ಸ್ಥಿರ ಆದಾಯಕ್ಕೆ ಡ್ರೋಣ್ ಕೃಷಿ!; ನವೀನ ತಂತ್ರಜ್ಞಾನ ಬಳಕೆಗೆ ಹೆಚ್ಚುತ್ತಿದೆ ಆಸಕ್ತಿ

| ಬಸವರಾಜ ಶಿವಪ್ಪ ಗಿರಗಾಂವಿ
ಸಹಾಯಕ ಮಹಾಪ್ರಬಂಧಕರು 
ಜಮಖಂಡಿ ಶುಗರ್ಸ್ ಲಿ. ಬಾಗಲಕೋಟೆ

ಹೆಚ್ಚುತ್ತಿರುವ ಖರ್ಚು, ಸಮಯದ ಅಭಾವ, ಕೂಲಿ ಕಾರ್ವಿುಕರ ಕೊರತೆ ಮತ್ತಿತರ ಕಾರಣಗಳಿಗೆ ಕೃಷಿ ಕ್ಷೇತ್ರದಲ್ಲಿ ನಿರಂತರವಾಗಿ ಆವಿಷ್ಕಾರಗಳು ನಡೆಯುತ್ತಲೇ ಇರುತ್ತವೆ. ವಿಶ್ವದೆಲ್ಲೆಡೆ ಕೃಷಿಯಿಂದ ಸ್ಥಿರವಾದ ಆದಾಯ ಪಡೆಯಲು ನವೀನ ತಂತ್ರಜ್ಞಾನ ಬಳಕೆಯೂ ಹೆಚ್ಚುತ್ತಿದೆ. ಕೃಷಿಯಲ್ಲಿ ತಂತ್ರಜ್ಞಾನಗಳ ಸಮರ್ಪಕ ಬಳಕೆಯಿಂದ ಇಸ್ರೇಲ್, ಚೀನಾ ಹಾಗೂ ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿ ಉತ್ತಮ ಸಾಧನೆ ಸಾಧ್ಯವಾಗಿದೆ. ಇಂತಹ ತಂತ್ರಜ್ಞಾನದ ಭಾಗವಾಗಿ ಭವಿಷ್ಯದಲ್ಲಿ ಡ್ರೋಣ್ ಬಳಕೆ ಸಹ ಕೃಷಿಯಲ್ಲಿ ಅನಿವಾರ್ಯವಾದರೆ ಅದು ಸೋಜಿಗ ಎನಿಸದು. 1984ರಿಂದ 2004ರವರೆಗೆ ಹಲವಾರು ದೇಶಗಳು ಸೂಕ್ಷ್ಮ ಸ್ಥಳಗಳಲ್ಲಿ ಮಾನವರಹಿತವಾಗಿ ವೈರಿಗಳ ಚಲನ-ವಲನ ಗುರುತಿಸಲು ರಕ್ಷಣಾ ಕ್ಷೇತ್ರದಲ್ಲಿ ಈ ಡ್ರೋಣ್ ತಂತ್ರಜ್ಞಾನವನ್ನು ಬಳಸುತ್ತಿದ್ದವು.

