ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಕನ್ನಡದಲ್ಲಿ ಬಿಗ್ ಚಿತ್ರಗಳ ಬಿಡುಗಡೆ ಪರ್ವ ಮುಂದುವರಿಯಬೇಕಿತ್ತು. ‘ಯುವರತ್ನ’ ನಂತರ ಏಪ್ರಿಲ್ 15ಕ್ಕೆ ‘ಸಲಗ’ ಮತ್ತು ಇಂದು ಸುದೀಪ್ ಅಭಿನಯದ ‘ಕೋಟಿಗೊಬ್ಬ 3’ ಚಿತ್ರಗಳು ಬಿಡುಗಡೆಯಾಗಬೇಕಿತ್ತು. ಆದರೆ, ಕರೊನಾ ಎರಡನೆಯ ಅಲೆಯಿಂದ ಅವೆಲ್ಲ ಚಿತ್ರಗಳು ಅನಿರ್ದಿಷ್ಟಾವಧಿ ಮುಂದಕ್ಕೆ ಹೋಗಿವೆ. ಈ ಚಿತ್ರಗಳು ಯಾವಾಗ ಬಿಡುಗಡೆ ಎಂದು ಸ್ವತಃ ಆ ಚಿತ್ರಗಳ ನಿರ್ವಪಕರಿಗೂ ಸ್ಪಷ್ಟತೆ ಇಲ್ಲ. ಪರಿಸ್ಥಿತಿ ತಿಳಿಯಾದ ಮೇಲೆ ನೋಡಿಕೊಂಡು, ಬಿಡುಗಡೆಯ ದಿನಾಂಕವನ್ನು ಪ್ರಕಟಿಸುವುದಾಗಿ ಹೇಳುತ್ತಾರೆ. ಬರೀ ಕನ್ನಡವಷ್ಟೇ ಅಲ್ಲ, ಬೇರೆ ಭಾಷೆಯ ಬಿಗ್ ಚಿತ್ರಗಳಿಗೂ ಕರೊನಾ ಎರಡನೆಯ ಅಲೆಯ ಬಿಸಿ ತಟ್ಟಿದೆ. ಕಳೆದ ವಾರವೇ ಕಂಗನಾ ರಣಾವತ್ ಅಭಿನಯದ ‘ತಲೈವಿ’ ಚಿತ್ರ ಬಿಡುಗಡೆಯಾಗಬೇಕಿತ್ತು. ಆದರೆ, ಲಾಕ್ಡೌನ್ನಿಂದ ಈ ಚಿತ್ರದ ಬಿಡುಗಡೆ ಮುಂದಕ್ಕೆ ಹೋಗಿದ್ದು, ಮುಂದಿನ ದಿನಾಂಕವನ್ನು ಇನ್ನೂ ಚಿತ್ರತಂಡ ಘೊಷಿಸಿಲ್ಲ. ಮೇ 13ಕ್ಕೆ ಸಲ್ಮಾನ್ ಖಾನ್ ಅಭಿನಯದ ‘ರಾಧೆ - ಯುವರ್ ಮೋಸ್ಟ್ ವಾಂಟೆಡ್ ಭಾಯ್’ ಮತ್ತು ಮೇ 14ಕ್ಕೆ ಚಿರಂಜೀವಿ ಅಭಿನಯದ ‘ಆಚಾರ್ಯ’ ಚಿತ್ರ ಬಿಡುಗಡೆ ಮಾಡುವುದಾಗಿ ಎರಡೂ ಚಿತ್ರತಂಡಗಳು ಘೊಷಿಸಿದ್ದವು. ಈ ಪೈಕಿ ಮೇ 13ರಂದು ಓಟಿಟಿಯಲ್ಲಿ 299ರೂಗೆ ‘ರಾಧೆ’ ಲಭ್ಯವಾಗಲಿದೆ. ಲಾಕ್ಡೌನ್ ಇಲ್ಲದ ಕಡೆಗಳಲ್ಲಿ ಚಿತ್ರಮಂದಿರಗಳಲ್ಲಿ ಈ ಸಿನಿಮಾ ಬಿಡುಗಡೆಯಾಗಲಿದೆ.
