ಗೆಳೆತನವೇ ಜೀವನದ ಸಿರಿತನ. ಸಂಕಷ್ಟದಲ್ಲಿ ಸಹಾಯಹಸ್ತ ಚಾಚಿ, ಹುಮ್ಮಸ್ಸಿನಿಂದ ಹುರಿದುಂಬಿಸಿ, ರಕ್ತಸಂಬಂಧಕ್ಕಿಂತ ಮಿಗಿಲಾಗಿ ಹಂಚಿಕೊಂಡಿರುವೆನು ಬಾಳಿನ ಸುಖದುಃಖದ ದಿನಗಳನ್ನು. ಗೆಳೆಯ ಬಂದು ಹೋಗೊಮ್ಮೆ ನನ್ನೂರಿಗೆ. ಮಕ್ಕಳಂತೆ ಕುಣಿದಾಡೋಣ ಮತ್ತೊಮ್ಮೆ ಹೊಲ ಗದ್ದೆಗಳಲ್ಲಿ. ನನ್ನಿಂದ ದೂರವಿದ್ದರೇನಂತೆ ನಿನ್ನ ನೆನಪೇ ನನ್ನ ದೈನಂದಿನ ಜೀವನದ ಜೀವಾಳ. ನಿನ್ನ ಜೊತೆಗಿನ ನಗು-ಅಳುವಿನ ಕ್ಷಣಗಳು, ಕಿಸೆಯಲ್ಲಿ ಕಾಸಿಲ್ಲದೆ ಊರೆಲ್ಲ ಸುತ್ತಾಡಿದ ನೆನಪುಗಳು, ಒಂದೇ ತಟ್ಟೆಯಲ್ಲಿ ಉಂಡ ಊಟದ ರುಚಿ ನಾ ಹೇಗೆ ಮರೆಯಲಿ ಗೆಳೆಯ. ನಾ ದಾರಿ ತಪ್ಪಿದಾಗ ನೀ ಬೈದು ತೋರಿಸಿದೆ ಮಾರ್ಗ, ಸಹಾಯವಾಯಿತು ನನಗೆ ಜೀವನದ ಸಾಧನೆಗೆ. ನಮ್ಮ ಸ್ನೇಹ ಅದ್ಭುತವಾದ ಭಾವನೆಗಳ ಸಮ್ಮಿಲನ, ಒಬ್ಬರನ್ನೊಬ್ಬರ ಮನಸ್ಸನ್ನು ಅರ್ಥ ಮಾಡಿಕೊಂಡ ಭವ್ಯ ಸಂಬಂಧ, ನಿರೀಕ್ಷೆ ಮೀರಿದ ಶಾಶ್ವತ ಸ್ನೇಹ ಗೆಳೆಯ ನಮ್ಮದು. ಹಣವೆಷ್ಟೇ ಸಂಪಾದಿಸಿದರೂ ನಿನ್ನ ಜೊತೆ ಕಳೆದ ಕ್ಷಣಗಳ ಬೆಲೆ ಬಹು ಅಮೂಲ್ಯ. ನಿನ್ನ ದೋಸ್ತಿ ನನ್ನ ಜೀವನದ ಅತಿ ದೊಡ್ಡ ಆಸ್ತಿ.
