ನಮ್ಮ ನಿತ್ಯಜೀವನದ ಕಥೆ ಇದು. ಜೀವನ, ದೋಷಗಳ ಚೀಲವಲ್ಲ. ಜೀವನದಲ್ಲಿ ಆನಂದ, ನೆಮ್ಮದಿಯೇ ಮೊದಲಾದ ಸದ್ವಿಚಾರಗಳನ್ನು ಕಂಡು ಕರುಣಿಸಿದ ಋಷಿಗಳ ಭೂಮಿಯಲ್ಲಿ ಬದುಕುತ್ತಿದ್ದೇವೆ. ‘‘ಜೀವನಕ್ಕೆ ಅರ್ಥ ಇದೆಯಪ್ಪಾ, ಅರ್ಥ ಅಷ್ಟೇ ಅಲ್ಲ, ಪರಮಾರ್ಥ ಇದೆ’’ ಎಂಬ ಶ್ರೀರಂಗ ಮಹಾಗುರುಗಳ ಮಾತು ಇಲ್ಲಿ ಸ್ಮರಣೀಯ. ಜೀವನದಲ್ಲಿ ದೋಷಗಳನ್ನು ಹುಡುಕತೊಡಗಿದರೆ ಜಗತ್ತೆಲ್ಲವೂ ದೋಷಪೂರ್ಣ ಎನಿಸುತ್ತದೆ. ಅದೇ ಗುಣಗಳನ್ನು ಹುಡುಕುವ ಅಭ್ಯಾಸ ಮಾಡಿಕೊಂಡರೆ ಸೃಷ್ಟಿಯೆಲ್ಲವೂ ಸರ್ವಾಂಗ ಸುಂದರ. ಮನಸ್ಸಿಗೆ ಯಾವ ಟಿಪ್ಪಣಿ ಅಂಟಿಸುತ್ತೇವೋ ಅದರಂತೆ ತಯಾರಾಗುತ್ತದೆ. ಧರ್ಮರಾಜ- ದುರ್ಯೋಧನರಿಗೆ ಒಡ್ಡಿದ ಪರೀಕ್ಷೆ ಪ್ರಸಿದ್ಧವಾಗಿದೆ. ದುರ್ಯೋಧನನಿಗೆ ವಿಶ್ವದಲ್ಲಿ ಒಳ್ಳೆಯದನ್ನೂ, ಧರ್ಮರಾಜನಿಗೆ ಕೆಟ್ಟದ್ದನ್ನೂ ಗುರುತಿಸುವ ಪರೀಕ್ಷೆ. ಇಬ್ಬರೂ ಅನುತ್ತೀರ್ಣರಾದರು. ದುರ್ಯೋಧನನಿಗೆ ಒಳ್ಳೆಯದೇ ಕಾಣದು. ಧರ್ಮರಾಜನಿಗೆ ಕೆಟ್ಟದ್ದೇ ಕಾಣದು. ಧರ್ಮರಾಜನ ಮಾನಸಿಕತೆ ನಮ್ಮೆಲ್ಲರ ಆದರ್ಶವಾಗಲಿ.
