'ಟಗರು' ನೋಡೋಕೆ ಯಾರೆಲ್ಲಾ ಬರ್ತಾರೆ ಗೊತ್ತಾ? ನೀವೇ ನೋಡಿ ...

ಬೆಂಗಳೂರು: ಕೇಂದ್ರ ಸರ್ಕಾರವು ಚಿತ್ರಪ್ರದರ್ಶನಕ್ಕೆ ಗ್ರೀನ್​ ಸಿಗ್ನಲ್​ ನೀಡಿರುವ ಹಿನ್ನೆಲೆಯಲ್ಲಿ, ಹಲವು ಚಿತ್ರಗಳ ಮರುಬಿಡುಗಡೆ ಆಗುತ್ತಿವೆ. ಅದರಲ್ಲೂ ಈ ಶುಕ್ರವಾರವಂತೂ ಹಲವು ಸ್ಟಾರ್​ ಸಿನಿಮಾಗಳು ಮತ್ತೊಮ್ಮೆ ತೆರೆಕಾಣುತ್ತಿರುವುದು ವಿಶೇಷ.

ಇದನ್ನೂ ಓದಿ: ಆರ್​ಆರ್​ಆರ್​ ಟೀಸರ್​; ಗೆದ್ದ ಜೂ. ಎನ್​ಟಿಆರ್​, ಸೋತ ರಾಮ್​ಚರಣ್​

ಶಿವರಾಜಕುಮಾರ್​ ಅಭಿನಯದ 'ಟಗರು', ಸುದೀಪ್​ ಅಭಿನಯದ 'ಕೋಟಿಗೊಬ್ಬ 2', ಪುನೀತ್​ ಅಭಿನಯದ 'ರಾಜ್​ಕುಮಾರ', ದರ್ಶನ್​ ಅಭಿನಯದ 'ಕುರುಕ್ಷೇತ್ರ', ಯಶ್​ ಅಭಿನಯದ 'ಕೆಜಿಎಫ್​' ಸೇರಿದಂತೆ ಹಲವು ದೊಡ್ಡ ಚಿತ್ರಗಳು ಬಿಡುಗಡೆಯಾಗುತ್ತಿವೆ.

ಈ ಪೈಕಿ ಶಿವರಾಜಕುಮಾರ್​ ಅಭಿನಯದ 'ಟಗರು' ಚಿತ್ರದ ನಿರ್ಮಾಪಕ ಕೆ.ಪಿ. ಶ್ರೀಕಾಂತ್​ ಅವರು ರೀ-ರಿಲೀಸ್​ ಸಂಭ್ರಮವನ್ನು ಆಯೋಜಿಸಿದ್ದಾರೆ. 'ಟಗರು' ಚಿತ್ರವು ಇಂದು, ಶಿರಸಿ ಸರ್ಕಲ್​ನಲ್ಲಿರುವ ಗೋಪಾಲನ್ ಆರ್ಕೇಡ್​ನ ಗೋಪಾಲನ್​ ಸಿನಿಮಾಸ್​ನಲ್ಲಿ ಬಿಡುಗಡೆಯಾಗಿದೆ. ಭಾನುವಾರ ಅಂದರೆ ಅಕ್ಟೋಬರ್​ 25ರಂದು ಮಶ್ಯಾಹ್ನ ಒಂದು ಗಂಟೆಗೆ ಅಭಿಮಾನಿಗಳ ಜತೆಗೆ 'ಟಗರು' ಚಿತ್ರವನ್ನು ವೀಕ್ಷಿಸುವುದಕ್ಕೆ ನಿರ್ದೇಶಕ ಸೂರಿ, 'ದುನಿಯಾ' ವಿಜಯ್​, ಧನಂಜಯ್​, ವಸಿಷ್ಠ ಸಿಂಹ ಮುಂತಾದವರು ಭೇಟಿ ನೀಡಲಿದ್ದಾರೆ.

ಚಿತ್ರ ಪ್ರದರ್ಶನದ ನಂತರ, ಗೋಪಾಲನ್​ ಸಿನಿಮಾಸ್​ನಲ್ಲಿ ಮಧ್ಯಾಹ್ನ ಮೂರು ಗಂಟೆಗೆ 'ಟಗರು' ಚಿತ್ರದ ಮರುಬಿಡುಗಡೆ ಸಂಭ್ರಮ ಕಾರ್ಯಕ್ರಮ ನಡೆಯಲಿದೆ. ಈ ಕಾರ್ಯಕ್ರಮದಲ್ಲಿ ಭಾಗಿಯಾಗುವುದರ ಜತೆಗೆ, ಪ್ರೇಕ್ಷಕರು ಇನ್ನಷ್ಟು ಕನ್ನಡ ಚಿತ್ರಗಳನ್ನು ವೀಕ್ಷಿಸಿ, ಕನ್ನಡ ಚಿತ್ರರಂಗವನ್ನು ಪ್ರೋತ್ಸಾಹಿಸಬೇಕೆಂಬುದು ನಿರ್ಮಾಪಕ ಕೆ.ಪಿ. ಶ್ರೀಕಾಂತ್​ ಅವರ ಮನವಿ.

ಇದನ್ನೂ ಓದಿ: 18 ರಾಷ್ಟ್ರಗಳಲ್ಲಿ ಶಾರುಖ್​- ಕಾಜೋಲ್​ ‘ಡಿಡಿಎಲ್​ಜೆ’ ಸಿನಿಮಾ ಮರು ಬಿಡುಗಡೆ

'ಟಗರು' ಚಿತ್ರವು 2018ರಲ್ಲಿ ರಾಜ್ಯಾದ್ಯಂತ ಬಿಡುಗಡೆಯಾಗಿ, ಸೂಪರ್​ ಹಿಟ್​ ಆಗಿತ್ತು. ಶಿವರಾಜಕುಮಾರ್​ ಜತೆಗೆ ಭಾವನಾ ಮೆನನ್​, ಮಾನ್ವಿತಾ ಕಾಮತ್​, ಧನಂಜಯ್​, ದೇವರಾಜ್​, ವಸಿಷ್ಠ ಸಿಂಹ, 'ಕಾಕ್ರೋಚ್​' ಸುಧಿ ಮುಂತಾದವರು ಅಭಿನಯದ ಈ ಚಿತ್ರ ವಿಭಿನ್ನ ನಿರೂಪಣೆಯಿಂದ ಪ್ರೇಕ್ಷಕರಿಗೆ ಇಷ್ಟವಾಗಿತ್ತು. ಈಗ ಈ ಚಿತ್ರವು ಎರಡು ವರ್ಷಗಳ ನಂತರ ಮರುಬಿಡುಗಡೆಯಾಗುತ್ತಿದೆ.

https://www.vijayavani.net/lodge-owner-files-a-police-complaint-against-vijayalakhsmi/