ಖಾಸಗಿ ಫೋಟೋ ಸೋರಿಕೆ: ನಟಿ ಆಲಿಯಾ ಭಟ್ ಆಕ್ರೋಶ, ದೂರು ದಾಖಲಿಸಿ ಎಂದ ಮುಂಬೈ ಪೊಲೀಸರು

ಮುಂಬೈ: ಅನುಮತಿಯಿಲ್ಲದೆ ಫೋಟೋಗಳನ್ನು ತೆಗೆದ ನ್ಯೂಸ್​ ಪೋರ್ಟಲ್​ ಒಂದರ ವಿರುದ್ಧ ಬಾಲಿವುಡ್​ ನಟಿ ಆಲಿಯಾ ಭಟ್ ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ ಹೊರ ಹಾಕಿದ ದಿನದ ಬೆನ್ನಲ್ಲೇ ಫೋಟೋಗ್ರಾಫರ್ಸ್​ ವಿರುದ್ಧ ಔಪಚಾರಿಕ ದೂರು ದಾಖಲಿಸುವಂತೆ ಮುಂಬೈ ಪೊಲೀಸರು ನಟಿಯನ್ನು ಕೇಳಿದ್ದಾರೆ.

ತನ್ನ ಮನೆಯಲ್ಲಿ ಸಮಯ ಕಳೆಯುವಾಗ ತನಗೆ ಗೊತ್ತೇ ಇಲ್ಲದೆ ಫೋಟೋಗಳನ್ನು ತೆಗೆಯಲಾಗಿದೆ ಎಂದು ಆರೋಪ ಮಾಡಿರುವ ಆಲಿಯಾ ಭಟ್​, ಇದು ನಿಜಕ್ಕೂ ಖಾಸಗಿತನದ ಉಲ್ಲಂಘನೆ ಎಂದು ಕರೆದಿದ್ದಾರೆ. ತಾವು ಜಾಲತಾಣದಲ್ಲಿ ಮಾಡಿರುವ ಪೋಸ್ಟ್​ನಲ್ಲಿ ಮುಂಬೈ ಪೊಲೀಸರನ್ನೂ ಆಲಿಯಾ ಟ್ಯಾಗ್​ ಮಾಡಿದ್ದಾರೆ.

ಇದನ್ನೂ ಓದಿ: ಸಾರಾ ಮಹೇಶ್​-ರೋಹಿಣಿ ಸಿಂಧೂರಿ ರಾಜಿ ಹಿಂದಿನ ರಹಸ್ಯ ಬಯಲು: ತಪ್ಪನ್ನು ಒಪ್ಪಿಕೊಂಡ ಐಎಎಸ್​ ಅಧಿಕಾರಿ

ಇದಾದ ಬಳಿಕ ಆಲಿಯಾ ಭಟ್​ರನ್ನು ಸಂಪರ್ಕಿಸಿರುವ ಮುಂಬೈ ಪೊಲೀಸರು, ಈ ಪ್ರಕರಣ ಕುರಿತು ದೂರು ದಾಖಲಿಸುವಂತೆ ಕೋರಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಆಲಿಯಾ, ಈಗಾಗಲೇ ಆಕೆಯ ಪಿಆರ್​ ತಂಡ ಈ ವಿಚಾರವನ್ನು ಬಗೆಹರಿಸಿಕೊಳ್ಳಲು ಸಂಬಂಧಪಟ್ಟ ನ್ಯೂಸ್​ ಪೋರ್ಟಲ್​ ಜೊತೆ ಸಂಪರ್ಕದಲ್ಲಿರುವುದಾಗಿ ಹೇಳಿದ್ದಾರೆ.

