ಅರ್ಷದೀಪ್​ ಒಂದೇ ಓವರ್​ನಲ್ಲಿ​ 2 ಬಾರಿ ಮುರಿದು ಹಾಕಿದ ವಿಕೆಟ್​ಗಳ ಬೆಲೆ ಕೇಳಿದ್ರೆ ಬೆರಗಾಗ್ತೀರಾ!

ಮುಂಬೈ: ಮೊನ್ನೆ (ಏಪ್ರಿಲ್​ 22) ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಐಪಿಎಲ್​ ಪಂದ್ಯದಲ್ಲಿ ಪಂಜಾಬ್​ ಕಿಂಗ್ಸ್​ ವಿರುದ್ಧ ಮುಂಬೈ ಇಂಡಿಯನ್ಸ್​ ತಂಡ 13 ರನ್​ಗಳಿಂದ ಸೋಲುಂಡಿತು. ಟೂರ್ನಿಯ ದುಬಾರಿ ಆಟಗಾರ ಹಾಗೂ ಹಂಗಾಮಿ ನಾಯಕ ಸ್ಯಾಮ್ ಕರನ್ (55 ರನ್, 29 ಎಸೆತ, 5 ಬೌಂಡರಿ, 4 ಸಿಕ್ಸರ್) ಸ್ಪೋಟಕ ಅರ್ಧಶತಕ ಮತ್ತು ಎಡಗೈ ವೇಗಿ ಅರ್ಷದೀಪ್ ಸಿಂಗ್ (29ಕ್ಕೆ 4) ಮಾರಕ ಬೌಲಿಂಗ್ ದಾಳಿಯ ನೆರವಿನಿಂದ ಪಂಜಾಬ್ ಕಿಂಗ್ಸ್ ತಂಡ ಐಪಿಎಲ್-16ರಲ್ಲಿ ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ತಂಡವನ್ನು 13 ರನ್​ಗಳಿಂದ ಮಣಿಸಿತು.

ಇದನ್ನೂ ಓದಿ: ನೌಕಾನೆಲೆ ಜಾಗದಲ್ಲಿ ಪ್ರಧಾನಿ ಮೋದಿ ಸಮಾವೇಶಕ್ಕೆ ಅನುಮತಿ ಕೊಟ್ಟರೆ ಕಾಂಗ್ರೆಸ್ ಪ್ರತಿಭಟನೆ ಮಾಡುತ್ತದೆ: ಬಿ.ಕೆ.ಹರಿಪ್ರಸಾದ್

ಇಡೀ ಪಂದ್ಯದಲ್ಲಿ ಅರ್ಷದೀಪ್​ ತಮ್ಮ ಬೌಲಿಂಗ್​ನಿಂದ ಎಲ್ಲರ ಗಮನ ಸೆಳೆದರು. ಬ್ಯಾಕ್​ ಟು ಬ್ಯಾಕ್​ ಎರಡು ಎಸೆತದಲ್ಲಿ ಬೋಲ್ಡ್​ ಮಾಡಿದ್ದಲ್ಲದೆ, ಎರಡು ಬಾರಿಯು ವಿಕೆಟ್​ ಅನ್ನು ಮುರಿದು ಹಾಕಿದರು.

ವೇಗದ ಎಸೆತಕ್ಕೆ ಸಾಕ್ಷಿ

ಕೊನೆಯ ಓವರ್​ನಲ್ಲಿ ಮುಂಬೈ ಇಂಡಿಯನ್ಸ್​ ಗೆಲುವಿಗೆ 16 ರನ್​ ಅವಶ್ಯಕತೆ ಇತ್ತು. ಈ ವೇಳೆ ಅರ್ಷದೀಪ್​ ಬೌಲಿಂಗ್​ಗೆ ಇಳಿದಿದ್ದರು. ಮೊನೆಚಾದ ಬೌಲಿಂಗ್​ ದಾಳಿ ನಡೆಸಿದ ಅರ್ಷದೀಪ್​, ಮುಂಬೈ ತಂಡದ ತಿಲಕ್​ ವರ್ಮಾ ಮತ್ತು ನೆಹಾಲ್​ ವಧೀರಾರನ್ನು ಬ್ಯಾಕ್​ ಟು ಬ್ಯಾಕ್​ ಪೆವಲಿಯನ್​ಗೆ ಅಟ್ಟಿದರು. ಎರಡೂ ವಿಕೆಟ್​ ಕೂಡ ಬೋಲ್ಡ್​ ಆಗಿದ್ದು ಗಮನಾರ್ಹ. ಎರಡೂ ವಿಕೆಟ್​ ಮುರಿದ್ದಿದ್ದು ಅಚ್ಚರಿಯೂ ಹೌದು ಮತ್ತು ಅರ್ಷದೀಪ್​ ವೇಗದ ಎಸೆತಕ್ಕೆ ಸಾಕ್ಷಿಯಾಯಿತು. ಅಂತಿಮವಾಗಿ ಪಂಜಾಬ್​ ತಂಡ ವಿಜಯೋತ್ಸವವನ್ನು ಆಚರಿಸಿತು.

