ಪಶ್ಚಿಮ ಬಂಗಾಳದ ದಕ್ಷಿಣ 24 ಪರಗಣ ಜಿಲ್ಲೆಯ ಖುರ್ಸಿದ್ ಅಹಮ್ಮದ್ ಎಂದಿನಂತೆ ಶುಕ್ರವಾರವೂ ಕಾರಿನ ಬಾಡಿಗೆಗಾಗಿ ಕಾಯುತ್ತಿದ್ದರು. ಆ್ಯಪ್ ಆಧಾರಿತ ಕ್ಯಾಬ್ ಸೇವೆಯಲ್ಲಿ ಕಾರು ಚಾಲಕನಾಗಿ ಕೆಲಸ ಮಾಡುವ ಅವರಿಗೆ ರಶ್ಮೋನಿ ರಸ್ತೆಯಿಂದ ಪೂರ್ವ ಬುರ್ದ್ವಾನ್ಗೆ ಒಂದು ಬಾಡಿಗೆ ಸಿಕ್ಕಿದೆ. ಕ್ಯಾಬ್ ಬುಕ್ ಮಾಡಿದ್ದ ಮೂವರನ್ನು ಕಾರೊಳಗೆ ಹತ್ತಿಸಿಕೊಂಡ ಖುರ್ಸಿದ್ ಪೂರ್ವ ಬುರ್ದ್ವಾನ್ಗೆ ಅವರನ್ನು ಕರೆದೊಯ್ದಿದ್ದಾನೆ. ಅಲ್ಲಿಗೆ ತೆರಳಿದ ನಂತರ ಅಶ್ಗ್ರಾಮ್ನ ಗೋಬಿಂದರ್ಪುರಕ್ಕೆ ಕರೆದೊಯ್ಯಲು ಅವರು ಹೇಳಿದ್ದಾರೆ. ಅದರಂತೆ ಆತ ಮಾಡಿದ ನಂತರ ಶಕ್ತಿಗರ್ಗೆ ಕರೆದೊಯ್ಯಲು ಹೇಳಲಾಗಿದೆ. ಶಕ್ತಿಗರ್ ಕಡೆಗೆ ಹೋಗುವಾಗ ಆ ಮೂವರು ಖುರ್ಸಿದ್ ತಲೆಗೆ ಬಂದೂಕು ಇಟ್ಟಿದ್ದಾರೆ. ಆತನ ಬಾಯಿ, ಕೈ ಕಾಲನ್ನು ಕಟ್ಟಿ ಥಳಿಸಿದ್ದಾರೆ. ಅವನ ಜೇಬಿನಲ್ಲಿದ್ದ 7 ಸಾವಿರ ರೂಪಾಯಿ, ಗಾಡಿಯ ದಾಖಲೆಗಳಲ್ಲೆವನ್ನು ಕಿತ್ತುಕೊಂಡು, ಆತನನ್ನು ಗಾಡಿಯಿಂದ ಹೊರಗೆ ದಬ್ಬಿದ್ದಾರೆ. ಕೆಲವೇ ಕ್ಷಣದಲ್ಲಿ ಅಲ್ಲಿಂದ ಕಾಲ್ಕಿತ್ತಿದ್ದಾರೆ.
