ಅತ್ಯವಶ್ಯವಾಗಿ ಗಮನಿಸಲೇಬೇಕಾದ ಅಂಶವೇನೆಂದರೆ ಸುಪ್ರೀಂ ಕೋರ್ಟಿನಲ್ಲಿ ರಾಜಮನೆತನದವರು ನೀಡಿದ ಸ್ಪಷ್ಟ ಹೇಳಿಕೆ. ಪದ್ಮನಾಭಸ್ವಾಮಿ ದೇವಸ್ಥಾನವಾಗಲೀ ಅದಕ್ಕೆ ಸೇರಿದ ಯಾವುದೇ ಆಸ್ತಿಪಾಸ್ತಿಗಳಾಗಲೀ ತಮ್ಮ ಸ್ವಂತ ಆಸ್ತಿಯೆಂದು ತಾವು ಪ್ರತಿಪಾದಿಸುತ್ತಿಲ್ಲವೆಂದೂ, ದೇವಾಲಯದ ಉಸ್ತುವಾರಿಯಲ್ಲಿ ಟ್ರಸ್ಟಿಗಳಾಗಿ (ಪ್ರಬಂಧಕರಾಗಿ) ಸೇವೆ ಸಲ್ಲಿಸುವ ಹಕ್ಕನ್ನು ಮಾತ್ರ ಕೋರುತ್ತಿದ್ದೇವೆಂದು ನ್ಯಾಯಾಲಯಕ್ಕೆ ಸ್ಪಷ್ಟಗೊಳಿಸಿದರು. ಈ ಹೇಳಿಕೆಯನ್ನು ಮನ್ನಿಸಿ, ದೇವಾಲಯದ ಇತಿಹಾಸ, ಅಲ್ಲಿನ ಉಸ್ತುವಾರಿಗೆ ಸಂಬಧಿಸಿದ ಸಂಪ್ರದಾಯ, ಪದ್ಧತಿ ಇವುಗಳನ್ನೆಲ್ಲಾ ಪರಿಗಣಿಸಿ ಸುಪ್ರೀಂ ಕೋರ್ಟ್ ತೀರ್ಪಿತ್ತಿದೆ. ಈಗಿನ ತಿರುವನಂತಪುರಂ ಹಿಂದೆ ಇದ್ದದ್ದು ಟ್ರಾವಂಕೋರ್ ರಾಜ್ಯದಲ್ಲಿ. ಅನಂತಶಾಯಿಯಾಗಿ ವ್ಯಕ್ತಗೊಂಡಿರುವ ಮಹಾವಿಷ್ಣುವಿನ ರೂಪವೇ ಪದ್ಮನಾಭ. "ತಿರುವನಂತಪುರಂ" ಎಂದು ಆ ಊರಿಗೆ ಹೆಸರು ಬಂದಿರುವುದೇ ಈ ದೇವಾಲಯದಿಂದ. ಸುಮಾರು 1375 ರಲ್ಲಿ ಆಗಿನ ಮಹಾರಾಜರು ದೇವಾಲಯವನ್ನು ನಿರ್ಮಿಸಿ, ದೇವರನ್ನು ಪ್ರತಿಷ್ಠಾಪಿಸಿದರು. ಸುಮಾರು ಮೂರು ಶತಮಾನಗಳ ನಂತರ ಒಂದು ಬೆಂಕಿ ಅವಘಡ ಸಂಭವಿಸಿ, ಆಗಿನ ಮಹಾರಾಜರು ದೇವಸ್ಥಾನದ ಪುನರ್ನಿರ್ಮಾಣ ಮಾಡಿ ಪುನರ್ ಪ್ರತಿಷ್ಠಾಪನೆ ಮಾಡಿಸಿದರು. 1750 ರಲ್ಲಿ ಅಧಿಕಾರದಲ್ಲಿದ್ದ ರಾಜ ಮಾರ್ತಾಂಡ ವರ್ಮ ತನ್ನ ಇಡೀ ರಾಜ್ಯ, ಸಂಪತ್ತುಗಳನ್ನಷ್ಟೇ ಅಲ್ಲ ತನ್ನ ಖಡ್ಗವನ್ನೂ ಸಹಾ ಪದ್ಮನಾಭಸ್ವಾಮಿಗೆ ಸಮರ್ಪಿಸಿ, ತಮ್ಮ ಪೀಳಿಗೆಯಲ್ಲಿ ಬರುವ ಮುಂದಿನ ರಾಜರುಗಳೆಲ್ಲಾ ಸಂಪಾದಿಸಬಹುದಾದಂತಹ ರಾಜ್ಯ, ಭೂಮಿ ಹಾಗೂ ಸಂಪತ್ತು ಸಹಾ ಪದ್ಮನಾಭಸ್ವಾಮಿಗೇ ಸೇರತಕ್ಕದ್ದೆಂದು ವಚನಬದ್ಧರಾದರು.
