ಮುಂಬೈ: ಜೇಮ್ಸ್ ಕ್ಯಾಮರಾನ್ ನಿರ್ದೇಶನದ ‘ಅವತಾರ್ – ದಿ ವೇ ಆಫ್ ವಾಟರ್’ ಚಿತ್ರವು ಡಿ. 16ಕ್ಕೆ ಬಿಡುಗಡೆಯಾಗಲಿದೆ ಎಂದು ಈಗಾಗಲೇ ಜಗಜ್ಜಾಹೀರಾಗಿದೆ. ಯಾವಾಗ ಚಿತ್ರದ ಟೀಸರ್ ಬಿಡುಗಡೆಯಾಯಿತೋ, ಆಗಿನಿಂದಲೇ ಚಿತ್ರದ ಬಗ್ಗೆ ಎಲ್ಲರಲ್ಲೂ ವಿಶೇಷವಾದ ಕುತೂಹಲವಿತ್ತು. ಈಗ ಚಿತ್ರದ ಟ್ರೇಲರ್ ಸಹ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ಶಿಲ್ಪಾ ಶೆಟ್ಟಿ ಗಂಡ ಮುಖಕ್ಕೆ ಮಾಸ್ಕ್ ಹಾಕಿಕೊಂಡೇ ಇರೋದು ಯಾಕೆ ಗೊತ್ತಾ?
‘ಅವತಾರ್’ ಚಿತ್ರವು ಬಿಡುಗಡೆಯಾಗಿದ್ದು 2009ರಲ್ಲಿ. ಆ ನಂತರ ಅದರ ಮುಂದುವರೆದ ಭಾಗಗಳನ್ನು ನಿರ್ದೇಶಿಸುವುದಾಗಿ ನಿರ್ದೇಶಕ ಜೇಮ್ಸ್ ಕ್ಯಾಮರಾನ್ ಹೇಳುತ್ತಲೇ ಇದ್ದರು. ಚಿತ್ರದ ಕೆಲಸಗಳನ್ನೂ ಪ್ರಾರಂಭಿಸಿದ್ದರು. ಇನ್ನೂ ಐದು ಭಾಗಗಳಲ್ಲಿ ಚಿತ್ರ ಮೂಡಿಬರಲಿದ್ದು, ಮೊದಲ ಭಾಗವಾಗಿ ಇದೇ ಡಿ. 16ರಂದು ‘ಅವತಾರ್ – ದಿ ವೇ ಆಫ್ ವಾಟರ್ಸ್’ ಮೊದಲು ಬಿಡುಗಡೆಯಾಗಲಿದೆ.
ಮೊದಲ ಚಿತ್ರದ ಕಥೆ ನಡೆದು ಒಂದು ದಶಕದ ನಂತರ ಈ ಭಾಗದ ಕಥೆ ನಡೆಯಲಿದೆಯಂತೆ. ಸಲ್ಲಿ ಕುಟುಂಬದ ಕಥೆ ಈ ಭಾಗದಲ್ಲೂ ಮುಂದುವರೆಯಲಿದ್ದು, ಅವರು ಬದುಕುವುದಕ್ಕೆ ಈ ಬಾರಿ ಏನೆಲ್ಲಾ ಹೋರಾಟಗಳನ್ನು ನಡೆಸುತ್ತಾರೆ, ಏನೆಲ್ಲಾ ಸವಾಲುಗಳನ್ನು ಎದುರಿಸುತ್ತಾರೆ ಎಂಬುದನ್ನು ಈ ಚಿತ್ರ ಹೇಳುತ್ತದೆ.
‘ಅವತಾರ್’ ಚಿತ್ರದಂತೆಯೇ ಈ ಚಿತ್ರದಲ್ಲೂ ಅದ್ಭುತವಾದ ವಿಷ್ಯುಯಲ್ಗಳಿದ್ದು, ಪ್ರೇಕ್ಷಕರು ಸಾಕಷ್ಟು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅದರಲ್ಲೂ ಅಂಡರ್ವಾಟರ್ ದೃಶ್ಯಗಳು ಚಿತ್ರದ ಹೈಲೈಟ್ಗಳೆಂದು ಹೇಳಲಾಗುತ್ತಿದೆ. ಇನ್ನು, ಚಿತ್ರದ ಹಿನ್ನೆಲೆ ಸಂಗೀತ ಸಹ ಕೇಳುಗರ ಮನಸ್ಸು ಗೆದ್ದಿದ್ದು, ಈ ಚಿತ್ರವು ಮೊದಲ ಚಿತ್ರವನ್ನೂ ಮೀರಿಸಲಿದೆ ಎಂದು ನೆಟ್ಟಿಗರು ಈಗಾಗಲೇ ಭವಿಷ್ಯ ನುಡಿದಿದ್ದಾರೆ.
ಇದನ್ನೂ ಓದಿ: ‘ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ’ ಚಿತ್ರಕ್ಕೆ ಸಾಥ್ ಕೊಟ್ಟ ರಮ್ಯಾ … ಹೇಗೆ ಗೊತ್ತಾ?
‘ಅವತಾರ್ – ದಿ ವೇ ಆಫ್ ವಾಟರ್ಸ್’ ಚಿತ್ರವು 3ಡಿಯಲ್ಲದೆ, ಐಮ್ಯಾಕ್ಸ್ನಲ್ಲೂ ಬಿಡುಗಡೆಯಾಗಲಿದೆ. ಮೂಲ ಚಿತ್ರದಲ್ಲಿದ್ದ ಸ್ಯಾಮ್ ವರ್ಥಿಂಗ್ಟನ್, ಜೋ ಸಲ್ದಾನ, ಸ್ಟೀಫನ್ ಲ್ಯಾಂಗ್ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ.