ಬೋರ್​​ವೆಲ್​ ಗೋಲ್ಮಾಲ್​​

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಕರೊನಾ ನಿರ್ವಹಣೆ ಹಾಗೂ ವೈದ್ಯಕೀಯ ಉಪಕರಣಗಳ ಖರೀದಿಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಸರ್ಕಾರದ ವಿರುದ್ಧ ಆರೋಪ ಮಾಡುತ್ತಿರುವ ಪ್ರತಿಪಕ್ಷಗಳ ಹಾರಾಟಕ್ಕೆ ಕಡಿವಾಣ ಹಾಕಲು ಸರ್ಕಾರದ ಕೈಗೆ ಪ್ರಬಲ ಅಸ್ತ್ರವೊಂದು ಸಿಗುವ ಸಾಧ್ಯತೆ ಇದೆ. ಕಾಂಗ್ರೆಸ್ ಹಾಗೂ ಮೈತ್ರಿ ಸರ್ಕಾರಗಳ ಆಡಳಿತದ ಅವಧಿಯಲ್ಲಿ ಹಳ್ಳಿಗಳಿಗೆ ಕುಡಿಯುವ ನೀರು ಪೂರೈಸುವ ಹೆಸರಿನಲ್ಲಿ ಕೋಟ್ಯಂತರ ರೂಪಾಯಿ ‘ಬೋರ್​ವೆಲ್ ಗೋಲ್ಮಾಲ್’ ನಡೆದಿರುವ ಸಂಗತಿ ಬೆಳಕಿಗೆ ಬಂದಿದೆ.

ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆಯು (ಕೋಲಾರ ಉಪವಿಭಾಗ) ಕೋಲಾರ, ತುಮಕೂರು ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಗಳಲ್ಲಿ 2017-18, 2018-19ರಲ್ಲಿ 400ಕ್ಕೂ ಅಧಿಕ ಬೋರ್​ವೆಲ್ ಕೊರೆಸಿರುವುದಾಗಿ ಹೇಳಿ ಕೋಟ್ಯಂತರ ರೂ. ಹಣ ಬಿಡುಗಡೆ ಮಾಡಲಾಗಿದೆ. ಆದರೆ, ಇದರಲ್ಲಿ ಶೇ.40ಕ್ಕಿಂತ ಹೆಚ್ಚು ಕಡೆ ಕೊಳವೆಬಾವಿಗಳನ್ನೇ ಕೊರೆಯದಿದ್ದರೂ ಕೊರೆದಿರುವು ದಾಗಿ ಹಣ ಬಿಡುಗಡೆ ಮಾಡಿರು ವುದು ದೃಢಪಟ್ಟಿದೆ. ಇದೇ ರೀತಿ ರಾಜ್ಯಾದ್ಯಂತ ಕಳ್ಳಾಟ ನಡೆದಿರುವ ಬಗ್ಗೆ ಇಲಾಖೆಯ ಅಧಿಕಾರಿಗಳು ಹಾಗೂ ಭೂ ವಿಜ್ಞಾನಿಗಳೇ ಅನುಮಾನ ವ್ಯಕ್ತಪಡಿಸಿದ್ದಾರೆ.

ಬೋರ್​ವೆಲ್ ಕೊರೆದಿರುವ ಬಗ್ಗೆ ಆಯಾ ಗ್ರಾಮ ಪಂಚಾಯಿತಿ, ಪಿಡಿಒ ಹಾಗೂ ವಾಟರ್​ವುನ್​ಗಳಿಗೇ ಗೊತ್ತಿಲ್ಲ. ಆದರೂ ಕೊಳವೆಬಾವಿ ಕೊರೆಯಲಾಗಿದೆ ಎಂದು ಇಲಾಖೆಯಿಂದ ಗುತ್ತಿಗೆದಾರರಿಗೆ ಹಣ ಬಿಡುಗಡೆಯಾಗಿದೆ. ಮತ್ತೆ ಕೆಲವೆಡೆ 900 ಅಡಿ ಬೋರ್​ವೆಲ್ ಕೊರೆದಿದ್ದರೂ, 1400ಕ್ಕೂ ಹೆಚ್ಚು ಅಡಿ ಕೊರೆಯಲಾಗಿದೆ ಎಂದು ಬಿಲ್ ಸೃಷ್ಟಿಸಿ ಹಣ ಲಪಟಾಯಿಸಲಾಗಿದೆ. ಬೋರ್​ವೆಲ್ ಕೊರೆದಿರುವ ಆಳದ ಬಗ್ಗೆ ಗ್ರಾಮಸ್ಥರು ಹಾಗೂ ಪಂಚಾಯಿತಿ ಸದಸ್ಯರು ಹೇಳುವ ಲೆಕ್ಕವೇ ಬೇರೆ, ಇಲಾಖೆ ಹಣ ಬಿಡುಗಡೆ ಮಾಡಿರುವ ಲೆಕ್ಕವೇ ಬೇರೆಯಾಗಿದೆ.

