ತರಕಾರಿ ಕೃಷಿ: ಕಡವಾಡ ಗ್ರಾಮ ತರಕಾರಿ ಕೃಷಿಗೆ ಪ್ರಸಿದ್ಧವಾಗಿದೆ. ಇಲ್ಲಿ ಬೆಳೆಯುವ ಸಾವಯವ ತರಕಾರಿ ಕಾರವಾರ ಹಾಗೂ ಸುತ್ತಲ ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆಗೆ ಮಾರಾಟವಾಗುತ್ತದೆ. ವಾಮನ ಕಳಸ ಅವರು ಮನೆಯ ಸಮೀಪವೇ ಇರುವ 10 ಗುಂಟೆ ಜಾಗದಲ್ಲಿ ತರಹೇವಾರಿ ತರಕಾರಿ ಬೆಳೆಯುತ್ತಾರೆ. ಅದಕ್ಕೂ ಸಗಣಿ ಗೊಬ್ಬರವೇ ಮೂಲವಾಗಿದೆ. ಹೀರೇಕಾಯಿ, ಸೌತೆಕಾಯಿ, ಬೆಂಡೆ, ಹಾಗಲ, ಪಡುವಲಕಾಯಿ ಬೆಳೆಯುತ್ತಿದ್ದಾರೆ. ಮಳೆಗಾಲ ಮುಗಿದ ಮೇಲೆ ಇತರೆ ಹರಿವೆ ಸೊಪ್ಪು, ಮೂಲಂಗಿ, ಬದನೆಕಾಯಿ ಸೇರಿ ವಿವಿಧ ತರಕಾರಿ ಬೆಳೆಯುತ್ತಾರೆ. ಆಯಾ ಕಾಲಕ್ಕೆ ಅನುಗುಣವಾಗಿ ತರಕಾರಿಯ ಮೂರು ಬೆಳೆ ತೆಗೆಯುತ್ತಾರೆ. ತರಕಾರಿ ಬೆಳೆಯಿಂದ ಕೆಲ ಬಾರಿ ವಾರಕ್ಕೆ 10 ರಿಂದ 12 ಸಾವಿರ ರೂ. ಆದಾಯ ಬರುವುದೂ ಇದೆ. ಅಲ್ಲದೇ ಬಸಳೆ ಸೊಪ್ಪು ಬೆಳೆದಿದ್ದು, ವಾರಕ್ಕೆ ನಾಲ್ಕೈದು ಸಾವಿರ ರೂ. ಆದಾಯ ಸಿಗುತ್ತದೆ ಎನ್ನುತ್ತಾರವರು.