ಆಲಿಯಾ ಸೆಲೆಬ್ರಿಟಿಗಳ ಬೆಂಬಲ

ಖಾಸಗಿ ಫೋಟೋ ಕ್ಲಿಕ್ಕಿಸಿದ್ದರ ಬಗ್ಗೆ ಆಲಿಯಾ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಳ್ಳುತ್ತಿದ್ದಂತೆ ಅನೇಕ ಸೆಲೆಬ್ರಿಟಿಗಳು ಆಕೆಯ ಪರವಾಗಿ ನಿಂತು, ತಮಗಾದ ಇದೇ ರೀತಿಯ ಕಹಿ ಅನುಭವವನ್ನು ಹಂಚಿಕೊಂಡಿದ್ದಾರೆ. ಅನುಷ್ಕಾ ಶರ್ಮಾ, ಜಾಹ್ನವಿ ಕಪೂರ್​, ಅರ್ಜುನ್​ ಕಪೂರ್​, ಸ್ವರಾ ಭಾಸ್ಕರ್​, ಕರಣ್​ ಜೋಹರ್​ ಸೇರಿದಂತೆ ಇತರರು ಆಲಿಯಾಗೆ ಬೆಂಬಲ ಸೂಚಿಸಿ ಪಾಪಾರಾಜಿಗಳ ನಡೆಯನ್ನು ಖಂಡಿಸಿದ್ದಾರೆ.

ಅನುಷ್ಕಾ ಮತ್ತು ಜಾಹ್ನವಿ ಪಾಪಾರಾಜಿಗಳು ಕದ್ದು ಮುಚ್ಚಿ ಸೆರೆಹಿಡಿದ ತಮ್ಮ ಫೋಟೋಗಳನ್ನು ಸಹ ಶೇರ್​ ಮಾಡಿಕೊಂಡು ಈ ರೀತಿ ಮಾಡಬೇಡಿ ಎಂದು ಪಾಪಾರಾಜಿಗಳಿಗೆ ತಿಳಿಹೇಳಿದ್ದಾರೆ.

ಆಲಿಯಾರ ಮುಂದಿನ ಸಿನಿಮಾಗಳು

ಸಿನಿಮಾ ವಿಚಾರಕ್ಕೆ ಬರುವುದಾದರೆ, ಆಲಿಯಾ ಅವರು "ರಾಕಿ ಔರ್​ ರಾಣಿ ಕಿ ಪ್ರೇಮ್​ ಕಹಾನಿ" ಸಿನಿಮಾದಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಮೂಲಕ ನಿರ್ದೇಶಕ ಕಂ ನಿರ್ಮಾಪಕ ಕರಣ್​ ಜೋಹರ್ ಅವರು ಬಹುದಿನಗಳ ಬಳಿಕ ಮತ್ತೆ ನಿರ್ದೇಶಕ ಕ್ಯಾಪ್​ ಧರಿಸಿದ್ದಾರೆ. ಈ ಸಿನಿಮಾದಲ್ಲಿ ರಣವೀರ್​ ಸಿಂಗ್​ ಅವರು ನಾಯಕರಾಗಿದ್ದರೆ. ಹಿರಿಯ ನಟಿ ಜಯಾ ಬಚ್ಚನ್​, ಧರ್ಮೇಂದ್ರ ಮತ್ತು ಶಬಾನಾ ಅಜ್ಮಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದು, ಈ ಸಿನಿಮಾ ಈ ವರ್ಷದ ಜುಲೈನಲ್ಲಿ ಬೆಳ್ಳಿ ತೆರೆಗೆ ಅಪ್ಪಳಿಸಲಿದೆ.

ಇದನ್ನೂ ಓದಿ: ಕಂಡಕ್ಟರ್ 1 ರೂ. ಚಿಲ್ಲರೆ ನೀಡಿಲ್ಲ ಅಂತ ಕೋರ್ಟ್ ಮೊರೆ ಹೋಗಿದ್ದ ವ್ಯಕ್ತಿಗೆ ಸಿಕ್ಕಿತು 2000 ರೂ. ಪರಿಹಾರ!

ಇದನ್ನು ಹೊರತುಪಡಿಸಿದರೆ, ಫರ್ಹಾನ್​ ಅಖ್ತಾರ್​ ನಟನೆಯ ಜೀ ಲೇ ಝರಾ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾದಲ್ಲಿ ಪ್ರಿಯಾಂಕಾ ಚೋಪ್ರಾ ಜೋನಸ್​ ಮತ್ತು ಕತ್ರಿನಾ ಕೈಫ್​ ಸಹ ನಟಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/30-days-holiday-for-new-couples-chinas-latest-experiments-to-increase-the-birth-rate/

https://www.vijayavani.net/actor-anushree-express-most-painful-experience-had-in-shubha-poonja-house/