ಹಳ್ಳಿಗಳಿಗೆ ಹೋಗಿ ಪರಿಶೀಲನೆ: ಬೆಂಗಳೂರಿನ ಖಾಸಗಿ ಕಂಪನಿಯ ಕಾನೂನು ಸಲಹೆಗಾರ ಕೋಲಾರ ಮೂಲದ ಎಚ್.ಜಿ. ಅನಿಲ್ ಕುಮಾರ್ ಕೋಲಾರ ಉಪ ವಿಭಾಗದಲ್ಲಿ ಕೊರೆದಿರುವ ಕೊಳವೆಬಾವಿಗಳ ಮಾಹಿತಿ ಹಾಗೂ ದಾಖಲೆಯನ್ನು ಆಯೋಗದ ಮೆಟ್ಟಿಲೇರಿ, 1 ವರ್ಷ ಹೋರಾಡಿ ಪಡೆದಿದ್ದಾರೆ. ಅವುಗಳಲ್ಲಿ ಉಲ್ಲೇಖಿಸಿ ರುವ ಕೆಲ ಹಳ್ಳಿಗಳಿಗೆ ಭೇಟಿ ಕೊಟ್ಟು ಪರಿಶೀಲಿಸಿದ್ದಾರೆ. ಗ್ರಾಮದ ಜನರು, ವಾಟರ್​ವುನ್, ಗ್ರಾ.ಪಂ. ಸದಸ್ಯರನ್ನೇ ಖುದ್ದು ಬೋರ್​ವೆಲ್ ಕೊರೆದಿದೆ ಎನ್ನಲಾದ ಜಾಗಕ್ಕೆ ಕರೆದೊಯ್ದು ಅವರ ಹೇಳಿಕೆಗಳನ್ನು ದಾಖಲಿಸಿಕೊಂಡಿದ್ದಾರೆ. ಸಂಗ್ರಹಿಸಿರುವ ಎಲ್ಲ ದಾಖಲಾತಿಗಳನ್ನು ಇಲಾಖೆ ಆಯುಕ್ತರಿಗೆ ರವಾನಿಸಿದ್ದಾರೆ.

ಅಧಿಕಾರಿಗಳೇ ಶಾಮೀಲು

ಈ ಅಕ್ರಮದಲ್ಲಿ ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆಯ ಅಧಿಕಾರಿಗಳೇ ಶಾಮೀಲಾಗಿರುವ ಆರೋಪ ಕೇಳಿಬಂದಿದೆ. ಗುತ್ತಿಗೆ ಮಂಜೂರು ಮಾಡುವ ಅಧಿಕಾರಿ, ಸ್ಥಳ ಪರಿಶೀಲನೆ ನಡೆಸುವ ಅಧಿಕಾರಿ, ಭೂ ವಿಜ್ಞಾನಿ, ಜೂನಿಯರ್ ಇಂಜಿನಿಯರ್, ಸಹಾಯಕ ಅಭಿಯಂತರರೇ ನೇರವಾಗಿ ಜವಾಬ್ದಾರಿ ಹೊತ್ತಿರುತ್ತಾರೆ. ಹೀಗಾಗಿ ಅಧಿಕಾರಿಗಳು ಭಾಗಿ ಯಾಗದೆ ಅಕ್ರಮ ನಡೆಯಲು ಸಾಧ್ಯವಿಲ್ಲ.

ದಾಖಲೆಗಳಿಂದ ದೃಢ

ಅಕ್ರಮ ತಡೆಯುವ ಉದ್ದೇಶದಿಂದಲೇ ಪ್ರತಿಯೊಂದು ಬೋರ್​ವೆಲ್ ಕೊರೆಯಲು ಜಿಪಿಎಸ್ ಲೊಕೇಷನ್ ಜಾರಿಗೆ ತರಲಾಗಿದೆ. ಆದರೆ, ಒಂದೇ ಜಿಪಿಎಸ್ ಲೊಕೇಷನ್​ನಲ್ಲಿ ಬೇರೆಬೇರೆ ದಿನಾಂಕಗಳಲ್ಲಿ ಬೋರ್​ವೆಲ್ ಕೊರೆದಿರುವಂತೆ ಹಣ ಬಿಡುಗಡೆ ಮಾಡಿಸಿಕೊಂಡಿರುವುದು ಕೂಡ ಲಭ್ಯವಿರುವ ದಾಖಲೆಗಳಿಂದ ದೃಢಪಟ್ಟಿದೆ.

