ಕೆಲವು ಸಂದರ್ಭಗಳಲ್ಲಿ ತಾತ್ಕಾಲಿಕ ಭ್ರಮೆಗೊಳಗಾಗಿ ಸೌಹಾರ್ದತೆಯ ಸುಂದರ ಜೀವನವನ್ನು ಹಾಳು ಮಾಡಿಕೊಳ್ಳುತ್ತೇವೆ. ನಾವೆಲ್ಲರೂ ಪರಿಸರದ ಒಂದು ಭಾಗ, ಪರಸ್ಪರ ಅವಲಂಬನೆಯಲ್ಲಿದ್ದೇವೆ ಎಂಬುದನ್ನು ಮರೆಯುತ್ತೇವೆ. ನನ್ನಿಂದಲೇ ಎಲ್ಲವೂ, ನಾನಿದ್ದರೆ ಎಲ್ಲವೂ ಎನ್ನುವುದು ಭ್ರಮಾ ನಿಲುವಾಗಿದೆ. ಅಲ್ಲದೆ, ಸಣ್ಣ ಸಣ್ಣ ವಿಷಯಗಳಿಗೆ ಅವಿಭಕ್ತ ಕುಟುಂಬಗಳಲ್ಲಿ ಬಿರುಕು ಉಂಟಾಗಿ ಸುಂದರ ಸೌಹಾರ್ದಯುತ ಬಾಳು ಮರೆಯಾಗಿದೆ. ಇದರಿಂದ ಕೆಲವು ಸಲ ಮನಸ್ತಾಪವಾಗುವುದು ಸಹಜ. ಆದರೆ, ಅದು ಎಲ್ಲೆ ಮೀರಬಾರದು. ಪರಸ್ಪರ ಅರ್ಥೈಸಿಕೊಳ್ಳುವುದು ಜೀವನದ ಅತ್ಯಮೂಲ್ಯ ಭಾಗವಾಗಬೇಕು. ಮಾಡಿದೆನೆಂಬುದು ಮನದಲ್ಲಿ ಹೊಳೆದರೆ ಓಡಿಸಿ ಕಾಡಿತ್ತು ಶಿವನ ಡಂಗುರ ಎಂಬ ಬಸವಣ್ಣನವರ ನುಡಿಮುತ್ತಿನ ಸಾರ ಅರಿಯಬೇಕು. ಜಗತ್ತಿಗೆ ಯಾರೂ ಅನಿವಾರ್ಯವಲ್ಲ ಎಂಬುದು ಸರ್ವಕಾಲಿಕ ಸತ್ಯ. ಅದನ್ನರಿತು ನಡೆಯಬೇಕು. ರಸವೇ ಜನನ, ವಿರಸವೇ ಮರಣ, ಸಮರಸವೇ ಜೀವನ ಎಂಬ ಬೇಂದ್ರೆಯವರ ಕವಿವಾಣಿಯನ್ನು ಎಲ್ಲರೂ ಎದೆಯಲ್ಲಿ ಬಿತ್ತಿಕೊಳ್ಳಬೇಕಿದೆ. ಸಾಂಗತ್ಯದ ಸಾಮೀಪ್ಯದಲ್ಲಿ ಸುಂದರ ಬಾಳನ್ನು ಸವಿಯೋಣ. ಬದುಕನ್ನು ಸುಂದರಗೊಳಿಸೋಣ.
