ಹೆಣ್ಣುಮಕ್ಕಳು ಇದನ್ನು ಒಪ್ಪಿಕೊಳ್ಳುವುದು ಸರಿಯಲ್ಲ: ಬುರ್ಖಾ, ಪರ್ದಾ ವಿರುದ್ಧ ಇಮ್ತಿಯಾಜ್ ಅಲಿ ಆಕ್ರೋಶ! Imtiaz Ali on Burqa

ಮುಂಬೈ: ಬಾಲಿವುಡ್​ನಲ್ಲಿ ತನ್ನ ವಿಭಿನ್ನ ಶೈಲಿಯ ನಿದೇರ್ಶನದ ಮೂಲಕ ಪ್ರೇಕ್ಷಕರ ಅದರಲ್ಲೂ ಯುವ ಸಮುದಾಯದ ಮೆಚ್ಚುಗೆಗೆ ಪಾತ್ರರಾದ ನಿರ್ದೇಶಕರಲ್ಲಿ ಇಮ್ತಿಯಾಜ್​ ಅಲಿ ಪ್ರಮುಖರು.

ರಾಕ್​ಸ್ಟಾರ್​, ತಮಾಷಾ, ಜಬ್​ ವಿ ಮೆಟ್​, ಅಮರ್​ ಸಿಂಗ್​ ಚಮ್ಕಿಲಾ ಮೊದಲಾದ ಸಿನಿಮಾಗಳ ಮೂಲಕ ಜನ ಮನ್ನಣೆ ಪಡೆದಿರುವ ನಿರ್ದೇಶಕ ಇತ್ತೀಚೆಗೆ ಸ್ತ್ರೀಯರು ಬುರ್ಖಾ ಧರಿಸುವ (Imtiaz Ali on Burqa) ಮತ್ತು ಪರ್ದಾ ಪದ್ಧತಿ ಬಗ್ಗೆ ಖಾರವಾಗಿ ಮಾತನಾಡಿದ್ದಾರೆ. 

ಇತ್ತೀಚೆಗೆ ಯೂಟ್ಯೂಬ್​ ಚಾನೆಲ್​ವೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡಿರುವ ಇಮ್ತಿಯಾಜ್ ಅಲಿ, ನನಗೆ ಯಾವುದಾದರೂ ಹೆಣ್ಣು ನಾನು ಬುರ್ಖಾ ಧರಿಸಿ ಖುಷಿಯಾಗಿದ್ದಿನಿ, ನಾನು ನನ್ನ ಪರ್ದಾದಲ್ಲಿ ಸಂತೋಷವಾಗಿದ್ದಿನಿ ಎಂದತೆ ಸಹಿಸಲು ಸಾಧ್ಯವಾಗುವುದಿಲ್ಲ. ನಿಮ್ಮ ಬಾಯಲ್ಲಿ ಈ ರೀತಿ ಮಾತು ಬರುತ್ತದೆ ಎಂದರೆ, ನೀವು ನಿಮ್ಮ ಮನಸ್ಸಲ್ಲಿ ನಿಮ್ಮನ್ನೇ ಬಲಿಪಶು ಮಾಡಿಕೊಂಡಿದ್ದಿರಿ ಎಂದರ್ಥ ಎಂದು ಅಲಿ ಹೇಳಿದ್ದಾರೆ. 

ಉಡುಪು- ಉಡುಗೆ ಎನ್ನುವುದು ವ್ಯಕ್ತಿಗತವಾದ ವಿಷಯವಾಗಿದೆ, ಆದರೆ ಅದನ್ನು ನಾವೇಕೆ ತೊಡುತ್ತೆವೆಂಬ ಕಲ್ಪನೆ ನಮಗಿರಬೇಕು. ನಾನೇನು ನಿಮ್ಮನ್ನು ವಿರೋಧಿಸುತ್ತಿಲ್ಲ, ಹಾಗೆಯೇ ನಾನೇನು ನಿಮ್ಮ ಶತ್ರುವು ಅಲ್ಲ. ಆದರೆ ಇತ್ತೀಚೆಗೆ ಏನೇ ಹೇಳಿದರು ಅದು ವಿವಾದ ಆಗುತ್ತಿದೆ. ಜನ ಬಹಳ ವಿಪರೀತ ತೀವ್ರಗಾಮಿಗಳಾಗುತ್ತಿದ್ದಾರೆ ಅನ್ನಿಸುತ್ತದೆ ಎಂದು ಅಲಿ ಹೇಳಿದ್ದಾರೆ. 

