ರಾಮಾಯಣ ಪ್ರತಿಯೊಬ್ಬರಿಗೂ ಇಷ್ಟವಾಗುವ ಪುರಾಣೇತಿಹಾಸ. ಅದು ಕೇವಲ ಪುರಾಣವಾಗಿರದೆ, ನಮ್ಮೆಲ್ಲರ ಬದುಕಿಗೆ ಮಾರ್ಗದರ್ಶಕ, ಪ್ರೇರಣೆ, ಆದರ್ಶವಾಗಬಲ್ಲ ಸತ್ವಗಳ ಸಾರ ತಿಳಿಸಿಕೊಡುವ ಬೃಹತ್ ಗ್ರಂಥ. ಶ್ರೀರಾಮನ ಆದರ್ಶ, ಲಕ್ಷ್ಮಣ-ಭರತರ ಭ್ರಾತೃತ್ವ, ಸೀತೆಯ ತ್ಯಾಗ ಮಾತ್ರವಲ್ಲದೆ ರಾಜ್ಯ, ರಾಜ, ಅಲ್ಲಿನ ವ್ಯವಸ್ಥೆಗಳು, ನೀತಿನಿಯಮಗಳು, ವ್ಯವಹಾರ ಹೀಗೆ ಅನೇಕ ವಿಚಾರ, ಮೌಲ್ಯಗಳು ನಮ್ಮ ಬದುಕಿನಲ್ಲಿ ಎದುರಾಗುವ ಸನ್ನಿವೇಶಗಳನ್ನು ಎದುರಿಸಲು ಒಂದಲ್ಲ ಒಂದು ರೀತಿಯಲ್ಲಿ ಸಹಕಾರಿಯಾಗುವಂಥವುಗಳು. ರಾಮಾಯಣದಲ್ಲಿ ಅದೆಷ್ಟೇ ಪಾತ್ರಗಳಿದ್ದರೂ ವಿಶೇಷವಾಗಿ ಎಲ್ಲರಿಗೂ ಇಷ್ಟವಾಗುವ ಪಾತ್ರ ಎಂದರೆ ಹನುಮಂತ. ಬಹುಶಃ ಹನುಮಂತನನ್ನು ಪಾತ್ರ ಎನ್ನುವುದಕ್ಕಿಂತ ವಿಶೇಷವಾದ ವ್ಯಕ್ತಿತ್ವ ಎನ್ನುವುದು ಸೂಕ್ತವೆನಿಸುತ್ತದೆ. ವಾನರನಾಗಿದ್ದರೂ ಆತನ ಗುಣ, ಆದರ್ಶ ಇತ್ಯಾದಿಗಳೆಲ್ಲ ನರನನ್ನೂ ಮೀರಿಸುವಂಥವುಗಳೇ ಆಗಿವೆ. ಆತನ ವಿವಿಧ ಸಾಹಸಮಯ ಕತೆಗಳು ಮಕ್ಕಳಿಗಷ್ಟೇ ಅಲ್ಲದೆ ಎಲ್ಲರಿಗೂ ಇಷ್ಟವಾಗುತ್ತವೆ. ಆತನ ಉದಾತ್ತ ಗುಣಗಳು ಯುವ ಜನತೆಗೆ ಮಾದರಿಯಾಗುವಂಥವುಗಳು.
