ಯಾವ ಐಟಿ ಕೌಶಲವಿದ್ದರೆ ಹೆಚ್ಚಿನ ಬೇಡಿಕೆ ಎಂಬ ಕುರಿತ ಹುಡುಕಾಟದಲ್ಲಿದ್ದಾರೆ ಹೊಸಬರು ಮತ್ತು ಈಗಾಗಲೇ ಐಟಿ ಕ್ಷೇತ್ರದಲ್ಲಿದ್ದವರು ಕೂಡ. 2021ರಿಂದೀಚೆಗೆ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್, ಕ್ಲೌಡ್ ಮುಂತಾದ ಕೌಶಲ ಹೊಂದಿದವರು ಐಟಿ ಉದ್ಯೋಗ ಬಿಟ್ಟು, ನವೋದ್ಯಮಗಳ ಕಡೆಗೆ ಮುಖ ಮಾಡಲಾರಂಭಿಸಿದ್ದಾರೆ. ಇದರಿಂದಾಗಿ, ಐಟಿ ಸಂಸ್ಥೆಗಳು ಮತ್ತು ನವೋದ್ಯಮಗಳ ನಡುವೆ ಸೂಕ್ತ ಪ್ರತಿಭೆಗಳ ನೇಮಕಕ್ಕೆ ಪೈಪೋಟಿ ಶುರುವಾಗಿದೆ. ನಾಸ್ಕಾಂ ವರದಿ ಪ್ರಕಾರ, ಐಟಿ ಕ್ಷೇತ್ರ ಕಳೆದ ಒಂದೇ ವರ್ಷ ಸಾರ್ವಕಾಲಿಕ ಗರಿಷ್ಠ 4,50,000 ಹೊಸ ಉದ್ಯೋಗಿಗಳನ್ನು ನೇಮಕ ಮಾಡಿಕೊಂಡಿದೆ. ಇದರೊಂದಿಗೆ ಐಟಿ ಉದ್ಯೋಗಿಗಳ ಸಂಖ್ಯೆ ಇದೇ ಮೊದಲ ಸಲ 50 ಲಕ್ಷ ದಾಟಿದೆ. ಇಷ್ಟು ದೊಡ್ಡ ಪ್ರಮಾಣದಲ್ಲಿ ಹೊಸ ಪ್ರತಿಭೆಗಳ ನೇಮಕವಾಗಿದ್ದರೂ ಕೂಡ ಐಟಿ ಕ್ಷೇತ್ರದಲ್ಲಿ ಪ್ರತಿಭಾ ವಲಸೆ ದರ ಕಡಿಮೆ ಏನಲ್ಲ. ಇನ್ಪೋಸಿಸ್ ಸಂಸ್ಥೆಯಿಂದ ಕಳೆದ ವರ್ಷ ಬಿಟ್ಟು ಹೋದ ಉದ್ಯೋಗಿಗಳ ಪ್ರಮಾಣ ಶೇಕಡ 27.7. ಇದೇ ರೀತಿ, ಟಿಸಿಎಸ್ನಲ್ಲೂ ಮಾರ್ಚ್ಗೆ ಕೊನೆಗೊಂಡ ತ್ರೖೆಮಾಸಿಕದಲ್ಲಿ ಶೇಕಡ 17.4ರಷ್ಟು ಪ್ರತಿಭಾ ವಲಸೆ ನಡೆದಿದೆ.
