ಬಿಜೆಪಿ ಶಾಸಕನ ಜೀಪಿನಲ್ಲಿ ಇವಿಎಂ ಪತ್ತೆ: ಚುನಾವಣೆಯನ್ನೇ ಕದಿಯುವ ಯತ್ನ ಎಂದು ಕಾಂಗ್ರೆಸ್ ವ್ಯಂಗ್ಯ!​

ದಿಸ್ಪುರ್: ಅಸ್ಸಾಂ ವಿಧಾನಸಭಾ ಚುನಾವಣೆಯ ಎರಡನೇ ಹಂತದ ಮತದಾನ ಮುಗಿದ ಕೆಲವೇ ಗಂಟೆಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋವೊಂದು ಹರಿದಾಡುತ್ತಿದ್ದು, ಬಿಜೆಪಿ ಶಾಸಕರದ್ದು ಎನ್ನಲಾದ ಜೀಪಿನಲ್ಲಿ ಎಲೆಕ್ಟ್ರಾನಿಕ್​ ವೋಟಿಂಗ್​ ಮೆಷಿನ್​ (ಇವಿಎಂ) ಸಾಗಿಸುತ್ತಿರುವ ಆರೋಪ ಕೇಳಿಬಂದಿದೆ.

ಪಥರ್​ಕಂಡಿ ಕ್ಷೇತ್ರದ ಬಿಜೆಪಿ ಶಾಸಕ ಕೃಷ್ಣೆಂದು ಪೌಲ್​ ವಿರುದ್ಧ ಆರೋಪ ಕೇಳಿಬಂದಿದೆ. ವಿಡಿಯೋವನ್ನು ಅಸ್ಸಾಂ ಮೂಲದ ಹಿರಿಯ ಪತ್ರಕರ್ತ ಅಟಾನು ಭುಯಾನ್​ ಎಂಬುವರು ಟ್ವೀಟ್​ ಮಾಡಿದ್ದು, ಈ ಘಟನೆಯಿಂದ ಪಥರ್​ಕಂಡಿಯಲ್ಲಿ ಪರಿಸ್ಥಿತಿ ಬಿಗಡಾಯಿಸಿದೆ.

ವಿಡಿಯೋದಲ್ಲಿ ಎಎಸ್​ 10ಬಿ 0022 ನಂಬರ್​ನ ಬಿಳಿ ಬಣ್ಣದ ಜೀಪ್​ನಲ್ಲಿ ಇವಿಎಂ ಇರುವುದನ್ನು ನೋಡಬಹುದಾಗಿದೆ. ಆ ಜೀಪ್​ ಶಾಸಕ ಕೃಷ್ಣೆಂದು ಪೌಲ್​ ಅವರಿಗೆ ಸಂಬಂಧಿಸಿದ್ದು ಎಂದು ಜನರು ಕೂಗುವುದನ್ನು ವಿಡಿಯೋದಲ್ಲಿ ಕೇಳಬಹುದು.

ಇದನ್ನೂ ಓದಿರಿ: ಮಂಗಳೂರಿನಲ್ಲಿ ನೈತಿಕ ಪೊಲೀಸ್ ಗಿರಿ: ಅರೆಬೆತ್ತಲೆ ಯುವಕ-ಯುವತಿಯರನ್ನು ಥಳಿಸಿದ ಬೆನ್ನಲ್ಲೇ ಮತ್ತೊಂದು ಘಟನೆ

ಬಿಜೆಪಿ ಕಾಲೆಳೆದ ಕಾಂಗ್ರೆಸ್​

ಚುನಾವಣೆಯನ್ನೇ ಕಳವು ಮಾಡಲು ಬಿಜೆಪಿ ಯತ್ನಿಸುತ್ತಿದೆ ಎಂದು ಕಾಂಗ್ರೆಸ್​ ವ್ಯಂಗ್ಯವಾಡಿದೆ. ಘಟನೆ ಕುರಿತು ಅನೇಕ ನಾಯಕರು ಟ್ವೀಟ್​ ಮಾಡಿದ್ದು, ಇವಿಎಂ ಪತ್ತೆಯಾಗಿದ್ದರ ಬಗ್ಗೆ ಸೂಕ್ತ ತನಿಖೆ ನಡೆಯಬೇಕೆಂದು ಆಗ್ರಹಿಸಿದ್ದಾರೆ. ಸೂಕ್ರ ಕ್ರಮ ತೆಗೆದುಕೊಳ್ಳದಿದ್ದರೆ ಚುನಾವಣೆಯನ್ನೇ ಬಹಿಷ್ಕರಿಸುವುದಾಗಿ ಎಚ್ಚರಿಕೆ ಹಾಕಿದ್ದಾರೆ.

