ಸರ್ಕಾರದ ಪಾತ್ರ: ಆಡಳಿತಗಾರರು ತಮ್ಮ ಅವಧಿ ಐದು ವರ್ಷಗಳ ಗುತ್ತಿಗೆ ಎಂದು ತಿಳಿಯಬಾರದು. ಅವರುಗಳು ಸಮಾಜದಲ್ಲಿನ ಕಾನೂನು ಪಾಲಿಸದವರ, ಸರ್ಕಾರಿ ಆದೇಶ ಧಿಕ್ಕರಿಸುವ ಮತ್ತು ಮಾನವೀಯತೆಯ ಶತ್ರುಗಳಂತೆ ವ್ಯವಹರಿಸುವವರನ್ನು ಗಂಭೀರವಾಗಿ ಪರಿಗಣಿಸಲೇಬೇಕು. ಆಳುವವರೇ ಕಾನೂನಿಗೆ ಅವಿಧೇಯರಾದಾಗ ಅವರಿಗೆ ಜನರು ವಿಧೇಯರಾಗಿರಲು ಸಾಧ್ಯವಿಲ್ಲ. ಗೊಲ್ಲನಿಲ್ಲದಿದ್ದರೆ ಗೋವುಗಳು ಚದುರಿಹೋಗುವಂತೆ ಯೋಗ್ಯ ರಾಜನಿಲ್ಲದಿದ್ದರೆ ರಕ್ಷಣೆ ಇಲ್ಲದೆ ಪ್ರಜೆಗಳು ನಾಶವಾಗುತ್ತಾರೆ! ಇಂದು ಬಹುತೇಕ ಆಡಳಿತಗಾರರು, ‘ನಿಮ್ಮ ಕೈ ಕೆಸರಾದರೆ ನಮ್ಮ ಬಾಯಿ ಮೊಸರು’ ಎಂಬ ಸಂದೇಶವನ್ನು ಪ್ರಜೆಗಳಿಗೆ ರವಾನಿಸುತ್ತಿದ್ದಾರೆಯೋ ಎಂಬಂತಿದೆ. ಆಡಳಿತಗಾರರು ವಿವೇಕಿಗಳ, ಪ್ರಾಜ್ಞರ ಸಕಾಲಿಕ ಸಲಹೆಗಳಿಗೆ ಓಗೊಡುತ್ತಿಲ್ಲ, ಅವರ ನಡೆನುಡಿಗಳಲ್ಲಿ ರಾಷ್ಟ್ರಭಕ್ತಿಯೆಂಬುದು ನಿರ್ಲಕ್ಷಿತವಾಗಿರುವುದು ದುರಂತವೇ ಸರಿ! ಇತರರನ್ನು ವಿನಾಕಾರಣ ವಿರೋಧಿಸುವ, ಗುಣಶಾಲಿಗಳನ್ನು ದ್ವೇಷಿಸುವ, ದೇವರಿಲ್ಲ-ಧರ್ಮ ಬೇಕಿಲ್ಲ ಎಂಬ ಉಡಾಫೆಯ ಮಾತುಗಳೇ ಆಡಳಿತಗಾರರ ಬಂಡವಾಳವಾಗಿ ರಾರಾಜಿಸುತ್ತಿದೆ. ‘ಮಾತಿನಲ್ಲಿ ಅರ್ಥ ಅಡಗಿದೆ, ಮಾತೇ ಅರ್ಥಕ್ಕೆ ಮೂಲ, ಮಾತಿನೊಂದಿಗೆ ಅರ್ಥವು ಬೆರೆತಿದೆ, ಮಾತನ್ನು ಸುಳ್ಳಾಗಿ, ತಪ್ಪಾಗಿ ಅರ್ಥೈಸುವುದು ಎಲ್ಲ ಅಪರಾಧಗಳನ್ನು ಮಾಡಿದಂತೆ’ ಎಂಬ ಕಟುಸತ್ಯವನ್ನು ಅರಿಯಲು ಅವರಿನ್ನೂ ಬಹುದೂರ ಸಾಗಬೇಕಿದೆ.
