ಬೇಸಿಗೆಯಲ್ಲಿ ಎಲ್ಲರಿಗೂ ಬಹುಬೇಗ ನೆನಪಾಗುವುದು ನಿಂಬೆ. ಒಂದು ಲೋಟ ತಣ್ಣನೆಯ ಲಿಂಬೆ ಪಾನಕ ಹೀರಿದರೆ ಒಂಥರಾ ನೆಮ್ಮದಿ, ದೇಹಾರೋಗ್ಯಕ್ಕೂ ಹಿತ. ಆದರೆ, ಸದ್ಯ ಉತ್ತಮ ಬೆಲೆಯಲ್ಲಿ ಮಾರಾಟವಾಗುತ್ತಿರುವ ಲಿಂಬೆಗೆ ಇದೇ ರೀತಿ ಭವಿಷ್ಯದಲ್ಲೂ ಬೆಲೆ ಸಿಗುವ ನಂಬಿಕೆ ಇಲ್ಲ. ನೀರಿನ ಸೌಲಭ್ಯವಿಲ್ಲದೆ ಬೆಳೆಗಳು ಒಣಗುತ್ತಿದ್ದು ಉತ್ಪನ್ನ ಕುಂಠಿತಗೊಳ್ಳುತ್ತಿದೆ. ಇಂಥ ಸಂದರ್ಭದಲ್ಲಿ ರೈತರ ನೆರವಿಗೆ ಧಾವಿಸಬೇಕಿದ್ದ ಇಂಡಿಯಲ್ಲಿ 2017ರಲ್ಲಿ ಸ್ಥಾಪಿತಗೊಂಡ ‘ನಿಂಬೆ ಅಭಿವೃದ್ಧಿ ಮಂಡಳಿ’ ಕೈಚೆಲ್ಲಿ ಕುಳಿತಿದೆ. ಕಾರಣ ರೈತರಿಗೆ ವರವಾಗಬೇಕಿದ್ದ ನಿಂಬೆ ಮಂಡಳಿಯೇ ಸಂಕಷ್ಟದಲ್ಲಿದ್ದು ಕಾಯಕಲ್ಪಕ್ಕೆ ಕಾದು ಕುಳಿತಿದೆ. ರಾಜ್ಯದಲ್ಲಿ 12,357 ಹೆಕ್ಟೇರ್ ಪ್ರದೇಶದಲ್ಲಿ ನಿಂಬೆ ಬೆಳೆಯಲಾಗುತ್ತಿದೆ. ಇದರಲ್ಲಿ ವಿಜಯಪುರ ಜಿಲ್ಲೆಯೊಂದರಲ್ಲೇ ಶೇ.58 (6814 ಹೆಕ್ಟೇರ್) ನಿಂಬೆ ಕೃಷಿ ಮಾಡಲಾಗುತ್ತಿದೆ. ಇಂಡಿ ತಾಲೂಕಿನಲ್ಲೇ 3994 ಹೆಕ್ಟೇರ್ ಪ್ರದೇಶದಲ್ಲಿ ನಿಂಬೆ ಬೆಳೆಯಲಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ನಿಂಬೆಗೆ ವಿದೇಶಗಳಲ್ಲಿ ಬೇಡಿಕೆ ಹೆಚ್ಚಾಗಿದೆ. ತೋಟಗಾರಿಕೆ ಇಲಾಖೆ ಮಾಹಿತಿ ಪ್ರಕಾರ ರಾಜ್ಯದಲ್ಲಿ ವಾರ್ಷಿಕ 2,74,814 ಟನ್ ನಿಂಬೆ ಉತ್ಪಾದನೆಯಾಗುತ್ತಿದೆ. ಪ್ರಸ್ತುತ ನಿಂಬೆ ಧಾರಣೆ ಒಂದು ಡಾಗ್ಗೆ (1000 ಹಣ್ಣಿನ ಒಂದು ಚೀಲ) 700-800 ರೂ. ಮಾರಾಟಗೊಳ್ಳುತ್ತಿದೆ. ಇಂಥ ಸಂದರ್ಭದಲ್ಲಿಯೇ ನೀರಿನ ಸಮಸ್ಯೆಯಿಂದ ಬೆಳೆ ಕುಂಠಿತಗೊಳ್ಳುತ್ತಿದೆ. ರೈತರಿಗೆ ನೆರವಾಗಬೇಕಿದ್ದ ಮಂಡಳಿ ಇದ್ದೂ ಇಲ್ಲದಂತಾಗಿದೆ. ಕಳೆದ ಐದು ವರ್ಷಗಳಿಂದ ಇಂಡಿ ಮಿನಿ ವಿಧಾನಸೌಧದಲ್ಲೇ ಕಾರ್ಯನಿರ್ವಹಿಸುತ್ತಿರುವ ಮಂಡಳಿಗೆ ತನ್ನದೇ ಆದ ಸ್ವಂತ ಕಟ್ಟಡವಿಲ್ಲ. ಸರ್ಕಾರ ಅನುದಾನ ನೀಡಿದರೂ ಸಮರ್ಪಕವಾಗಿ ಬಳಸಿಕೊಳ್ಳಲಾಗಿಲ್ಲ. ಸಕಾಲಕ್ಕೆ ಸಭೆಗಳಾದರೂ ನಿರ್ಣಯಗಳು ಮಾತ್ರ ಅನುಷ್ಟಾನಗೊಂಡಿಲ್ಲ. ಸಿಬ್ಬಂದಿ ಸಮರ್ಪಕವಾಗಿಲ್ಲ. ಹೀಗೆ ಸಾಕಷ್ಟು ಇಲ್ಲಗಳ ನಡುವೆಯೇ ಮಂಡಳಿ ಕಾರ್ಯಾಚರಿಸುತ್ತಿದೆ.
