ಫಿಫಾ ಆರಂಭಕ್ಕೂ ಮುನ್ನವೇ ಆಘಾತ: ಆಫ್ರಿಕಾದ ನಂ.1 ರೆಫರಿಗೆ ಅಮೆರಿಕ ನೋ ಎಂಟ್ರಿ; ಇತಿಹಾಸ ಸೃಷ್ಟಿಸಲ್ಲಿದ್ದವ ತವರಿಗೆ ಮರಳಿದ್ದೇಕೆ? Referee Omar Artan

ಅಮೆರಿಕ: ಫುಟ್‌ಬಾಲ್ ಇತಿಹಾಸದಲ್ಲೇ ಮೊದಲ ಬಾರಿಗೆ ವಿಶ್ವಕಪ್ ಪಂದ್ಯಾವಳಿಯಲ್ಲಿ ರೆಫರಿಯಾಗಿ ಕಾಣಿಸಿಕೊಂಡು ಇತಿಹಾಸ ಸೃಷ್ಟಿಸಬೇಕಾಗಿದ್ದ ಸೊಮಾಲಿಯಾದ ಹೆಮ್ಮೆಯ ರೆಫರಿ ಒಮರ್ ಅಬ್ದುಲ್ಕದಿರ್ ಅರ್ಟನ್ (Referee Omar Artan) ಅವರ ಕನಸು ಈಗ ಅಮೆರಿಕದ ನಿಯಮಗಳಿಂದಾಗಿ ನುಚ್ಚುನೂರಾಗಿದೆ.

2026ರ ಫಿಫಾ ವಿಶ್ವಕಪ್ ಆರಂಭಕ್ಕೆ ಇನ್ನು ಕೆಲವೇ ಗಂಟೆಗಳು ಬಾಕಿ ಇರುವಾಗ, ಅಮೆರಿಕ ಸರ್ಕಾರ ಅರ್ಟನ್​ಗೆ ದೇಶದೊಳಗೆ ಪ್ರವೇಶಿಸದಂತೆ ನಿರ್ಬಂಧ ಹೇರಿದೆ.

2025ರ ಆಫ್ರಿಕಾದ ಅತ್ಯುತ್ತಮ ರೆಫರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದ ಅರ್ಟನ್, ಈ ಬಾರಿ ಅಮೆರಿಕ, ಮೆಕ್ಸಿಕೊ ಮತ್ತು ಕೆನಡಾ ಜಂಟಿಯಾಗಿ ಆಯೋಜಿಸುತ್ತಿರುವ ಫಿಫಾ ವಿಶ್ವಕಪ್​ನಲ್ಲಿ ಭಾಗವಹಿಸಲು ಸಜ್ಜಾಗಿದ್ದರು. ಆದರೆ ಮಿಯಾಮಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಅವರನ್ನು ಅಮೆರಿಕದ ಕಸ್ಟಮ್ಸ್ ಮತ್ತು ಗಡಿ ರಕ್ಷಣೆ (CBP) ಅಧಿಕಾರಿಗಳು ತಡೆದು, ವಾಪಸ್ ಕಳುಹಿಸಿದ್ದಾರೆ.

ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಅಮೆರಿಕ ಸರ್ಕಾರ, ಅರ್ಟನ್ ಭಯೋತ್ಪಾದಕ ಸಂಘಟನೆಗಳ ಶಂಕಿತ ಸದಸ್ಯರೊಂದಿಗೆ ಸಂಪರ್ಕ ಹೊಂದಿದ್ದಾರೆ ಎಂಬ ಸಂಶಯವಿರುವುದರಿಂದ, ಅವರನ್ನು ದೇಶದ ಭದ್ರತೆಗೆ ಅಪಾಯ ತರಬಲ್ಲ ವ್ಯಕ್ತಿ ಎಂದು ಪರಿಗಣಿಸಿ ಈ ಕಠಿಣ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಅಮೆರಿಕದಿಂದ ವಾಪಸ್ ಆಗಿ ಸೊಮಾಲಿಯಾದ ರಾಜಧಾನಿ ಮೊಗಾದಿಶು ತಲುಪಿದ ಅರ್ಟನ್, ತಮಗಾದ ಕಹಿ ಅನುಭವದ ಬಗ್ಗೆ ಸುದ್ದಿಗಾರರ ಮುಂದೆ ಬೇಸರ ಹೊರಹಾಕಿದ್ದಾರೆ. ನನ್ನೊಂದಿಗೆ ಏನೇ ನಡೆದಿದ್ದರೂ ಅದು ನಿಜಕ್ಕೂ ದುರದೃಷ್ಟಕರ. ಆದರೆ ಕಷ್ಟದ ಸಮಯದಲ್ಲಿ ಫಿಫಾ ನನಗೆ ನೀಡಿದ ಬೆಂಬಲಕ್ಕೆ ನಾನು ಕೃತಜ್ಞನಾಗಿದ್ದೇನೆ ಎಂದು ಅವರು ಹೇಳಿದ್ದಾರೆ.

ಈ ವಿಶ್ವಕಪ್‌ಗಾಗಿ ಫಿಫಾ ಒಟ್ಟು 52 ರೆಫರಿಗಳು ಮತ್ತು 88 ಸಹಾಯಕ ರೆಫರಿಗಳನ್ನು ಆಯ್ಕೆ ಮಾಡಿಕೊಂಡಿತ್ತು. ಅದರಲ್ಲಿ ಅರ್ಟನ್ ಕೂಡ ಒಬ್ಬರಾಗಿದ್ದರು. ಅರ್ಟನ್ ಅವರಿಗೆ ಅಮೆರಿಕ ಪ್ರವೇಶ ಸಿಗುವಂತೆ ಮಾಡಲು ಸೊಮಾಲಿಯಾ ಸರ್ಕಾರವು ಫಿಫಾ ಮತ್ತು ಅಮೆರಿಕದ ಅಧಿಕಾರಿಗಳೊಂದಿಗೆ ಸಾಕಷ್ಟು ರಾಜತಾಂತ್ರಿಕ ಮಾತುಕತೆಗಳನ್ನು ನಡೆಸಿತಾದರೂ, ಅಮೆರಿಕದ ಕಟ್ಟುನಿಟ್ಟಿನ ಭದ್ರತಾ ನೀತಿಯ ಮುಂದೆ ಆ ಎಲ್ಲಾ ಪ್ರಯತ್ನಗಳು ವಿಫಲವಾಗಿವೆ.

ವಿಶ್ವದ ಅತಿ ದೊಡ್ಡ ಫುಟ್‌ಬಾಲ್ ಹಬ್ಬದಲ್ಲಿ ಇತಿಹಾಸ ಬರೆಯಬೇಕಾಗಿದ್ದ ಆಫ್ರಿಕಾದ ಶ್ರೇಷ್ಠ ರೆಫರಿಯೊಬ್ಬರ ಕನಸು ಕೇವಲ ಭದ್ರತಾ ಶಂಕೆಯ ಕಾರಣಕ್ಕೆ ಕೊನೆಯ ನಿಮಿಷದಲ್ಲಿ ಮುರಿದುಬಿದ್ದಿರುವುದು ಫುಟ್‌ಬಾಲ್ ಪ್ರೇಮಿಗಳಲ್ಲಿ ತೀವ್ರ ನಿರಾಶೆ ಮೂಡಿಸಿದೆ ಎಂದರೆ ತಪ್ಪಾಗದು, (ಏಜನ್ಸೀಸ್​).