ದಿನದಿಂದ ದಿನಕ್ಕೆ ಡ್ರೋಣ್ ತಂತ್ರಜ್ಞಾನ ವ್ಯಾಪಕವಾಗುತ್ತಿದ್ದು, ಎಲ್ಲ ಕ್ಷೇತ್ರಗಳಿಗೂ ಡ್ರೋಣ್ ಕಾಲಿಡುತ್ತಿದೆ. ಕೃಷಿ ಕ್ಷೇತ್ರದಲ್ಲೂ ಇದರ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಭಾರತದಲ್ಲಿ ಕೃಷಿಗೆ ಪೂರಕವಾದ ನೈಸರ್ಗಿಕ ಸಂಪನ್ಮೂಲಗಳು ಸಾಕಷ್ಟಿದ್ದರೂ, ಆಕಸ್ಮಿಕವಾಗಿ ಸಂಭವಿಸುತ್ತಿರುವ ಹವಾಮಾನದ ವೈಪರೀತ್ಯ ಹಾಗೂ ನೈಸರ್ಗಿಕ ವಿಕೋಪಗಳಿಂದ ರೋಗ ಹಾಗೂ ಕೀಟಗಳ ಬಾಧೆಯು ಉಲ್ಭಣಗೊಳ್ಳುತ್ತದೆ. ಇದರಿಂದಾಗಿ ಬೆಳೆಯ ಆರೋಗ್ಯಕರ ಬೆಳವಣಿಗೆ ಕುಂಠಿತಗೊಂಡು ಇಳುವರಿ ಕುಸಿತವಾಗುವುದು ಸರ್ವೆಸಾಮಾನ್ಯ. ಕೃಷಿಯಲ್ಲಿ ಉತ್ತಮ ಇಳುವರಿ ಪಡೆಯಲು ರೋಗ ಹಾಗೂ ಕೀಟಗಳ ಬಾಧೆಯನ್ನು ಸಮಯಾನುಸಾರ ತಜ್ಞರ ಶಿಫಾರಸ್ಸಿನಂತೆ ಹತೋಟಿ ಮಾಡುವುದು ಅತ್ಯವಶ್ಯ. ಫಸಲನ್ನು ಪರಿಣಾಮಕಾರಿ ನಿರ್ವಹಣೆ ಮಾಡಿ ಅಧಿಕ ಇಳುವರಿ ಪಡೆಯಲು ಈ ಡ್ರೋಣ್ ತಂತ್ರಜ್ಞಾನ ಬಹಳ ಸಹಕಾರಿಯಾಗಿದೆ.

ಜಪಾನ್​ನಲ್ಲಿ ಮೊದಲು ಬಳಕೆ: 1987ರಲ್ಲಿ ವಿಶ್ವದಲ್ಲಿಯೇ ಜಪಾನ್ ಕೃಷಿ ಕ್ಷೇತ್ರದಲ್ಲಿ ಯಮಹಾ ಕಂಪನಿಯ ಡ್ರೋಣ್ ತಂತ್ರಜ್ಞಾನವನ್ನು ಮೊದಲು ಬಳಕೆ ಮಾಡಿತು. ಭಾರತದಲ್ಲಿ ಬೆಂಗಳೂರಿನ ಅನ್​ವ್ಯಾನ್ಡ್ ಆಂಡ್ ಏರ್​ಬೋರ್ನ್ ಪ್ರೈವೇಟ್ ಲಿ. ಸಂಸ್ಥೆ 2019ರಿಂದ ಈ ಡ್ರೋಣ್ ಉತ್ಪಾದನೆ ಮಾಡುತ್ತಿದೆ.

ಡ್ರೋಣ್​ಗಳ ಸಾಮರ್ಥ್ಯ: ನ್ಯಾನೋ-250 ಗ್ರಾಂ, ಮೈಕ್ರೋ-2 ಕಿ.ಗ್ರಾಂ, ಸ್ಮಾಲ್(ಸಣ್ಣ)-25 ಕಿ.ಗ್ರಾಂ, ಮೀಡಿಯಮ್ (ಮಧ್ಯಮ)-150 ಕಿ.ಗ್ರಾಂ, ಲಾರ್ಜ್ (ದೊಡ್ಡ)-500 ಕಿ. ಗ್ರಾಮ್ ಇರುತ್ತದೆ.

