ಬರಡು ಭೂಮಿಗೆ ಎಲ್ಲ ಬೆಳೆ ಸೂಕ್ತವಾಗಲ್ಲ. ಹೀಗಾಗಿ ಸಿದ್ದಪ್ಪ ಆರಿಸಿಕೊಂಡ ಬೆಳೆ ಕರಿಬೇವು, ಚಿಕ್ಕು, ಸೀಬೆ ಮತ್ತು ಗುಡ್ಡಕ್ಕೆ ಹೇಳಿ ಮಾಡಿಸಿರೋ ಅರಣ್ಯ ಬೆಳೆಗಳನ್ನು. ಇಂದು ಅದೇ ಬೆಳೆ ವರ್ಷಕ್ಕೆ 4-5 ಲಕ್ಷ ರೂ. ಆದಾಯ ತರುತ್ತಿದೆ. ವರ್ಷಕ್ಕೆ 3 ಕಟಾವು ಬರುವ ಕರಿಬೇವು 1 ಕಟಾವಿನಲ್ಲಿ 20 ಕ್ವಿಂಟಾಲ್ ಇಳುವರಿ ನೀಡುತ್ತೆ. ಅಂದ್ರೆ, ವರ್ಷಕ್ಕೆ 60 ಕ್ವಿಂಟಾಲ್ ಇಳುವರಿ ಸಿಕ್ಕಂತಾಯಿತು. ಮಳೆಗಾಲದಲ್ಲಿ ಕೆಜಿಗೆ 20 ರೂ. ಸಿಗುತ್ತೆ ಅನ್ನೋದು ಬಿಟ್ರೆ ಮಿಕ್ಕೆರಡು ಕಟಾವಿನಲ್ಲಿ ಕೆಜಿಗೆ 50 ರೂ. ಸಿಕ್ಕೇ ಸಿಗುತ್ತೆ. 1 ಕೆಜಿಗೆ 50 ರೂ. ಸರಾಸರಿ ಲೆಕ್ಕಾಚಾರದಲ್ಲಿ ಕ್ವಿಂಟಾಲ್ಗೆ 5 ಸಾವಿರ ರೂ. ಆಗುತ್ತೆ. 60 ಕ್ವಿಂಟಾಲ್ಗೆ 3 ಲಕ್ಷ ರೂ. ಸಂಪಾದನೆಯಾಗುತ್ತದೆ. ಅದರಲ್ಲಿ ಮಳೆಗಾಲದ ದರವನ್ನ 1 ಕಟಾವಿಗೆ ಕಡಿಮೆ ಮಾಡಿದ್ರೆ 2,40,000 ರೂ. ಆದಾಯ ಸಿಗುತ್ತೆ. ಇದರಲ್ಲಿ 1 ಲಕ್ಷ ರೂ. ಖರ್ಚು ಕಳೆದರೂ 1.40 ಲಕ್ಷ ರೂ. ಲಾಭ ಒಂದೇ ಬೆಳೆಯಲ್ಲಿ ಸಿಕ್ಕೇ ಸಿಗುತ್ತೆ. ಇದೇ ರೀತಿ ಚಿಕ್ಕು, ಲಿಂಬೆ, ಪೇರಳೆ 3 ಬೆಳೆ ಜತೆಯಲ್ಲೇ ಇದ್ದು, 3 ಕೂಡ ಇನ್ನೊಂದು 3.5 ಲಕ್ಷ ರೂ. ಆದಾಯ ತಂದುಕೊಡುತ್ತೆ. ಒಟ್ಟು ಬರಡು ಭೂಮಿಯಲ್ಲಿ 5 ಲಕ್ಷ ರೂ. ಆದಾಯ ಇದೀಗ ಇವರ ಕೈಸೇರುತ್ತಿದೆ. ಅದು ಕೂಡ ಯಾವ ಕಾರ್ವಿುಕರ ವೆಚ್ಚ ಇರದೆ ಗಂಡ-ಹೆಂಡತಿಯರಿಬ್ಬರ ಪ್ರಯತ್ನದಲ್ಲೇ. ಇಂದು ಸಿಗುತ್ತಿರುವ 5 ಲಕ್ಷ ರೂ. ಆದಾಯ ಮುಂದಿನ ದಿನಗಳಲ್ಲಿ 10 ಲಕ್ಷ ರೂ.ವರೆಗೆ ಹೆಚ್ಚಾಗುತ್ತದೆ. ಅದೇ 10 ಲಕ್ಷ ರೂ. ಮುಂದಿನ 10 ವರ್ಷದಲ್ಲಿ 1 ಕೋಟಿ ರೂ. ಆಗಲಿದೆ. ಕೆಲಸಕ್ಕೆ ಬಾರದಂತಿದ್ದ ಭೂಮಿ ಕೋಟಿ ರೂ. ಸಂಪಾದಿಸುತ್ತೆ ಅಂದಮೇಲೆ ಕಲ್ಲು ಮಣ್ಣಿನ ಭೂಮಿಲಿ ಕೃಷಿ ಅಸಾಧ್ಯ ಅನ್ನೋದೇನಿದೆ ಅಲ್ವಾ? ಇನ್ನು ಇವರ ಶ್ರೀಗಂಧ, ಮಹಾಗನಿ ಮುಂದಿನ 12- 15 ವರ್ಷದಲ್ಲಿ ಕಟಾವಿಗೆ ಬಂದು ಏಕಕಾಲದಲ್ಲೇ ಕೋಟಿ ರೂ. ಆದಾಯ ಹೊತ್ತು ತರಲಿದೆ. ಸಣ್ಣ ಲೆಕ್ಕಾಚಾರ ಮಾಡಿ 100 ಶ್ರೀಗಂಧ 100 ಮಹಾಗನಿ ಇದೆ ಅಂದಿಟ್ಟುಕೊಳ್ಳೋಣ. 1 ಶ್ರೀಗಂಧಕ್ಕೆ ಕನಿಷ್ಠ 1 ಲಕ್ಷ ರೂ. ಅಂದರೂ 100ಕ್ಕೆ 1 ಕೋಟಿ ರೂ. ಆಯ್ತು. ಜತೆಗೆ 100 ಮಹಾಗನಿಯಲ್ಲಿ 1ಮರಕ್ಕೆ ಸರಾಸರಿ 10 ಸಾವಿರ ರೂ. ಹಿಡಿದರೂ 100 ಮರಕ್ಕೆ 10 ಲಕ್ಷ ರೂ. ಸಿಗಲಿದೆ. ಇವರ ಬಳಿ ಇದರ ದುಪ್ಪಟ್ಟು ಆದಾಯ ತರುವ ಮರವಿದೆ. ಆದರೂ ಸಣ್ಣ ಲೆಕ್ಕಾಚಾರದಲ್ಲಿ 1.10 ಕೋಟಿ ರೂ. ಆದಾಯ ಬಂತಲ್ವ..? ಅದೇ ಪಾಳು ಬಿಟ್ಟಿದ್ರೆ..?
