ಮೈಕ್ರೋ ಆರ್ಟ್ ಎಂಬ ಈ ಸೂಕ್ಷ್ಮ ಕಲೆ ಮೂಲಕವೇ ಗಮನ ಸೆಳೆಯುತ್ತಿರುವ ಈ ಸಾಧಕನ ಹೆಸರು ಪರಮೇಶ್ ಶಂಕ್ರಪ್ಪ ಬಂಡಿ. ಮೈಕ್ರೋ ಆರ್ಟ್ ಕಲೆ ಎಂಬುದು ಒಂದು ವಿಶೇಷವಾದ ಕಲೆ. ಅದು ತುಂಬಾ ಸುಲಭವಾಗಿ ದಕ್ಕುವಂಥದ್ದಲ್ಲ. ಅದಕ್ಕೆ ಕಠಿಣ ಶ್ರಮ, ಸತತ ಅಭ್ಯಾಸ, ಅಪಾರ ತಾಳ್ಮೆ, ಸುದೀರ್ಘ ಏಕಾಗ್ರತೆ ಎಲ್ಲವೂ ಅತಿ ಮುಖ್ಯವಾದುದು. ಅಕ್ಕಿಕಾಳುಗಳ ಮೇಲೆ ಅಕ್ಷರಗಳನ್ನು ಮೂಡಿಸುವ ಈ ಕಲೆಯನ್ನು ಕರಗತ ಮಾಡಿಕೊಳ್ಳುವುದು ಸುಲಭದ ಮಾತಲ್ಲ. ಅದರಲ್ಲೂ ಅಕ್ಕಿಕಾಳುಗಳ ಮೇಲೆ ನಾಡಗೀತೆಯನ್ನೇ ಬರೆಯುವುದು ಸಾಮಾನ್ಯ ಸಂಗತಿಯಲ್ಲ. ಆದರೆ ಅದನ್ನು ಈ ಪರಮೇಶ್ ಮಾಡುವ ಮೂಲಕ ಅಸಾಮಾನ್ಯ ಎನಿಸಿಕೊಂಡಿದ್ದಾರೆ. ಪರಮೇಶ್ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣವನ್ನು ತನ್ನ ಹುಟ್ಟೂರಾದ ಗುಡಿಸಲಕೊಪ್ಪದಲ್ಲಿ ಪೂರೈಸಿ, ನಂತರ ಹಾವೇರಿ ಮರೋಳ ಹಾಸ್ಟೆಲ್ನಲ್ಲಿ ಇದ್ದುಕೊಂಡು ಪಿಯುಸಿ ವ್ಯಾಸಂಗ ಮುಗಿಸಿದರು. ಹಾವೇರಿ ತಾಲ್ಲೂಕು ಗುತ್ತಲದಲ್ಲಿ ವಿದ್ಯಾಭ್ಯಾಸ ಪೂರೈಸಿಕೊಂಡು ನಂತರ ಉದ್ಯೋಗವನ್ನು ಅರಸಿ ಬಂದಿದ್ದು ಸುಬ್ರಹ್ಮಣ್ಯಕ್ಕೆ. ಇಲ್ಲಿ ಇವರು ತನ್ನ ಉದ್ಯೋಗದ ಜೊತೆಜೊತೆಗೆ ತನ್ನ ಕಲೆಯನ್ನೂ ಮುಂದುವರಿಸಿಕೊಂಡು ಬರುತ್ತಿದ್ದಾರೆ.