ಇಮ್ತಿಯಾಜ್ ಅಲಿ ಭಾರತೀಯ ಚಲನಚಿತ್ರ ರಂಗದ ಅತ್ಯಂತ ಪ್ರಭಾವಶಾಲಿ ಮತ್ತು ಜನಪ್ರಿಯ ಚಲನಚಿತ್ರ ನಿರ್ದೇಶಕ, ಚಿತ್ರಕಥೆಗಾರ ಹಾಗೂ ನಿರ್ಮಾಪಕರಾಗಿದ್ದಾರೆ. 1971 ರ ಜೂನ್ 16 ರಂದು ಬಿಹಾರದ ಜಮ್‌ಶೆಡ್‌ಪುರದಲ್ಲಿ ಜನಿಸಿದ ಇವರು, ತಮ್ಮ ವಿಶಿಷ್ಟ ಶೈಲಿಯ ಪ್ರೇಮಕಥೆಗಳು ಮತ್ತು ಆಧುನಿಕ ಸಂಬಂಧಗಳ ಆಳವಾದ ಚಿತ್ರಣಕ್ಕೆ ಹೆಸರುವಾಸಿಯಾಗಿದ್ದಾರೆ. 

2005 ರಲ್ಲಿ ಅಭಯ್ ಡಿಯೋಲ್ ನಟನೆಯ ಸೋಚಾ ನಾ ಥಾ ಚಿತ್ರದ ಮೂಲಕ ಬಾಲಿವುಡ್‌ಗೆ ನಿರ್ದೇಶಕರಾಗಿ ಪಾದಾರ್ಪಣೆ ಮಾಡಿದ ಇಮ್ತಿಯಾಜ್ ಅಲಿ, ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಯಶಸ್ಸು ಕಾಣದಿದ್ದರೂ ವಿಮರ್ಶಕರಿಂದ ಉತ್ತಮ ಪ್ರಶಂಸೆ ಪಡೆದರು. ಆದರೆ, 2007 ರಲ್ಲಿ ಬಿಡುಗಡೆಯಾದ ಶಾಹಿದ್ ಕಪೂರ್ ಮತ್ತು ಕರೀನಾ ಕಪೂರ್ ಅಭಿನಯದ ಜಬ್ ವಿ ಮೆಟ್ ಚಿತ್ರ ಇವರ ವೃತ್ತಿಜೀವನಕ್ಕೆ ದೊಡ್ಡ ತಿರುವು ನೀಡಿತು. 

ಆನಂತರ ಇವರು ನಿರ್ದೇಶಿಸಿದ ಲವ್ ಆಜ್ ಕಲ್ (2009), ರಣಬೀರ್ ಕಪೂರ್ ನಟನೆಯ ರಾಕ್‌ಸ್ಟಾರ್ (2011) ಮತ್ತು ತಮಾಷಾ (2015) ಹಾಗೂ ರಣದೀಪ್ ಹೂಡಾ ಮತ್ತು ಆಲಿಯಾ ಭಟ್ ನಟನೆಯ ಹೈವೇ (2014) ಚಿತ್ರಗಳು ಇವರಿಗೆ ಅಪಾರ ಅಭಿಮಾನಿ ಬಳಗವನ್ನು ತಂದುಕೊಟ್ಟವು. 

2024 ರಲ್ಲಿ ಬಿಡುಗಡೆಯಾದ ದಿಲ್ಜಿತ್ ದೋಸಾಂಜ್ ನಟನೆಯ ಅಮರ್ ಸಿಂಗ್ ಚಮ್ಕಿಲಾ ವಿಮರ್ಶಕರಿಂದ ಮತ್ತು ಪ್ರೇಕ್ಷಕರಿಂದ ಅದ್ಭುತ ಪ್ರತಿಕ್ರಿಯೆ ಗಳಿಸಿದೆ. ಇದೀಗ ಮತ್ತೆ ದಿಲ್ಜಿತ್ ದೋಸಾಂಜ್ ಹಾಗೂ ಶರ್ವರಿ ವಾಘ್​ ಜೋಡಿ ಮೂಲಕ ಮೇ ವಾಪಸ್​ ಆವುಂಗಾ ಎಂಬ ಸಿನಿಮಾವನ್ನು ಬಿಡುಗಡೆ ಮಾಡಿದ್ದಾರೆ, (ಏಜನ್ಸೀಸ್​).