ಕಬ್ಬು ಬೆಳೆಯಲ್ಲಿ ಉಪಯೋಗ: ಇಂದಿನ ದಿನಮಾನದಲ್ಲಿ ಕಬ್ಬು ಬೆಳೆಯು ಬೆಳವಣಿಗೆಯ ಪ್ರತಿಯೊಂದು ಹಂತದಲ್ಲೂ ನಿಗಾ ವಹಿಸಬೇಕಾದ ಬೆಳೆಯಾಗಿ ಪರಿವರ್ತನೆಯಾಗಿದೆ. ಬಿಳಿ ಉಣ್ಣೆ ಹೇನು, ಕಾಂಡಕೊರಕ, ಬಿಳಿನೊಣ ಸೇರಿದಂತೆ ಹಲವಾರು ಕೀಟ ಹಾಗೂ ರೋಗಗಳು ಕಬ್ಬು ಬೆಳೆಗೆ ತೀವ್ರವಾಗಿ ಬಾಧಿಸಿ ಇಳುವರಿ ಕುಂಠಿತಗೊಳಿಸುತ್ತಿವೆ. ದೇಶದಲ್ಲಿ ಸಕ್ಕರೆ ಕಾರ್ಖಾನೆಗಳು ಹೆಚ್ಚಾಗುತ್ತಿರುವ ಹಿನ್ನಲೆಯಲ್ಲಿ ಕಾರ್ಖಾನೆಗಳ ಸಮರ್ಪಕ ಹಾಗೂ ತೃಪ್ತಿದಾಯಕ ಕಾರ್ಯನಿರ್ವಹಣೆಗಾಗಿ ಹೇರಳವಾದ ಕಬ್ಬಿನ ಉತ್ಪಾದನೆಯು ಅವಶ್ಯವಿದೆ. ಈಗಾಗಲೆ ಕಬ್ಬು ಬೆಳೆಯ ಕ್ಷೇತ್ರವು ಸೀಮಿತಗೊಂಡಿರುವುದರಿಂದ ಕ್ಷೇತ್ರವನ್ನು ಹೆಚ್ಚಿಸಲು ಸಾಧ್ಯವಿಲ್ಲ. ಇದರ ಬದಲಾಗಿ ಲಭ್ಯವಿರುವ ಕಬ್ಬು ಬೆಳೆಯ ಕ್ಷೇತ್ರದಲ್ಲಿ ಡ್ರೋಣ್​ನಂತಹ ಹೊಸ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡು ಆರೋಗ್ಯವಂತವಾಗಿ ಬೆಳೆಸಿ ಅದರಲ್ಲಿರುವ ಕಬ್ಬನ್ನು ಎತ್ತರವಾಗಿಸಬೇಕಾಗಿದೆ ಅಂದರೆ ಲಭ್ಯವಿದ್ದ ಕ್ಷೇತ್ರದಲ್ಲಿ ಎಕರೆವಾರು ತಲಾ ಉತ್ಪನ್ನ ಹೆಚ್ಚಿಸಬೇಕಾಗಿದೆ.

ಸಹಾಯಧನಕ್ಕೆ ಬೇಡಿಕೆ: ಡ್ರೋಣ್ ಬೆಲೆಯು ಅಂದಾಜು 7.5 ಲಕ್ಷದಿಂದ ಪ್ರಾರಂಭವಾಗುತ್ತದೆ. ಡ್ರೋಣ್ ತಯಾರಕರು ಕೃಷಿ ಕೆಲಸಕ್ಕಾಗಿ ಡ್ರೋಣ್ ಖರೀದಿಸಲು ಸಹಾಯಧನ ಕೊಡಬೇಕೆಂದು ಸರ್ಕಾರಕ್ಕೆ ವಿನಂತಿಸಿಕೊಂಡಿದ್ದಾರೆ. ಆದರೆ ಸರಕಾರದಿಂದ ಇನ್ನುವರೆಗೆ ಯಾವುದೆ ಪ್ರತ್ಯುತ್ತರ ಬಂದಿರುವುದಿಲ್ಲ.

ಮುನ್ನೆಚ್ಚರಿಕೆ ಕ್ರಮಗಳು

• ಡ್ರೋಣ್ ಬಳಕೆ ಮಾಡಲು ಸರ್ಕಾರವು ನಿರ್ದಿಷ್ಟಪಡಿಸಿದ ಮಾರ್ಗಸೂಚಿಗಳಂತೆ ಕಾರ್ಯನಿರ್ವಹಿಸಬೇಕು.
• ಡ್ರೋಣ್ ಚಲಾಯಿಸುವ ಫೈಲಟ್/ಕಾರ್ಯನಿರ್ವಾಹಕರು ಕಡ್ಡಾಯವಾಗಿ ಚಾಲ್ತಿಯಲ್ಲಿರುವ ಚಾಲನಾ ಪರವಾನಗಿ ಪತ್ರವನ್ನು ಹೊಂದಿರಬೇಕು.
• ವಿಮಾನ ನಿಲ್ದಾಣದಿಂದ 5 ಕಿ.ಮಿ ಅಂತರದೊಳಗೆ ಡ್ರೋಣ್ ಬಳಕೆ ಮಾಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
• ವಿಮಾನ ನಿಲ್ದಾಣದಿಂದ 5 ರಿಂದ 8 ಕಿ.ಮಿ ಅಂತರದೊಳಗೆ ಡ್ರೋಣ್ ಬಳಕೆ ಮಾಡುವ ಪೂರ್ವದಲ್ಲಿ ಸಂಬಂಧಿಸಿದ ವಿಮಾನ ಪ್ರಾಧಿಕಾರದಿಂದ ಅಧಿಕೃತ ಪರವಾಗಿಯನ್ನು ಪಡೆದುಕೊಳ್ಳಬೇಕು.

