ಅನಾರೋಗ್ಯ ಇದ್ದುದು ಸರಿಸುಮಾರು ಕೇವಲ ನೂರೇ ದಿನಗಳು! ಹೆಚ್ಚಿನ ಜನರು ಈ ರೀತಿಯಲ್ಲಿ ಸೊಗಸಾಗಿ, ಆರೋಗ್ಯವಂತರಾಗಿಯೇ ಜೀವನ ಸಾಗಿಸಿರುತ್ತಾರೆ. ಕೆಲವೇ ಪ್ರತಿಶತ ಜನರು ಬಾಲ್ಯದಿಂದಲೇ ನಿರಂತರ ರೋಗಗ್ರಸ್ತರಾಗಿರುತ್ತಾರೆ ಎಂಬುದೂ ವಾಸ್ತವ. 2022ನೇ ಇಸವಿಯಲ್ಲಿ ಭಾರತೀಯರ ಸರಾಸರಿ ಆಯಸ್ಸು 70.19 ವರ್ಷಗಳು. ಅಂದಮೇಲೆ ಜೀವಮಾನದ ಅರ್ಧಕ್ಕಿಂತಲೂ ಹೆಚ್ಚುಭಾಗ ಬಹುತೇಕ ಜನರು ಕಾಯಿಲೆಗಳಿಲ್ಲದೇ ಕಳೆದಂತಾಯಿತು. ನಲವತ್ತು ವರ್ಷದ ಬಳಿಕ ಚರ್ಮದಿಂದ ಮೊದಲ್ಗೊಂಡು ದೇಹದ ಒಂದೊಂದೇ ಅಂಗಾಂಗಗಳ ಕಾರ್ಯಕ್ಷಮತೆಯು ಕ್ಷೀಣಿಸುತ್ತಾ ಹೋಗುತ್ತದೆ ಎಂದು ಆಯುರ್ವೆದ ಹೇಳಿರುವುದಿಲ್ಲಿ ಗಣನೀಯ. ಐವತ್ತು ವರ್ಷವಾದ ಬಳಿಕ ಕಾಯಿಲೆಗಳು ಅದರಲ್ಲೂ ದೀರ್ಘಕಾಲೀನ ವ್ಯಾಧಿಗಳು ಬಂದೆರಗುವುದಿದೆ. ಆದರೂ ಇವುಗಳೇನು ಎಲ್ಲರಿಗೂ ಬರುವುದಿಲ್ಲ. ಅರವತ್ತು ವರ್ಷದ ಬಳಿಕ ಕಾಯಿಲೆಗಳು ಹೆಚ್ಚಿನ ಸಂಖ್ಯೆಯಲ್ಲಿ, ಅಧಿಕ ಜನರಿಗೆ ಎಡತಾಕುವುದಿದೆ. ಇಲ್ಲೂ ಅನೇಕರು ನಿರಂತರ ಔಷಧಗಳನ್ನು ಅವಲಂಬಿಸಬೇಕಾದ ಕಾಯಿಲೆಗಳಿಗೆ ತುತ್ತಾಗುವುದಿಲ್ಲ ಎಂಬುದೂ ಗಮನಾರ್ಹ. ಎಪ್ಪತ್ತರ ಬಳಿಕ ರೋಗರುಜಿನಗಳು ಹೆಚ್ಚಿದ್ದರೂ ಭಾರತದಲ್ಲಿ ಸರಾಸರಿ ವಯೋಮಾನವೇ 70 ವರುಷ ಎಂಬುದನ್ನು ಪರಿಗಣಿಸಲೇಬೇಕು. 2020ರ ಅಂಕಿಅಂಶದಂತೆ ಪ್ರಸ್ತುತ ಎಪ್ಪತ್ತು ವರ್ಷ ದಾಟಿದ ಜನರ ಸಂಖ್ಯೆ 5 ಕೋಟಿಯಷ್ಟೇ ಇದ್ದು ಇವರಲ್ಲೂ ಅನೇಕರು ಆರೋಗ್ಯವಂತರು! ಜೀವನದಲ್ಲಿ ರೋಗವಿಲ್ಲದ ಕಾಲವೇ ಅಧಿಕ ಎಂಬುದರಲ್ಲಿ ಎಳ್ಳಷ್ಟೂ ಸಂದೇಹವಿಲ್ಲ. ರೋಗವಿಲ್ಲದಾಗ ಏನು ಮಾಡಬೇಕು, ರೋಗ ಬರದಂತೆ ತಡೆಯಲು ಏನು ಮಾಡ ಬೇಕು ಎಂಬ ಬೃಹತ್ ಪ್ರಶ್ನೆಗೆ ಅಷ್ಟೇ ದೊಡ್ಡ ಉತ್ತರವೆಂದರೆ ಆಯುರ್ವೆದ. ಜೀವನದ ಬಹುಕಾಲ ಹಾಗೂ ಆರೋಗ್ಯವಂತರಾಗಿರುವ ಬಹುತೇಕ ಜನರ ಬಹುಪಾಲು ಸಮಯ ಚಿಕಿತ್ಸೆಯೇ ಪ್ರಧಾನವಾಗಿರುವ ಪದ್ಧತಿಗಳ ಅಗತ್ಯ ಇರುವುದಿಲ್ಲ, ಅವರಿಗೆಲ್ಲ ಆಶಾದೀಪ, ದಾರಿದೀಪ ಆಯುರ್ವೆದ. ದಿನಚರ್ಯು, ರಾತ್ರಿಚರ್ಯು, ಋತುಚರ್ಯು, ಸದ್ವೃತ್ತ ಹಾಗೂ ಸ್ವಸ್ಥವೃತ್ತಗಳ ಮೂಲಕ ಸ್ವಾಸ್ಥ್ಯದ ಪರಿಪಾಲನೆ ಹೇಗೆಂದು ವಿಶ್ವಕ್ಕೆ ಸಾರಿದ ಏಕಮೇವ ವೈದ್ಯಪದ್ಧತಿ ಆಯುರ್ವೆದ. ಇವನ್ನು ಪ್ರತಿದಿನವೂ ಅನುಸರಿಸಬಹುದು, ಪ್ರತಿ ಮನೆಯಲ್ಲೂ ಆಚರಿಸಬಹುದು. ಪ್ರತಿವ್ಯಕ್ತಿಯೂ ಅನುಷ್ಠಾನಿಸಬಹುದು, ಪ್ರತಿಮನಸ್ಸೂ ಒಪ್ಪಿಕೊಳ್ಳಬಹುದು. ಆಯುರ್ವೆದವು ಆರೋಗ್ಯ, ಸ್ವಾಸ್ಥ್ಯ ಎರಡಕ್ಕೂ ಬೇಕು. ಜನತೆಗೆ ಇದು ಅರ್ಥವಾಗಬೇಕು.