ಲಕ್ಷಾಂತರ ಮೌಲ್ಯದ ಸ್ಟಂಪ್ಸ್

ಮತ್ತೊಂದು ಅಚ್ಚರಿಯ ಸಂಗತಿ ಏನೆಂದರೆ, ಐಪಿಎಲ್​ನಲ್ಲಿ ಬಳಸುವ ಸ್ಟಂಪ್​ಗಳು ಸಾಮಾನ್ಯ ಸ್ಟಂಪ್​ಗಳಲ್ಲ. ತುಂಬಾ ದುಬಾರಿಯಾಗಿವೆ. ಅವು ಎಲ್​ಇಡಿ ಸ್ಟಂಪ್​ಗಳು. ಒಂದು ವಿಕೆಟ್​ ಮೌಲ್ಯ ಬರೋಬ್ಬರಿ 24 ಲಕ್ಷ ರೂ. ಇದೆ. ಎರಡು ವಿಕೆಟ್​ ಮುರಿದಿದ್ದರಿಂದ ಒಟ್ಟು 48 ಲಕ್ಷ ರೂ. ನಷ್ಟವಾಗಿದೆ. ಝಿಂಗ್ ಚೆಂಡುಗಳು ಮತ್ತು ಮೈಕ್ರೊಫೋನ್ ವೈರಿಂಗ್​ ಇರುವ ಎಲ್ಇಡಿಗಳು ತುಂಬಾ ದುಬಾರಿಯಾಗಿವೆ ಎಂದು ಸ್ವತಃ ಬಿಸಿಸಿಐ ತಿಳಿಸಿದೆ. ಎರಡು ಬಾರಿ ವಿಕೆಟ್​ ಮುರಿದ ಅರ್ಷದೀಪ್ ನೋಡಿ ಕ್ರೀಡಾಭಿಮಾನಿಗಳು ವಾವ್​ ಅರ್ಷದೀಪ್​ ಎನ್ನುತ್ತಿದ್ದಾರೆ. ​

ಇದನ್ನೂ ಓದಿ: “ಒಬ್ಬರ ಶಿಫ್ಟ್ ರಾತ್ರಿಯಾದರೆ ಇನ್ನೊಬ್ಬರದ್ದು ಬೆಳಗ್ಗೆ, ಮದುವೆ ಮುರಿಯುವ ಮುನ್ನ ಜತೆಗಿರಲು ಪ್ರಯತ್ನಿಸಿ” ಎಂದ ನ್ಯಾಯಾಲಯ!

ಪಂದ್ಯದ ವಿಚಾರಕ್ಕೆ ಬರುವುದಾದರೆ ವಾಂಖೆಡೆ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಪಂಜಾಬ್ ತಂಡ 8 ವಿಕೆಟ್​ಗೆ 214 ರನ್​ಗಳ ಬೃಹತ್ ಮೊತ್ತ ಕಲೆಹಾಕಿತು. ಕೊನೇ 6 ಓವರ್​ಗಳಲ್ಲಿ 10 ಸಿಕ್ಸರ್, 8 ಬೌಂಡರಿ ಸಹಿತ ಪಂಜಾಬ್ 109 ರನ್ ಸಿಡಿಸಿತು. ಪ್ರತಿಯಾಗಿ ಮುಂಬೈ ತಂಡ ಆಲ್ರೌಂಡರ್ ಕ್ಯಾಮರಾನ್ ಗ್ರೀನ್ (67 ರನ್, 43 ಎಸೆತ, 6 ಬೌಂಡರಿ, 3 ಸಿಕ್ಸರ್) ಹಾಗೂ ಸೂರ್ಯಕುಮಾರ್ ಯಾದವ್ (57 ರನ್, 26 ಎಸೆತ, 7 ಬೌಂಡರಿ, 3 ಸಿಕ್ಸರ್) ಅರ್ಧಶತಕದ ಹೋರಾಟದ ಹೊರತಾಗಿಯೂ 6 ವಿಕೆಟ್​ಗೆ 201 ರನ್​ಗಳಿಗೆ ತೃಪ್ತಿಪಟ್ಟಿತು. (ಏಜೆನ್ಸೀಸ್​)

https://www.vijayavani.net/31-runs-in-1-over-mi-pacer-arjun-tendulkar-becomes-part-of-unwanted-tally/