ಕ್ಕೂ ಹೆಚ್ಚು ದೇಶಗಳಲ್ಲಿ 14 ಭಾಷೆಗಳಲ್ಲಿ 3ಡಿಯಲ್ಲಿ ಬಿಡುಗಡೆಯಾಗುತ್ತಿದೆ ಎಂದು ಹೇಳಲಾಗಿದೆ. ಇಲ್ಲಿಯವರೆಗೂ ಚಿತ್ರದ ಪೋಸ್ಟರ್​ಗಳು ಮತ್ತು ಸ್ನೀಕ್ ಪೀಕ್ ಬಿಡುಗಡೆಯಾಗಿದ್ದು, ಸುದೀಪ್ ಅವರ ಹುಟ್ಟುಹಬ್ಬಕ್ಕೆ (ಸೆಪ್ಟೆಂಬರ್ 02) ಚಿತ್ರತಂಡದಿಂದ ಟೀಸರ್ ಬಿಡುಗಡೆಯಾಗುವ ನಿರೀಕ್ಷೆ ಇದೆ.

https://www.vijayavani.net/whatsapp-can-be-used-without-smartphone/

https://www.vijayavani.net/face-sslc-exam-courageously/