ಅಪಾರ ನಿಗೂಢ ಸಂಪತ್ತು: ಪದ್ಮನಾಭಸ್ವಾಮಿ ದೇವಾಲಯದಲ್ಲಿ ಅಪಾರ ಸಂಪತ್ತು ಇದೆಯೆಂದು ಹೇಳಲಾಗಿದೆ. ಅದರಲ್ಲೂ ಕೊಠಡಿ ‘ಬಿ’ಯಲ್ಲಿ ಸಾವಿರಾರು ಕೋಟಿ ರೂಪಾಯಿ ಬೆಲೆ ಬಾಳುವ ಬಂಗಾರ, ವಜ್ರವೈಢೂರ್ಯದ ಒಡವೆಗಳಲ್ಲದೆ ‘ದೈವಿಕ ಶಕ್ತಿಯಿದೆ’ ಎಂಬ ಪ್ರತೀತಿಯಿದೆ. ಈ ಖಜಾನೆಯನ್ನು ಮುಂದಿನ ಆದೇಶದ ವರೆಗೆ ತೆರೆಯಬಾರದೆಂದು 2011ರ ಜುಲೈ 8ರಂದು ಸುಪ್ರೀಂ ಕೋರ್ಟ್ ಹೇಳಿತ್ತು. ಸಂಪತ್ತಿನ ರಕ್ಷಣೆ, ಲೆಕ್ಕಪತ್ರ ತಪಾಸಣೆ ಮತ್ತು ದೇವತೆ ಮೂರ್ತಿಯ ರಿಪೇರಿ ಸಹಿತ ಹಲವು ವಿಷಯಗಳ ಕುರಿತೂ ನಿರ್ದೇಶನ ಗಳನ್ನು ನೀಡಿತ್ತು. ಹಿರಿಯ ವಕೀಲ ಗೋಪಾಲ್ ಸುಬ್ರಮಣಿಯಂ ಈ ಪ್ರಕರಣದಲ್ಲಿ ನ್ಯಾಯಾಲಯಕ್ಕೆ ಸಲಹೆಗಾರರಾಗಿ (ಅಮಿಕಸ್ ಕ್ಯೂರಿ) ಕಾರ್ಯ ನಿರ್ವಹಿಸಿದ್ದಾರೆ. ದೈವಿಕ ಶಕ್ತಿಯಿದೆ ಎಂಬ ಕಾರಣಕ್ಕೆ ಮುಚ್ಚಲಾಗಿರುವ ಖಜಾನೆ ‘ಬಿ’ಯನ್ನು ತೆರೆಯಬೇಕೆಂದು ಅವರು ನ್ಯಾಯಾಲಯವನ್ನು ಕೋರಿದ್ದರು.