ಡ್ರೋಣ್ ಬಳಕೆಯಿಂದ ಆಗುವ ಲಾಭಗಳು

• ಕೃಷಿ ಕ್ಷೇತ್ರದ ಅಳತೆ ಹಾಗೂ ಇನ್ನಿತರ ಕೃಷಿ ಮಾಹಿತಿಯ ಅಂಕಿ-ಸಂಖ್ಯೆಗಳು ನಿಖರವಾಗಿ ಲಭ್ಯವಾಗುತ್ತವೆ. ಇದರಿಂದ ಭವಿಷ್ಯದ ಯೋಜನೆಗಳ ಸಾಕಾರಕ್ಕಾಗಿ ಪರಿಪೂರ್ಣವಾದ ಭೂ ಮೂಲ ಮಾಹಿತಿ ದೊರೆಯುತ್ತದೆ.
• ಡ್ರೋಣ್​ಗಳನ್ನು ಅವಶ್ಯಕತೆಗನುಗುಣವಾಗಿ ಹಾಗೂ ತ್ವರಿತವಾಗಿ ಉಪಯೋಗಿಸಬಹುದಾಗಿದೆ.
• ಸಸ್ಯಗಳಲ್ಲಿ ಪೋಷಕಾಂಶ ಹಾಗೂ ಸಂರಕ್ಷಣೆಯನ್ನು ಶಿಸ್ತಿನಿಂದ ನಿರ್ವಹಿಸುವ ಸಲುವಾಗಿ ಜಮೀನಿನಾದ್ಯಂತ ಏಕರೂಪದಲ್ಲಿ ಅನ್ವಯವಾಗುವಂತೆ ಅವಶ್ಯಕ ಕ್ರಮ ಕೈಗೊಳ್ಳಬಹುದು.
• ಬೆಳೆಗಳಿಗೆ ಸಂಬಂಧಿಸಿದಂತೆ ನೀರಿನ ಕೊರತೆ, ನೀರಿನ ಹೆಚ್ಚಳ, ನೀರಿನ ಹರಿವು ಹಾಗೂ ಬೆಳೆಗಳ ಬದುಗಳಲ್ಲಿರುವ ಚರಂಡಿ ವ್ಯವಸ್ಥೆಯನ್ನು ಸುಲಭವಾಗಿ ಗುರುತಿಸಬಹುದು.
• ರೋಗ ಹಾಗೂ ಕೀಟಗಳ ಹತೋಟಿಗಾಗಿ ಸಂಪೂರ್ಣ ಪ್ಲಾಟ್​ನಲ್ಲಿ ಕ್ರಮ ಕೈಗೊಳ್ಳದೆ ಕೇವಲ ಬೆಳೆ ಕುಂಠಿತ ಭಾಗದಲ್ಲಿ ಮಾತ್ರ ಹತೋಟಿ ಮಾಡುವುದರಿಂದ ಕನಿಷ್ಠ ಶೇ.20-25 ಖರ್ಚು ಉಳಿತಾಯ ಮಾಡಬಹುದು.
• ಬೆಳೆಯ ಬಾಧೆಗೊಳಗಾದ ಭಾಗದಲ್ಲಿ ಮಾತ್ರ ಕೀಟನಾಶಕ ಸಿಂಪರಣೆ ಮಾಡುವುದರಿಂದ ರಾಸಾಯನಿಕ ಉಪಯೋಗ ಕಡಿಮೆಯಾಗಿ ಮಣ್ಣಿನ ಆರೋಗ್ಯ ಕಾಪಾಡಬಹುದಾಗಿದೆ.

https://www.vijayavani.net/friend-of-an-woman-arrested-for-stealing-gold-from-house/

https://www.vijayavani.net/auto-driver-got-25-crore-rupees-bumper-prize-in-lottery/