ಮೊದಮೊದಲು ರುಚಿ ಚೆನ್ನಾಗಿಲ್ಲ ಎಂದೆನಿಸಿದರೂ ನಿಧಾನವಾಗಿ ಅದು ರೂಢಿಯಾಗುತ್ತದೆ ಮತ್ತು ಅದೇ ಹೆಚ್ಚು ರುಚಿ ಎಂದೆನಿಸುತ್ತದೆ. ಬಾಯಿಗೆ ಎಣ್ಣೆ ಹಾಕಿ ಮುಕ್ಕಳಿಸುವುದು ಅಂದರೆ ಆಯಿಲ್ ಪುಲ್ಲಿಂಗ್ ಮಾಡಲು ಕೂಡಾ ಎಳ್ಳೆಣ್ಣೆ ಒಳ್ಳೆಯದು. ಇದರಿಂದ ಹಲ್ಲು ಜುಮ್ ಎನ್ನುವುದು, ವಸಡಿನ ಸಮಸ್ಯೆಗಳು, ಬೇಗ ಹಲ್ಲು ಹಾಳಾಗುವ ತೊಂದರೆಗಳು ಹತೋಟಿಗೆ ಬರುತ್ತವೆ. ಇನ್ನು ಅಭ್ಯಂಗಕ್ಕೆ ಅಂದರೆ ದೇಹಕ್ಕೆ ಮಸಾಜ್ ಮಾಡಿಕೊಳ್ಳಲು ಎಳ್ಳೆಣ್ಣೆ, ಅತ್ಯಂತ ಶ್ರೇಷ್ಠವಾದದ್ದು. ಏಕೆಂದರೆ ಬೇರೆ ಎಣ್ಣೆಗಳಿಗೆ ಹೋಲಿಸಿದರೆ ಇದು ಅತ್ಯಂತ ವಾತನಾಶಕ. ಹಾಗಾಗಿ ಇದನ್ನು ಬಿಸಿ ಮಾಡಿ ದೇಹಕ್ಕೆ ಮಸಾಜ್ ಮಾಡಿಕೊಂಡರೆ ಮಂಡಿ ನೋವು, ಸೊಂಟ ನೋವು, ಚರ್ಮ ಒಡೆಯುವುದು, ಚರ್ಮ ಸುಕ್ಕು ಗಟ್ಟುವುದು ಮುಂತಾದ ತೊಂದರೆಗಳನ್ನು ತಡೆಯಬಹುದು. ಆದರೆ ಗಾಣಗಳಲ್ಲಿ ತಯಾರಿಸಿದ ಎಳ್ಳೆಣ್ಣೆಯನ್ನು ಬಳಸಬೇಕೇ ಹೊರತು ಎಳ್ಳೆಣ್ಣೆ ಎಂದು ಬರೆದಿರುವುದೆಲ್ಲವನ್ನೂ ಕಣ್ಣುಮುಚ್ಚಿ ಬಳಸ ಬಾರದು. ಇದೊಂದು ಕಾಳಜಿಯನ್ನು ವಹಿಸಿದರೆ ಎಳ್ಳೆಣ್ಣೆ ಅಮೃತ ಸಮಾನವೇ ಸರಿ.
