ದೇಶಾದ್ಯಂತ ಇಂದು ಮಾಜಿ ಪ್ರಧಾನಿ ಲಾಲ್ ಬಹಾದೂರ್ ಶಾಸ್ತ್ರಿ ಅವರ 118ನೇ ಜನ್ಮದಿನ ಆಚರಿಸುತ್ತಿದ್ದರೂ, ಶಾಸ್ತ್ರಿಯವರು ತಾಷ್ಕೆಂಟ್ನಲ್ಲಿ ಸಾವಿಗೀಡಾಗಿದ್ದು ಹೇಗೆ ಎಂಬ ರಹಸ್ಯ ಭೇದಿಸಲು ಇಂದಿಗೂ ಸಾಧ್ಯವಾಗಿಲ್ಲ. ಅವರದ್ದು ಸಹಜ ಸಾವೋ ಅಥವಾ ಕೊಲೆಯೋ ಎಂಬ ಚರ್ಚೆಗೆ ಈಗಲೂ ಉತ್ತರ ಸಿಕ್ಕಿಲ್ಲ. ಶಾಸ್ತ್ರಿಯವರು ಕಟ್ಟಾ ಕಾಂಗ್ರೆಸ್ಸಿಗರಾಗಿದ್ದರೂ, ಅವರ ಸಾವಿನ ಸತ್ಯವನ್ನು ಬಹಿರಂಗಪಡಿಸುವ ಸಾಹಸಕ್ಕೆ ಯಾವ ಕಾಂಗ್ರೆಸ್ ನಾಯಕನೂ ಪ್ರಾಮಾಣಿಕ ಪ್ರಯತ್ನ ಮಾಡಲಿಲ್ಲ. ಶಾಸ್ತ್ರಿಯವರ ಎರಡನೇ ಪುತ್ರ, ಕಾಂಗ್ರೆಸ್ ಮುಖಂಡ ಅನಿಲ್ ಶಾಸ್ತ್ರಿಯವರು ಕಾಂಗ್ರೆಸ್ ಸೇರಿ ಹಲವು ಸರ್ಕಾರಗಳಿಗೆ ಈ ಬಗ್ಗೆ ಮನವಿ ಮಾಡಿದ್ದರೂ, ಯಾವುದೇ ಪ್ರಯೋಜನವಾಗಿಲ್ಲ. ಹಾಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಿದಾಗಲೂ, ಶಾಸ್ತ್ರೀಜಿಯವರ ಸಾವಿನ ಸತ್ಯದ ಕುರಿತ ರಹಸ್ಯ ದಾಖಲೆಗಳನ್ನು ಬಹಿರಂಗಪಡಿಸಿ ಎಂದು ವಿನಂತಿ ಮಾಡಿಕೊಂಡಿದ್ದಾರೆ. ರಾಜಕೀಯ ಪಕ್ಷವಾಗಿ ಬಿಜೆಪಿ ಶಾಸ್ತ್ರಿಯವರ ಬಗ್ಗೆ ಭಾರಿ ಅಭಿಮಾನ ವ್ಯಕ್ತಪಡಿಸಿದರೂ, ಈ ದಿಕ್ಕಿನಲ್ಲಿ ಕಾರ್ಯೋನ್ಮುಖವಾಗಿಲ್ಲ. ತಾಷ್ಕೆಂಟ್ನಲ್ಲಿ ತಂಗಿದ್ದ ಕೋಣೆಯಲ್ಲಿ ದೂರವಾಣಿ ಇಲ್ಲದಿದ್ದದ್ದು, ವೈದ್ಯರಲ್ಲಿಗೆ ಕರೆದೊಯ್ಯಲು ವ್ಯವಸ್ಥೆಯಿಲ್ಲದ್ದು, ಮರಣೋತ್ತರ ಪರೀಕ್ಷೆಗೆ ಭಾರತ ರಾಯಭಾರ ಕಚೇರಿ ಮನವಿ ಮಾಡದೆ ಸುಮ್ಮನಿದ್ದದ್ದು, ಭಾರತಕ್ಕೆ ಮೃತದೇಹ ವಾಪಸಾದಾಗ ದೇಹ, ಮುಖಬಣ್ಣದಲ್ಲಾಗಿದ್ದ ಬದಲಾವಣೆ... ಎಲ್ಲವೂ ಹಲವು ಅನುಮಾನ ಮೂಡಿಸುತ್ತವೆ ಎನ್ನುತ್ತಾರೆ ಅನಿಲ್ ಕುಮಾರ್ ಶಾಸ್ತ್ರಿ.
