ಈ ಕುರಿತು ಮಾತನಾಡುವ ಚಿತ್ರ ಪ್ರದರ್ಶಕ ಮತ್ತು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಉಪಾಧ್ಯಕ್ಷ ಉಮೇಶ್ ಬಣಕಾರ್, ‘ನಾನೇ ಮೂರು ಚಿತ್ರಮಂದಿರಗಳನ್ನು ನಡೆಸುತ್ತಿದ್ದೇನೆ. ಎಲ್ಲವೂ ಸರಿಯಾಗಿ ಸಿನಿಮಾಗಳು ಬಿಡುಗಡೆಗೆ ಬಂದರೂ ನಾನು ಚಿತ್ರಪ್ರದರ್ಶನ ಪ್ರಾರಂಭಿಸುವುದಿಲ್ಲ. ಹೊರೆ ಮೇಲೆ ಹೊರೆ ಹಾಕಿಕೊಳ್ಳುವುದು ನನಗಿಷ್ಟವಿಲ್ಲ. ಆದಾಯ ನೋಡಿದರೆ ಜೀರೋ. ಇದರಲ್ಲಿ ಹಂಚಿಕೆದಾರರಿಗೆ ಮತ್ತು ನಿರ್ವಪಕರಿಗೆ ಏನು ನೀಡಬೇಕು? ನಷ್ಟದ ಪಟ್ಟಿಯೇ ದೊಡ್ಡದಿದೆ. ಇದೆಲ್ಲದರ ನಡುವೆ ಸರ್ಕಾರ ತೆರಿಗೆ ವಿನಾಯಿತಿ ನೀಡಿದೆಯಾದರೂ, ಕರೆಂಟ್ ಬಿಲ್ ಸೇರಿ ಥಿಯೇಟರ್ ನಿರ್ವಹಣೆಯೂ ಕಷ್ಟವಾಗುತ್ತಿದೆ’ ಎನ್ನುತ್ತಾರೆ. ಕರ್ನಾಟಕ ಚಲನಚಿತ್ರ ಪ್ರದರ್ಶಕರ ಮಹಾಮಂಡಳದ ಅಧ್ಯಕ್ಷ ಓದುಗೌಡ್ರು ಸಹ ಈ ಸ್ಥಿತಿ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. 600ಕ್ಕೂ ಹೆಚ್ಚು ಚಿತ್ರಮಂದಿರಗಳ ಪೈಕಿ ಕಳೆದ ಲಾಕ್ಡೌನ್ನಿಂದ ಇಲ್ಲಿಯವರೆಗೂ 35ಕ್ಕೂ ಹೆಚ್ಚು ಚಿತ್ರಮಂದಿರಗಳು ಮುಚ್ಚಲ್ಪಟ್ಟಿವೆ. ಹಣವಂತರು, ಉಳ್ಳವರು ಚಿತ್ರಮಂದಿರಗಳನ್ನು ಮುನ್ನಡೆಸುತ್ತಿದ್ದಾರೆ. ಆದರೆ, ಅದನ್ನೇ ನಂಬಿ ಜೀವನ ದೂಡುತ್ತಿದ್ದವರು ಕೈ ಮುಗಿದು ಬೇರೆ ಕೆಲಸಗಳತ್ತ ಮುಖ ಮಾಡಿದ್ದಾರೆ. ವಿದ್ಯುತ್ ಶುಲ್ಕ ಮತ್ತು ನಿರ್ವ ಹಣೆಯೇ ಸಾಕಾಗಿದೆ. ಹೀಗೆ ಪರಿಸ್ಥಿತಿ ಮುಂದುವರಿದರೆ, ಈ ಸಂಖ್ಯೆ ಮತ್ತಷ್ಟು ಹೆಚ್ಚಾದರೂ ಅಚ್ಚರಿಯೇನಲ್ಲ’ ಎನ್ನುತ್ತಾರವರು. ಆದರೆ, ಪರಿಸ್ಥಿತಿ ಸಂಪೂರ್ಣವಾಗಿ ಹದಗೆಟ್ಟಿಲ್ಲ ಎಂಬ ಆಶಾ ಭಾವನೆಯನ್ನು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಜೈರಾಜ್ ವ್ಯಕ್ತಪಡಿಸುತ್ತಾರೆ. ‘ಸದ್ಯಕ್ಕೆ ಯಾವುದೇ ಸಿನಿಮಾಗಳು ಬಿಡುಗಡೆ ಆಗುತ್ತಿಲ್ಲ. ಹಾಗಾಗಿ, ಯಾರೆಲ್ಲ ಚಿತ್ರಮಂದಿರಗಳನ್ನು ಮುಚ್ಚಿದ್ದಾರೆ ಎಂಬ ಅಂಕಿ ಅಂಶ ಸಿಗುವುದಿಲ್ಲ. ಯಾರೂ ಸಹ ನಾವು ಬಂದ್ ಮಾಡಿದ್ದೇವೆಂದು ಹೇಳಿಕೊಳ್ಳುವುದಿಲ್ಲ. ಯಾವಾಗ ಸಿನಿಮಾ ಬಿಡುಗಡೆ ಪ್ರಕ್ರಿಯೆ ಶುರುವಾಗುತ್ತದೆಯೋ ಆಗ ಮಾಹಿತಿ ಸಿಗಲಿದೆ’ ಎಂಬುದು ಅವರ ಮಾತು.