ಅಕ್ರಮ ಪ್ರಕರಣಗಳು

• ಕೋಲಾರ ತಾಲೂಕಿನ ಅಮೇರಹಳ್ಳಿ ಗ್ರಾಮದಲ್ಲಿ 2018-19ರಲ್ಲಿ 4 ಬೋರ್​ವೆಲ್ ಕೊರೆದಿರುವುದಾಗಿ (2 ಸಫಲ, 1 ವಿಫಲ, 1 ರೀಡ್ರಿಲ್) ಬಿಲ್ ಮಾಡಿಸಿಕೊಳ್ಳಲಾಗಿದೆ. ಸಫಲವಾಗಿರುವ ಎರಡೂ ಬೋರ್​ವೆಲ್​ಗಳ ಜಿಪಿಎಸ್ ಉತ್ತರ-13.07.316, ಪೂರ್ವ 78.06.002 ಒಂದೇ ಇದೆ. ಆದರೆ, 3 ತಿಂಗಳ ಅವಧಿಯಲ್ಲಿ ಬೇರೆ ಬೇರೆ ಯೋಜನೆಗಳಡಿ ಬಿಲ್ ಸೃಷ್ಟಿಸಿ ಹಣ ಬಿಡುಗಡೆ ಮಾಡಲಾಗಿದೆ.
• ಬೆತ್ತನಿ ಗ್ರಾಮದಲ್ಲೂ ಇದೇ ರೀತಿ ಮಾಡಲಾಗಿದೆ. ಒಂದೇ ಜಿಪಿಎಸ್​ನ ಕೊಳವೆಬಾವಿಗೆ ಒಂದೇ ದಿನಾಂಕದಲ್ಲಿ 1 ಸಫಲ, ಇನ್ನೊಂದು ರೀಡ್ರಿಲ್ ಎಂದು ತೋರಿಸಿ ಬಿಲ್ ಮಾಡಲಾಗಿದೆ. ಹಲವು ಗ್ರಾಮಗಳಲ್ಲಿ ಇದೇ ರೀತಿ ಗೋಲ್‍ಮಾಲ್ ನಡೆದಿದೆ. ಇನ್ನು ಪ್ರತಿ ಗ್ರಾಮದಲ್ಲಿ ಅಂತರ್ಜಲಮಟ್ಟ ಬೇರೆಬೇರೆಯಾಗಿರುತ್ತದೆ. ಹೀಗಾಗಿ ನಿಯಮದ ಪ್ರಕಾರ ಬೋರ್​ವೆಲ್ ಕೊರೆದ ಆಳ ಆಧರಿಸಿ ಹಣ ಬಿಡುಗಡೆ ಮಾಡಬೇಕು. ಆದರೆ, ಬಿಲ್ ಮಾಡಿಸಿಕೊಂಡಿರುವ ಎಲ್ಲ ಕೊಳವೆಬಾವಿಗಳ ಆಳವನ್ನು 1400 ಅಡಿಗಳಿಗಿಂತ ಮೇಲ್ಪಟ್ಟು ತೋರಿಸಲಾಗಿದೆ. ಅಲ್ಲದೇ ಹೊಸ ಬೋರ್​ವೆಲ್​ಗೆ 3 ಲಕ್ಷ ರೂ. ಹಾಗೂ ರೀ ಬೋರ್​ಗೆ 2 ಲಕ್ಷ ರೂ. ನಿಗದಿಪಡಿಸಲಾಗಿದೆ.

ರಿಗ್ ಇಲ್ಲದವರಿಗೂ ಗುತ್ತಿಗೆ

ನಿಯಮಾವಳಿ ಪ್ರಕಾರ ರಿಗ್ ಇರುವವರಿಗೆ ಮಾತ್ರವೇ ಕೊಳವೆಬಾವಿ ಕೊರೆಯುವ ಕಾಂಟ್ರಾಕ್ಟ್ ಕೊಡಬೇಕಿದೆ. ಆದರೆ, ರಿಗ್ ಇಲ್ಲದವರಿಗೂ ಗುತ್ತಿಗೆ ನೀಡಲಾಗಿದೆ. ಗುತ್ತಿಗೆ ಪಡೆದ ಕಾಂಟ್ರಾಕ್ಟರ್ ತಮಿಳುನಾಡು, ಆಂಧ್ರಪ್ರದೇಶ ಸೇರಿ ಬೇರೆ ರಾಜ್ಯಗಳಿಂದ ರಿಗ್ ತರಿಸಿ ಇಲ್ಲಿ ಬೋರ್​ವೆಲ್ ಕೊರೆಸುತ್ತಿರುವ ಪ್ರಕರಣಗಳೂ ವರದಿಯಾಗಿವೆ.

