ಭೂಮಿ ವಿವಾದ ಪ್ರಕರಣ; ಮೃತ ತಂದೆ ಹಾಜರಾಗಿರುವ ದಾಖಲೆ ಕೇಳಿದ ಮಗ; ಎಡಿಸಿ ತನಿಖೆಗೆ ಆದೇಶದ ರಾಜ್ಯ ಮಾಹಿತಿ ಆಯೋಗ | Information Commission

ಬೆಂಗಳೂರು: ಭೂಮಿ ವಿವಾದಗಳಿಗೆ ಸಂಬಂಧಿಸಿದ ಮೂರು ಪ್ರತ್ಯೇಕ ಪ್ರಕರಣಗಳಲ್ಲಿ ಅಪರ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ತನಿಖಾ ಸಮಿತಿ ರಚಿಸಿ ವಿಚಾರಣೆ ನಡೆಸಿ ಅರ್ಜಿದಾರರಿಗೆ ಮಾಹಿತಿ ನೀಡುವಂತೆ ಬೆಂಗಳೂರು ನಗರ, ಮೈಸೂರು ಹಾಗೂ ಮಂಡ್ಯ ಜಿಲ್ಲೆಯ ಡಿಸಿ ಮತ್ತು ಕಂದಾಯ ಇಲಾಖೆ ಅಪರ ಮುಖ್ಯ ಕಾರ್ಯದರ್ಶಿಗೆ ಕರ್ನಾಟಕ ಮಾಹಿತಿ ಆಯೋಗ(Information Commission) ಆದೇಶ ನೀಡಿದೆ.

ಮೂವರು ಅರ್ಜಿದಾರರು ಸಲ್ಲಿಸಿದ್ದ ಮೇಲ್ಮನವಿಗಳ ವಿಚಾರಣೆ ನಡೆಸಿದ ತನಿಖೆಗೆ ಸೂಚಿಸಿರುವ ಕರ್ನಾಟಕ ಮಾಹಿತಿ ಆಯೋಗದ ಪೀಠ ಸಂಖ್ಯೆ -೪ರ ರಾಜ್ಯ ಮಾಹಿತಿ ಆಯುಕ್ತ ರುದ್ರಣ್ಣ ಹರ್ತಿಕೋಟೆ ಅವರು, ಮೈಸೂರು ಜಿಲ್ಲೆಗೆ ಸಂಬಂಧಿಸಿದ ಪ್ರಕರಣದಲ್ಲಿ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸುವಂತೆ ನಿರ್ದೇಶನ ನೀಡಿದ್ದಾರೆ.

ಮೃತರಾಗಿರುವ ತಮ್ಮ ತಂದೆಯೇ ಮೈಸೂರು ತಾಲೂಕು ಕಚೇರಿಗೆ ಬಂದು ಭೂಮಿ ವಿವಾದ ಕುರಿತ ವಿಚಾರಣೆಗೆ ಹಾಜರಾಗಿದ್ದಾರೆಂದು ದಾಖಲೆ ಸೃಷ್ಠಿಯಾಗಿರುವ ಬಗ್ಗೆ ಸಿಸಿಟಿವಿ ಪುಟೇಜ್ ನೀಡುವಂತೆ ಅವರ ಪುತ್ರ ಕೇಳಿರುವ ಪ್ರಕರಣದಲ್ಲಿ ಅಪರ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ತನಿಖೆ ಆದೇಶ ನೀಡಲಾಗಿದೆ.

ಮೈಸೂರು ನಗರದ ಕ್ಯಾತಮಾರನಹಳ್ಳಿಯ ಎಸ್. ರವಿ ಅವರು ಅರ್ಜಿ ಸಲ್ಲಿಸಿ ಸರ್ವೆ ನಂ. ೧೫೫ ನಡೆದ ವಿಚಾರಣೆಗೆ ಸಂಬಂಧಿಸಿದಂತೆ ಕೆಲವೊಂದು ದಾಖಲೆಯನ್ನು ಕೋರಿದ್ದರು. ತಂದೆ ಶಿವಚಿಕ್ಕಯ್ಯ ನಿಧನರಾಗಿದ್ದರೂ ಸಹ ತಾಲೂಕು ಕಚೇರಿಯಲ್ಲಿ ನಡೆದ ವಿಚಾರಣೆಗೆ 2023 ಜೂನ್ 13 ಮತ್ತು 2023 ಜುಲೈ 11ರಂದು ಹಾಜರಾಗಿ ಸಹಿ ಹಾಕಿದ್ದಾರೆ ಎಂದು ಆರೋಪ ಮಾಡಿದ್ದರು. ಅದಕ್ಕೆ ಸಂಬಂಧಿಸಿದ ದಾಖಲೆ ಮತ್ತು ಸಿಸಿಟಿವಿ ಫುಟೇಜ್ ಅನ್ನು ಕೋರಿದ್ದರು.

