ಮೊದಲನೆಯದಾಗಿ, ಬಜೆ ಬೇರು. ಅತ್ಯಂತ ಸುಲಭವಾಗಿ ಗ್ರಂಥಿಗೆ ಅಂಗಡಿಗಳಲ್ಲಿ ಸಿಗುವ ಈ ಬೇರನ್ನು ತಂದು ಜೇನುತುಪ್ಪದಲ್ಲಿ ಸಾಣೆ ಕಲ್ಲಿನ ಮೇಲೆ ತೇಯ್ದು ಹತ್ತರಿಂದ ಹದಿನೈದು ಹನಿಯಷ್ಟು ನಿತ್ಯವೂ ಸೇವಿಸುವುದರಿಂದ ನಮ್ಮ ಮಂದಗುಣ ಕಡಿಮೆಯಾಗಿ, ನೆನಪಿನ ಶಕ್ತಿ ಹೆಚ್ಚಿ, ಬುದ್ಧಿ ಚುರುಕಾಗಲು ಮತ್ತು ಮಾತು ಸ್ಪಷ್ಟವಾಗಲು ಸಾಧ್ಯವಿದೆ. ಇದಕ್ಕೆ ಉಷ್ಣ ಗುಣ ಇರುವ ಕಾರಣ ಕಫ ಪ್ರಕೃತಿಯವರು ಮತ್ತು ಪದೇ ಪದೇ ಶೀತದಿಂದ ತೊಂದರೆ ಅನುಭವಿಸುತ್ತಿರುವವರು ಸೇವಿಸಿದರೆ ಇನ್ನೂ ಅನುಕೂಲ ಹೆಚ್ಚಾಗುತ್ತದೆ. ಒಂದೆಲಗ ನೆನಪಿನ ಶಕ್ತಿ ಹೆಚ್ಚಿಸುವಲ್ಲಿ ಅತ್ಯಂತ ಸಹಕಾರಿ. ಹಾಗಾಗಿ ಪ್ರತಿಯೊಬ್ಬರಿಗೂ ಎಂಟರಿಂದ ಹತ್ತು ಎಲೆಗಳು ಬರುವಂತೆ ಒಂದೆಲಗವನ್ನು ತಂದು, ತೊಳೆದು, ಸ್ವಲ್ಪ ನೀರು ಹಾಕಿ ರುಬ್ಬಿ, ರಸ ತೆಗೆದು, ಅದಕ್ಕೆ ಹಾಲು ಸೇರಿಸಿ, ಅವಶ್ಯ ಇದ್ದರೆ ಜೊನಿ ಬೆಲ್ಲವನ್ನು ಹಾಕಿ ಎಲ್ಲರೂ ಹಂಚಿಕೊಂಡು ನಿತ್ಯವೂ ಸೇವಿಸಿದರೆ ಖಂಡಿತ ಆರೋಗ್ಯ ವೃದ್ಧಿಯಾಗಿ, ನೆನಪಿನ ಶಕ್ತಿ ಹೆಚ್ಚುವುದರ ಜೊತೆಗೆ ಮುಪ್ಪು ಕೂಡ ದೂರವಾಗುತ್ತದೆ. ಹಸಿ ಎಲೆ ಸಿಗದಿದ್ದ ಪಕ್ಷದಲ್ಲಿ ಗ್ರಂಥಿಗೆ ಅಂಗಡಿಗಳಿಂದ ಒಂದೆಲಗದ ಪುಡಿಯನ್ನು ತಂದು ನಿತ್ಯವೂ ಕಾಲು ಚಮಚದಷ್ಟು ಪುಡಿಯನ್ನು ಹಾಲಿಗೆ ಹಾಕಿ ಸೇವಿಸಬಹುದು. ಆದರೆ ಒಣಗಿದ ಒಂದೆಲಗದ ಪುಡಿಗಿಂತ ಹಸಿ ಎಲೆ ಹೆಚ್ಚು ಪ್ರಯೋಜಕ.
