ಒಟ್ಟಿನಲ್ಲಿ ಹೇಳುವುದಾದರೆ, ಝೆಡ್ ಪೀಳಿಗೆಯವರಿಗೆ ಆಧ್ಯಾತ್ಮಿಕತೆಯು ನಿಂತ ನೀರಲ್ಲ. ಕಾಲ ಕಳೆದಂತೆ ಬದಲಾಗುವ ಸಾಮಾಜಿಕ ಸನ್ನಿವೇಶಗಳಿಗನುಗುಣವಾಗಿ, ಆಧ್ಯಾತ್ಮಿಕತೆಯ ಅರ್ಥ ಮತ್ತು ಅನುಷ್ಠಾನಗಳು ಬದಲಾಗಬೇಕು. ಆಧ್ಯಾತ್ಮಿಕತೆಯು ವ್ಯಕ್ತಿಯ ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿದ ವಿಷಯವಾದರೂ, ಅದು ಸಮಾಜದ ಕ್ಷೇಮಕ್ಕೆ ನೆರವಾಗಬೇಕು. ಏಕೆಂದರೆ, ಯಾವ ವ್ಯಕ್ತಿಯೂ ಸಮಾಜವನ್ನು ಸಂಪೂರ್ಣವಾಗಿ ಬಿಟ್ಟು ಬದುಕಲು ಸಾಧ್ಯವಿಲ್ಲ. ಹೀಗೆ ಸಮಾಜ ಕ್ಷೇಮವನ್ನು ಸಾಧಿಸಲು ಹೊರಟ ಅಧ್ಯಾತ್ಮವಾದಿಯ ಆಧ್ಯಾತ್ಮಿಕತೆಯು ಕ್ರಮೇಣ ವಿಕಸನಗೊಳ್ಳುತ್ತಾ ಹೆಚ್ಚೆಚ್ಚು ಚೈತನ್ಯ ಮತ್ತು ವೈವಿಧ್ಯತೆಯನ್ನು ಪಡೆದುಕೊಳ್ಳುತ್ತದೆ. ವಿವಿಧ ವ್ಯಕ್ತಿಗಳ ಆಧ್ಯಾತ್ಮಿಕ ಸಾಧನೆ ಮತ್ತು ಅನುಭವಗಳಲ್ಲಿರುವ ವೈವಿಧ್ಯತೆಯು ಝೆಡ್ ಪೀಳಿಗೆಯವರ ವೈಶಿಷ್ಟ್ಯವಾಗಿರುತ್ತದೆ. ಇಂತಹ ಹೊಸ ಪೀಳಿಗೆಯ ಯುವಜನರಿಗೆ, ಜಗತ್ತಿನಲ್ಲಿ ಇಂದು ಪ್ರಚಲಿತವಿರುವ ಯಾವ ಆಧ್ಯಾತ್ಮಿಕ ತತ್ವವು ರುಚಿಸಬಹುದು? ಈ ಬಗ್ಗೆ ಆಳವಾಗಿ ಯೋಚಿಸಿದಾಗ, ನನಗೆ ಅನಿವಾರ್ಯವಾಗಿ ಹೊಳೆದ ವಿಷಯವೆಂದರೆ, ಸನಾತನ ಧರ್ಮದ ವೈವಿಧ್ಯಮಯ ವೇದಾಂತ ವಿಚಾರಧಾರೆ. ಏಕೆಂದರೆ, ಇದರಲ್ಲಿ ಪ್ರಶ್ನೆಗಳನ್ನು ಕೇಳಲು ಇರುವ ಸ್ವಾತಂತ್ರ್ಯದ ಜತೆಗೆ, ತನ್ನ ಅನುಭವಗಳ ಆಧಾರದಲ್ಲಿಯೇ ಸತ್ಯಾನ್ವೇಷಣೆ ನಡೆಸುವ ವಿಪುಲ ಅವಕಾಶಗಳಿದ್ದು, ಜಗತ್ತಿನ ಹಿನ್ನೆಲೆಯಲ್ಲಿರುವ ದಿವ್ಯತೆಯ ಏಕತ್ವದ ಆಧಾರದಲ್ಲಿ ಸಾಮಾಜಿಕ ಸಮಾನತೆ ಸಾಧಿಸಲು ಮುಕ್ತ ಆಹ್ವಾನವಿದೆ!
