2017ರ ಇಂಡಿಯನ್ ಬ್ಲಾಗರ್ ಅವಾರ್ಡ್ಸ್ನಲ್ಲಿ ಅತ್ಯುತ್ತಮ ಕನ್ನಡ ಬ್ಲಾಗ್ ಎಂಬ ಗೌರವ ಇಜ್ಞಾನದ ಗರಿಮೆ ಆಗಿತ್ತು. ವಿಜ್ಞಾನ ಮತ್ತು ತಂತ್ರಜ್ಞಾನದ ಒಲವುಳ್ಳ ವಿದ್ಯಾರ್ಥಿ ಯುವ ಜನರು ಈ ತಾಣದ ನಿಯತ ಓದುಗರು. ಗ್ಯಾಜೆಟ್ ವಿಜ್ಞಾನ, ವೈವಿಧ್ಯ, ಟೆಕ್ಲೋಕ, ಪ್ರಶ್ನೆ-ಉತ್ತರ, ವಿಜ್ಞಾನ ಪರಿಸರ, ವಿಶೇಷ ಸರಣಿ ಮುಂತಾದ ಕೆಟಗರಿಗಳಲ್ಲಿ ನಾನಾ ರೀತಿಯ ಕುತೂಹಲಕಾರಿ ವಿಜ್ಞಾನ, ತಂತ್ರಜ್ಞಾನ, ಆರೋಗ್ಯ ವಿಚಾರಗಳನ್ನು ಕನ್ನಡಿಗರಿಗೆ ಅರ್ಥವಾಗುವಂತೆ ಪ್ರಸ್ತುತಪಡಿಸಲಾಗುತ್ತಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನಕ್ಕೆ ಸಂಬಂಧಿಸಿದ ವಿಚಾರಗಳು ಕನ್ನಡದಲ್ಲಿ ಒಂದೆಡೆ ಕನ್ನಡಿಗರಿಗೆ ಲಭ್ಯವಾಗಬೇಕು ಎಂದು ಆರಂಭಿಸಿದ ತಾಣ ಇದು. ವಿದ್ಯಾರ್ಥಿ ಯುವಜನರಿಗೆ ಇದು ಬಹಳಷ್ಟು ಪ್ರಯೋಜನಕಾರಿ ಆಗುತ್ತಿದೆ ಎಂದು ಖುಷಿ ವ್ಯಕ್ತಪಡಿಸುತ್ತಾರೆ ಟಿ.ಜಿ.ಶ್ರೀನಿಧಿ. ಸಮಕಾಲೀನ ವಿಜ್ಞಾನ-ತಂತ್ರಜ್ಞಾನ ವಿಷಯಗಳ ಲೇಖನಗಳು, ಪ್ರಶ್ನೋತ್ತರಗಳು ಈ ತಾಣದಲ್ಲಿ ನಿಯತವಾಗಿ ಅಪ್ಡೇಟ್ ಆಗುತ್ತಿದ್ದು, ವಿದ್ಯಾರ್ಥಿ ಯುವ ಜನರಿಗೆ ಹೆಚ್ಚಿನ ತಿಳಿವಳಿಕೆ, ಮಾಹಿತಿಯನ್ನು ಒದಗಿಸುತ್ತಿದೆ. ಇತ್ತೀಚಿನ ಲೇಖನ ಕೃತಕ ಬುದ್ಧಿಮತ್ತೆ ಮತ್ತು ಕಾನೂನು ಎಂಬ ಶೀರ್ಷಿಕೆಯದ್ದು. ಹಲವು ಲೇಖನಗಳು ನಾಡಿನ ವಿವಿಧ ದೈನಿಕ, ನಿಯತಕಾಲಿಕಗಳಲ್ಲಿ ಪ್ರಕಟವಾದವು.