ವಂಚನೆ ಹೇಗೆ?

• ವಿಫಲ ಬೋರ್​ವೆಲ್ ಜಾಗದಲ್ಲೇ ಮತ್ತೆ ಹೊಸದಾಗಿ ಕೊರೆದಂತೆ ದಾಖಲೆ ಸೃಷ್ಟಿ
• ರೀಬೋರ್ ಮಾಡಿದಂತೆ ಒಂದೇ ಜಿಪಿಎಸ್ ತೋರಿಸಿ ಹಲವು ಬಿಲ್ ಬಿಡುಗಡೆ
• ಬೋರ್​ವೆಲ್ ಕೊರೆದಿರುವ ಬಗ್ಗೆ ಗ್ರಾಮಸ್ಥರು, ಪಿಡಿಒಗಳಿಗೇ ಮಾಹಿತಿ ಇಲ್ಲ
• ಎಲ್ಲ ಕೊಳವೆಬಾವಿಗಳ ಆಳವನ್ನು ಏಕರೂಪವಾಗಿ 1400 ಅಡಿಗಿಂತ ಮೇಲ್ಪಟ್ಟು ಎಂದು ತೋರಿಸಲಾಗಿದೆ
• ಕಡ್ಡಾಯವಾಗಿ ಮಾಡಿಸಬೇಕಾದ ಥರ್ಡ್ ಪಾರ್ಟಿ ಇನ್​ಸ್ಪೆಕ್ಷನ್ ಮಾಡಿಸಿಯೇ ಇಲ್ಲ
• ಐಎಸ್​ಐ ಮಾರ್ಕ್​ನ ಕೇಸಿಂಗ್ ಪೈಪ್ ಬಳಸಿರುವುದಾಗಿ ದಾಖಲೆಗಳಲ್ಲಿ ಉಲ್ಲೇಖ
• ಭೂಭೌತ ವಿಜ್ಞಾನಿಗಳಿಂದ ಸರ್ವೆಕ್ಷಣೆ ನಡೆಸದೆಯೇ ಬೋರ್​ವೆಲ್ ಕೊರೆಸಲಾಗಿದೆ.

ನಿಯಮವೇನು?

1. ಕೊಳವೆಬಾವಿ ಅಗತ್ಯತೆ ಬಗ್ಗೆ ಗ್ರಾಮ ಪಂಚಾಯಿತಿಯಿಂದ ಮನವಿ ಪತ್ರ ಬರಬೇಕು
2. ಬೋರ್​ವೆಲ್ ಕೊರೆಸುವ ಕುರಿತು ಗ್ರಾಮ ಪಂಚಾಯಿತಿಗೆ ಮಾಹಿತಿ ಕೊಡಬೇಕು
3. ಭೂ ವಿಜ್ಞಾನಿ ಸ್ಥಳಕ್ಕೆ ಭೇಟಿ ಕೊಟ್ಟು ಪರಿಶೀಲನೆ ನಡೆಸಿ ದೃಢೀಕರಣ ಪತ್ರ ಕೊಡಬೇಕು
4. ಕೊರೆದ ಬಳಿಕ ಕಡ್ಡಾಯವಾಗಿ ಭಾವಚಿತ್ರ ಸಹಿತ ಸ್ಥಳದ ದೃಢೀಕರಣ ಪಡೆದಿರಬೇಕು
5. ಕೊಳವೆಬಾವಿ ಕೊರೆದಿರುವ ಕುರಿತು 3ನೇ ವ್ಯಕ್ತಿಯಿಂದ ಪರಿಶೀಲನೆ ನಡೆಸಬೇಕು
6. ಐಎಸ್​ಐ ಮಾರ್ಕ್ ಇರುವ 175 ಎಂಎಂ ಸ್ಟೀಲ್ ಕೇಸಿಂಗ್ ಪೈಪ್ ಅಳವಡಿಸಬೇಕು
7. ಬೋರ್​ವೆಲ್ ವಿಫಲವಾದರೆ ಕೇಸಿಂಗ್ ತೆಗೆದು ಅದನ್ನು ಪೂರ್ಣವಾಗಿ ಮುಚ್ಚಬೇಕು

https://www.vijayavani.net/kxip-share-pic-of-chris-gayles-tattoo-in-reply-to-rrs-best-cricket-tattoo-challenge/