ಪ್ರಿಯಾಂಕಾ ವಾದ್ರಾ ವಾಗ್ದಾಳಿ

ಪ್ರತಿ ಬಾರಿ ಚುನಾವಣೆ ನಡೆದಾಗ ಇವಿಎಂ ಸಾಗಿಸುವ ಖಾಸಗಿ ವಾಹನ ಸಿಕ್ಕಿಬೀಳುವ ವಿಡಿಯೋ ವೈರಲ್​ ಆಗುತ್ತದೆ. ಈ ವೇಳೆ ಆಶ್ಚರ್ಯಕರವಲ್ಲದಂತೆ ಈ ಕೆಳಗಿನ ಅಂಶಗಳು ಸಾಮಾನ್ಯವಾಗಿರುತ್ತವೆ ಎಂದು ಮೂರು ಅಂಶಗಳನ್ನು ಪ್ರಿಯಾಂಕಾ ಟ್ವೀಟ್​ ಮಾಡಿದ್ದಾರೆ.

1. ಪತ್ತೆಯಾಗುವ ವಾಹನ ಬಿಜೆಪಿ ಅಭ್ಯರ್ಥಿ ಅಥವಾ ಅವರ ಆಪ್ತರಿಗೆ ಸಂಬಂಧಿಸಿದ್ದಾಗಿರುತ್ತದೆ.

2. ವಿಡಿಯೋವನ್ನು ಒಂದು ಘಟನೆಯನ್ನಾಗಿ ತೆಗೆದುಕೊಂಡು ಇಡೀ ಪ್ರಕರಣವನ್ನೇ ದಾರಿ ತಪ್ಪಿಸಲಾಗುತ್ತದೆ.

3. ಬಿಜೆಪಿ ತನ್ನ ಮಾಧ್ಯಮ ಮೆಷಿನರಿಯನ್ನು ಬಳಸಿಕೊಂಡು ವಿಡಿಯೋವನ್ನು ಬಹಿರಂಗಪಡಿಸಿದವರ ವಿರುದ್ಧ ಆರೋಪಗಳ ಸುರಿಮಳೆಗೈಯುತ್ತದೆ.

ಇದನ್ನೂ ಓದಿರಿ: ಇಂಥವರೂ ಇರ್ತಾರಾ? ವಿದ್ಯಾರ್ಥಿಗಳ ಹಿತ ಕಾಯಬೇಕಿದ್ದ ಮಹಿಳಾ ಪ್ರಾಂಶುಪಾಲರಿಂದ ತಲೆತಗ್ಗಿಸೋ ಕೃತ್ಯ!

ಇಂತಹ ಅನೇಕ ಘಟನೆಗಳು ಹೊರಬಂದಿದ್ದರೂ ಯಾವುದೂ ಸಹ ತಾರ್ಕಿತ ಅಂತ್ಯ ಕಂಡಿಲ್ಲ ಎಂದು ಪ್ರಿಯಾಂಕಾ, ಬಿಜೆಪಿ ವಿರುದ್ಧ ಹರಿಹಾಯ್ದಿದ್ದಾರೆ. ಆದರೆ, ಈ ಘಟನೆ ಬಗ್ಗೆ ಬಿಜೆಪಿಯಾಗಲಿ ಅಥವಾ ಚುನಾವಣಾ ಆಯೋಗವಾಗಲಿ ಇದುವರೆಗೂ ಯಾವುದೇ ಪ್ರತಿಕ್ರಿಯೆಯನ್ನು ನೀಡಿಲ್ಲ. (ಏಜೆನ್ಸೀಸ್​)

https://www.vijayavani.net/radha-ravi-slut-shames-nayanthara-on-stage-again/

https://www.vijayavani.net/street-banana-seller-banana-seller-retains-land-worth-rs-1-crore/

https://www.vijayavani.net/let-vijayavani-celebrate-centenary-siddaramaiah/