ಡಾಕ್ಟರ್ ವಿಮಲಾ ಕೇರಳದ ಹೆಸರಾಂತ ಪ್ರಸೂತಿ ತಜ್ಞೆಯಾಗಿದ್ದರು. ಸರ್ಕಾರಿ ಸೇವೆಯಿಂದ ನಿವೃತ್ತಿಯ ನಂತರ ಜಿಲ್ಲಾಕೇಂದ್ರವೊಂದರಲ್ಲಿ ಖಾಸಗಿ ನರ್ಸಿಂಗ್ ಹೋಂ ನಡೆಸುತ್ತಿದ್ದರು. 2017ರ ಡಿಸೆಂಬರ್ 15ರ ರಾತ್ರಿ ಸುಮಾರು 11 ಗಂಟೆಗೆ ನರ್ಸಿಂಗ್ ಹೋಂನ ಕಾವಲುಗಾರ ವಿಮಲಾರನ್ನು ಇಂಟರ್ಕಾಂ ಮೂಲಕ ಸಂರ್ಪಸಿ, ‘ಡಾಕ್ಟರ್ ಮೇಡಂ, ಒಂದು ಸೀರಿಯಸ್ ಕೇಸ್ ಬಂದಿದೆ, ಬೇಗ ಬನ್ನಿ’ ಎಂದ. ಗಡಿಬಿಡಿಯಿಂದ ಡಾ.ವಿಮಲಾ ಆಸ್ಪತ್ರೆಗೆ ಧಾವಿಸಿದರು. ಅಲ್ಲಿ ನೋವಿನಿಂದ ನರಳುತ್ತಿದ್ದ ಒಬ್ಬ ಯುವತಿ ಕಂಡಳು. ಅವಳ ಜೊತೆ ಮೂರು ಜನರಿದ್ದರು. ತನ್ನನ್ನು ರೋಗಿಯ ಪತಿಯೆಂದು ಪರಿಚಯಿಸಿಕೊಂಡ ಯುವಕನೊಬ್ಬ ಇತರರನ್ನು ರೋಗಿಯ ತಂದೆ-ತಾಯಿಯೆಂದು ಪರಿಚಯಿಸಿದ. ‘ಡಾಕ್ಟರೇ, ಇವಳಿಗೆ ತೀವ್ರವಾಗಿ ರಕ್ತ ಹೋಗುತ್ತಿದೆ, ದಯವಿಟ್ಟು ಏನಾದರೂ ಮಾಡಿ’ ಎಂದ.
