ಚಿತ್ರದಲ್ಲಿ ನಾಯಕನಾಗಿ ಕಾಣಿಸಿಕೊಂಡಿರುವ ಆಸ್ಕರ್ ಕೃಷ್ಣ, ತೆರೆಯ ಮೇಲೆ ಬೆದರಿದವರಂತೆ ಕಾಣುತ್ತಾರೆ. ಮೊದಲ ಬಾರಿಗೆ ನಟನೆ ಮಾಡುತ್ತಿರುವುದರಿಂದ, ಇದು ಸಹಜವಿರಬಹುದು. ಆದರೆ, ಬೇರೆಯವರನ್ನು ತಿದ್ದುವ ಜವಾಬ್ದಾರಿಯನ್ನೂ ಅವರು ಪೂರ್ತಿಯಾಗಿ ನಿಭಾಯಿಸಿದಂತೆ ಕಾಣುವುದಿಲ್ಲ. ಪಾತ್ರಧಾರಿಗಳೆಲ್ಲ ರೋಬೋಟ್ಗಳಂತೆ ಕಾಣುತ್ತಾರೆ. ಅವರ ತುಟಿ ಚಲನೆಗೂ, ಸಂಭಾಷಣೆಗೂ ಸಂಬಂಧವೇ ಇಲ್ಲ. ಇನ್ನು, ತಾಂತ್ರಿಕವಾಗಿಯೂ ಚಿತ್ರ ನೀರಸವಾಗಿದೆ. ಅದೇನು ಚಿತ್ರಮಂದಿರದ ಸಮಸ್ಯೆಯೋ, ಚಿತ್ರದ್ದೇ ಸಮಸ್ಯೆಯೋ ಗೊತ್ತಿಲ್ಲ. ಒಟ್ಟಾರೆ, ಎಲ್ಲವೂ ಮಸುಕು ಮಸುಕು. ಬೆಳಕಿನ ಸನ್ನಿವೇಶಗಳೇ ಡಲ್ ಆಗಿವೆ. ಇನ್ನು, ರಾತ್ರಿಯ ಚಿತ್ರೀಕರಣವಂತೂ ಕಾಣುವುದೇ ಕಷ್ಟ. ಹಾಗೆ ನೋಡಿದರೆ, ಚಿತ್ರ ದೊಡ್ಡದೇನಲ್ಲ. 110 ನಿಮಿಷದ ಅವಧಿಯ ಈ ಚಿತ್ರದಲ್ಲಿ ಗಡಾರಿಯ ರಾಸಲೀಲೆಯ ದೃಶ್ಯಗಳನ್ನು ಮತ್ತು ಒಂದಿಷ್ಟು ಮಾತುಗಳನ್ನು ಕತ್ತರಿಸಿದ್ದರೆ ಇನ್ನಷ್ಟು ಚೆನ್ನಾಗಿರುತ್ತಿತ್ತು ಎಂದು ಪ್ರೇಕ್ಷಕರನಿಗೆ ಅನಿಸುವುದು ಸಹಜ.