ಆದರೆ ತಾಲೂಕು ಕಚೇರಿ ಯಾವುದೇ ಮಾಹಿತಿಯನ್ನು ಅವಬರಿಗೆ ನೀಡಿರಲಿಲ್ಲ. ಆದ್ದರಿಂದ ಇದೊಂದು ಕ್ರಿಮಿನಲ್ ಪ್ರಕರಣವಾಗಿದೆ. ಆದ್ದರಿಂದ ಅರ್ಜಿದಾರರ ಬಳಿ ಇರುವ ಮೃತರ ಮರಣ ಪ್ರಮಾಣ ಪತ್ರ ಪಡೆದು ಅಪರ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ತನಿಖೆ ನಡೆಸಿ ವರದಿ ನೀಡಬೇಕು. ಇಂತಹ ಅಕ್ರಮ ನಡೆದಿದ್ದರೆ ಸಂಬಂಧಿಸಿದವರ ಮೇಲೆ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿ ಅರ್ಜಿದಾರರಿಗೆ ಮಾಹಿತಿ ನೀಡಬೇಕೆಂದು ಆಯೋಗ ತನ್ನ ಆದೇಶದಲ್ಲಿ ಹೇಳಿದೆ.

ಮತ್ತೊಂದು ಪ್ರಕರಣದಲ್ಲಿ ಮದ್ದೂರು ತಾಲೂಕಿನ ಕೊತ್ತಹಳ್ಳಿ ಗ್ರಾಮದ ಕೆ.ಎಸ್. ಪಾರ್ಥಸಾರಥಿ ಅವರು ತಮ್ಮ ಗ್ರಾಮದ ಸರ್ವೇ ನಂಬರ್ 53/50 ಹಾಗೂ 53/51 ಶಿಕ್ಷಣ ಸಂಸ್ಥೆಗೆ ಅಲಿನೇಷನ್ ಆಗಿರುವ ಕಡತ ಸಂಖ್ಯೆ ಎಎಲ್‌ಎನ್‌ಸಿಆರ್ 295/91-92ರಲ್ಲಿನ ದಾಖಲೆ ನೀಡುವಂತೆ ಕೋರಿದ್ದರು.

ಮದ್ದೂರು ತಹಸೀಲ್ದಾರರು ಈ ಕಡತ ಇಲ್ಲವೆಂದು ವರದಿ ನೀಡಿದ್ದರು. ಮಾಹಿತಿ ಆಯುಕ್ತರು ಕರ್ನಾಟಕ ಸ್ಟೇಟ್ ಪಬ್ಲಿಕ್ ರೆಕಾರ್ಡ್ ಆಕ್ಟ್ ೨೦೧೦ ರ ಪ್ರಕಾರ ಎಫ್‌ಐಆರ್ ದಾಖಲಿಸಲು ಸೂಚಿಸಿದ್ದರು. ಉಪ ವಿಭಾಗಾಧಿಕಾರಿ ಕಚೇರಿಯಲ್ಲಿ ಕಡತ ಲಭ್ಯವಿದೆ. ಇದು ಮಳವಳ್ಳಿ ತಾಲೂಕಿಗೆ ಸಂಬಂಧಿಸಿದ್ದಯ, ಮದ್ದೂರಿನದು ಅಲ್ಲವೆಂದು ವಿಚಾರಣೆಯ ಸಂದರ್ಭದಲ್ಲಿ ತಿಳಿಸಿದರು.

ಅರ್ಜಿದಾರರ ಬಳಿಯಲ್ಲಿರುವ ಕಡತ ಅಸಲಿಯೇ ನಕಲಿಯೇ ಎಂಬ ಬಗ್ಗೆ ಪರಿಶೀಲನೆ ನಡೆಸಬೇಕೆಂದು, ತಪ್ಪಿತಸ್ಥರು ಇದ್ದಲ್ಲಿ ಅವರ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳಬೇಕು. ಈ ಕುರಿತು ಅಪರ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ತನಿಖೆ ನಡೆಸಿ ಅರ್ಜಿದಾರರು ಹಾಗೂ ಆಯೋಗಕ್ಕೆ ವರದಿ ನೀಡುವಂತೆ ಸೂಚಿಸಲಾಗಿದೆ.

ಮೂರನೇ ಪ್ರಕರಣದಲ್ಲಿ ಬೆಂಗಳೂರು ಪೂರ್ವ ತಾಲೂಕಿನ ಬಿದರಹಳ್ಳಿ ಹೋಬಳಿ ಮಿಟಗಾನಹಳ್ಳಿ ಗ್ರಾಮದ ಗೋವಿಂದರಾಜು ಅವರು ತಮ್ಮ ಗ್ರಾಮದ ಸರ್ವೆ ನಂ. 2ರ ದಾಖಲೆ ನೀಡುವಂತೆ ಕೋರಿದ್ದರು. ಅದು ಅನುಮಾನಾಸ್ಪದ ಕಡತವೆಂದು ತೀರ್ಮಾನವಾಗಿದೆ ಎಂಬ ಮಾಹಿತಿಯನ್ನು ಪೂರ್ವ ತಾಲೂಕು ಕಚೇರಿ ಅಧಿಕಾರಿಗಳು ನೀಡಿದ್ದರು. ಆದ್ದರಿಂದ ಈ ಬಗ್ಗೆ ತನಿಖೆ ನಡೆಸುವಂತೆ ಆಯೋಗ ನಿರ್ದೇಶನ ನೀಡಿದೆ.

