ಪರಿಹಾರವೇನು?: ಜೀವನದಲ್ಲಿ ಏಳು ಬೀಳು, ನೋವು ನಲಿವು ಸಹಜ ಮತ್ತು ಅನಿವಾರ್ಯ. ನಾಣ್ಯ ಟಾಸ್ ಮಾಡಿದಾಗ ಕಾಯಂ ಆಗಿ ಕಿಂಗ್ ಬೀಳುವುದಿಲ್ಲ. ಹಾಗೆಯೇ ಸೋಲು, ನೋವು ಯಾವುದೂ ಶಾಶ್ವತವಲ್ಲ. ಈ ಮಧ್ಯೆ ನಾವು ಮಾಡುವ ಕೆಲ ತಪ್ಪುಗಳು, ಎಡವಟ್ಟುಗಳು, ದುಡುಕಿನ ನಿರ್ಧಾರಗಳು, ನಿಗ್ರಹರಹಿತ ಜೀವನಶೈಲಿ ದುಃಖದ ಕೂಪಕ್ಕೆ ತಳ್ಳಿ ಬಿಡುತ್ತವೆ. ಒಂದು ಕ್ಷಣದ ಆವೇಶ ಅಥವಾ ಆಕ್ರೋಶದಿಂದಲೂ ಈ ತರಹದ ಸನ್ನಿವೇಶ ಸೃಷ್ಟಿಯಾಗಲು ಕಾರಣವಾಗುತ್ತದೆ. ಹಾಗಾಗದಂತೆ ಮುನ್ನೆಚ್ಚರಿಕೆ ವಹಿಸಿ ಬಾಳುವುದೇ ಇದಕ್ಕಿರುವ ಪರಿಹಾರೋಪಾಯ. ಮತ್ತೊಬ್ಬರ ಜತೆಗೆ ಹೋಲಿಕೆ ಮಾಡಿಕೊಂಡು ಬದುಕಬಾರದು. ದಿಢೀರ್ ಶ್ರೀಮಂತನಾಗಬೇಕೆನ್ನುವ ಭರದಲ್ಲಿ ವಾಮರ್ವಗದ ದುಡಿಮೆ ತಪ್ಪು. ಕಾಯಕ ಶ್ರದ್ಧೆ ಇರಬೇಕು. ಪ್ರಾಮಾಣಿಕತೆಯೂ ಅಗತ್ಯ. ಮೇಲಾಗಿ ಶುದ್ಧ ಮನಸ್ಸು ಬಹಳ ಮುಖ್ಯ. ಸ್ವಸ್ಥ ಮನಸ್ಸಿನಿಂದ ಸ್ವಸ್ಥ ಸಮಾಜ ನಿರ್ಮಾಣ ಆಗುತ್ತದೆ ಎಂಬುದನ್ನು ಆತನಿಗೆ ತಿಳಿ ಹೇಳಿದೆ. ಬದುಕಿನಲ್ಲಾದ ಕಹಿ ಘಟನೆಗಳನ್ನು ಮರೆತು ಬಿಡು. ಈಗ ಬದುಕಿನ ಪುಟದಲ್ಲಿ ಹೊಸ ಅಧ್ಯಾಯ. ಇದಕ್ಕೆ ಹೊಸ ಮುನ್ನುಡಿ ಬರೆಯುವ ಜವಾಬ್ದಾರಿ ನಿನ್ನದೇ. ಸಲಹೆ ನನ್ನದು ಎಂದು ಹೇಳಿ ಕಳಿಸಿದೆ. ನನ್ನ ಸಲಹೆ ಆತನಲ್ಲಿ ಆತ್ಮವಿಶ್ವಾಸ ಹುಟ್ಟಿಸಿತ್ತು. ಮೊದಲೇ ನೀನು ಇಷ್ಟು ವರ್ಷ ಕಷ್ಟ ಪಟ್ಟಿದ್ದೀ, ಒಳ್ಳೆಯ ಜೀವನ ನಡೆಸೋ ಆಸೆಯೂ ಇದೆ. ಆದರೆ ಅವಸರದಲ್ಲಿ ತಪ್ಪು ಮತ್ತು ದುಡುಕಿನ ನಿರ್ಧಾರ ತಗೆದುಕೊಂಡು ಹಿಂದಿನ ಜೀವನ ಮರುಕಳಿಸುವುದು ಬೇಡ. ಶೀಘ್ರ ಹಣದಿಂದ ಸುಖ ಸಿಗುವುದಿಲ್ಲ ಎಂದು ತಿಳಿಹೇಳಿದೆ. ಅದಕ್ಕೆ ನಾವು ಹೇಳುವುದು ಯಾವುದೇ ನಿರ್ಧಾರ ತೆಗೆದುಕೊಳ್ಳುವಾಗ ಮನಸ್ಸು ನಿಧಾನವಾಗಿದ್ದರೆ ಒಳಿತು.