ದೇವಾಲಯದ ಆಡಳಿತಾಧಿಕಾರಿಗೆ ಒಂದು ಲಕ್ಷ ರೂ. ದಂಡ

ಪ್ರತ್ಯೇಕ 4ನೇ ಪ್ರಕರಣದಲ್ಲಿ ಉಡುಪಿ ಜಿಲ್ಲೆಯ ಕಾರ್ಕಳದ ಶ್ರೀ ಮಾರಿಯಮ್ಮ ದೇವಾಲಯದ ಸಾರ್ವಜನಿಕ ಮಾಹಿತಿ ಆಧಿಕಾರಿಯಾದ ಆಡಳಿತ ಮೋಕ್ತೇಸರ ಕೆ.ಪಿ. ಗೋಪಾಲಕೃಷ್ಣರಾವ್ ಅವರಿಗೆ ಪ್ರತ್ಯೇಕ ನಾಲ್ಕು ಪ್ರಕರಣಗಳಲ್ಲಿ ಒಂದು ಲಕ್ಷ ರೂ. ದಂಡ ವಿಧಿಸಿ ಕರ್ನಾಟಕ ಮಾಹಿತಿ ಆಯೋಗ ಆದೇಶ ಮಾಡಿದೆ.

ಅರ್ಜಿದಾರ ಸೋಮನಾಥ ನಾಯಕ್ ಕೆ. ಅವರು ದೇವಾಲಯಕ್ಕೆ ಸಂಬಂಧಿಸಿದಂತೆ ಅರ್ಜಿಗಳನ್ನು ಸಲ್ಲಿಸಿ ಕೆಲವೊಂದು ಮಾಹಿತಿಗಳನ್ನು ಕೋರಿದ್ದರು. ಶ್ರೀ ಮಾರಿಯಮ್ಮ ದೇವಾಲಯ ಮುಜುರಾಯಿ ದೇವಾಸ್ಥಾನವಾಗಿದೆ. ಹಿಂದೂ ಧಾರ್ಮಿಕ ದತ್ತಿ ಇಲಾಖೆ ಆಡಳಿತ ಮೋಕ್ತೇಸರ ಅವರನ್ನು ಸಾರ್ವಜನಿಕ ಮಾಹಿತಿ ಅಧಿಕಾರಿಯನ್ನಾಗಿ ನೇಮಕ ಮಾಡಿದೆ. ಆದರೂ ಅವರು ಆಯೋಗದ ವಿಚಾರಣೆಗಳಿಗೆ ಹಾಜರಾಗುತ್ತಿರಲಿಲ್ಲ, ಅರ್ಜಿದಾರರಿಗೆ ಮಾಹಿತಿಯನ್ನೂ ನೀಡುತ್ತಿರಲಿಲ್ಲ.

ದೇವಾಲಯಕ್ಕೆ ಸರ್ಕಾರದಿಂದ ವಾರ್ಷಿಕ 60 ಸಾವಿರ ರೂ. ವರ್ಷಾಸನ ಹಾಗೂ 2022ರಲ್ಲಿ ದೇವಾಲಯ ನವೀಕರಣಕ್ಕೆ ಸರ್ಕಾರದಿಂದ 25 ಲಕ್ಷ ರೂ. ಅನುದಾನ ಬಿಡುಗಡೆಯಾಗಿದೆ. ಆದ್ದರಿಂದ ಕೂಡಲೇ ಮಾಹಿತಿ ನೀಡುವಂತೆ ಆಯೋಗ ಆದೇಶ ನೀಡಿದ್ದರೂ ಸಾರ್ವಜನಿಕ ಮಾಹಿತಿ ಆಧಿಕಾರಿ ಗೋಪಾಲಕೃಷ್ಣರಾವ್ ಪಾಲಿಸಿರಲಿಲ್ಲ. ಆದ್ದರಿಂದ ಪ್ರತಿ ಪ್ರಕರಣಕ್ಕೆ ತಲಾ 25 ಸಾವಿರ ರೂ. ದಂಡ, ಎರಡು ಪ್ರಕರಣದಲ್ಲಿ ತಲಾ ೫ ಸಾವಿರ ರೂ. ಪರಿಹಾರ, ಹಾಗೂ ಉಳಿದೆರಡು ಪ್ರಕರಣದಲ್ಲಿ ತಲಾ ೩ ಸಾವಿರ ರೂ. ಪರಿಹಾರ ನೀಡುವಂತೆ ರಾಜ್ಯ ಮಾಹಿತಿ ಆಯುಕ್ತ ರುದ್ರಣ್ಣ ಹರ್ತಿಕೋಟೆ ಅವರು ಆದೇಶ ನೀಡಿದ್ದಾರೆ.